s O o n

يعلن الحاج ميرور وولده شاور عن افتتاح بلوج جديـد

"البلوج اسمه " بلكـــــــــون

لأ مش البلكونه بتاعة الغسيل ياظريف …. :)

و لا بتاعة ابن الجيران يا نحنوحه .... :)


البــــلكون بتاع ا لســــينمــــــا

انا با حب السينما قوى ...و بامووت فى الافلام

و باعتبر الموسيقى و الافلام بيكونوا جزء كبير قوى من شخصيــتى

هاحكيلكوا فى البلوج ده عن كل فيلم جديد هاشوفه سواء اجنبى او عربى

و هاقولكوا معلومات تفصيليه عنه
او

هانتكلم سوا عن الافلام القديمه ...اللى شوفناها كلنا و نحكى لبعض عن زكرياتنا معاها

او

نحكى لبعض عن الافلام اللى بنشوفها فى الحياه ... اللى ساعات بتكون اغرب من افلام السينما



قولولى ايه رأيكوا ابدأ فى الموضوع و الا الفكره مضروبه ....................؟؟؟؟؟؟؟

يعنى هانعمل هنا استفتاء ...بس استفتاء بجد مش بلاستيك

تقدروا تبدأوا تـــــلطموا ...قصدى تصوتوا هنا من دلوقت

روحوا اتفرجوا على البلوج من >>>>>> هنا

*************

ملحوظه : برجاء استخدام الرجل اليمين عند الدخول

تحديـــــــــــث

يعرض الان فى بلـــــــــــــكون

فيلم الافتتاح

Alpha Dog

للحصول على تذكره مجانيه اضغط هـــــــــــنا

صدى

لو مش هاتحلم معــايا .... مضـطر احلم بنفـــسـى
**********
لكنــى فى الحـــلم حتـــــى .... عمــرى ماهاحلم لنفســى
**********
لو كنت راح افــتش عن منصب و الا جــاة ... و اصــاحب القــدر
**********
انا ابقــى ما استحقــش.... حــلاوة الحيــاه.. و ضـحكة البشـر
**********
يا صـاحبى يا صـديقى..... ياللى طـريقك طـريقى
**********
ده انا يـوم ما أعيـش لنفسـى..... ده يوم موتى الحقـيقى

*************************

الاغنيه دى على بالى اليومين دول دايما ... بتفكرنى بأحلى سنين عمرى

من الاول

ابعد عن المصريين هناك !!!!!!!!!!!

تخيلوا هى دى النصيحه اللى الناس كانت بتقولهالى فى مصر قبل ماسافر !!!

قلت فى بالى اهو كلام - اصل انا عارف ان الناس فى مصر تحب تضيف - و مش مهم اخد بيه انا هاتصرف من دماغى و ماليش دعوه بحد .

بس بعد ماجيت هنا فوجئت ان النصيحه دى اتكررت كتير !! كتير جدا و من اكتر من حد ... و ساعتها ابتدت العرسه تلعب فى عبى - اصلى عريض شويه :) - و قلت هو ايه النظام ... هو بجد والا ايه ..

رد عليا صديقى الصدوق و اللى عايش هنا من 3 سنين و خبره ... بص لو كان ولا بد تصاحب مصريين يبقى بعيد عن الشغل و مايكونش فى بينكم اى مصالح متضاربه لاحسن هاياكلوك .

ياكلونى .... لأ على ايه ده انا سايب مصر عشان الاشكال دى اجى الاقيهم هنا !!!!

و للأسف طلع الكلام مظبوط ... من ساعة ماجيت و انا ملاحظ ان اساس العلاقه بين الناس هنا هى الاحترام كل واحد فى حاله و عارف شغله ،، مافيش كلام كتير ،،، 1+1 = 2 بجد و مافيش فصال فيها

انا اتنرفزت مرتين بس من ساعة ما جيت - ايه .. بتقولوا ايه _ ايوه تمام صح برافو عليكوا .. المرتين كانوا مع اتنين مصريين .. اه و الله بجد ....

اللى اكتشفته ان المصريين هنا من احسن الجنسيات و بتوع شغل فعلا يعتمد عليهم ... الى ان يتعاملوا مع واحد مصرى زيهم ..هنا يقولك ثانيه واحده و يقوم مطلع من جيبه الوش بتاع مصر ..!!! و فجأه تلاقى نفسك فى مصر من تانى ... نفس قلبة الخلقه و التعامل بأرف كأنه بيعمل الشغل مجانا ..نفس نظرة العيون الجشعه اللى صاحبها عايز يخطف اى حاجه و يجرى ... نفس الاسئله السخيفه و التدخل فى كل حاجه ....

و لازم الحوار يبدأ كده : هو حضرتك بتشتغل ايه ؟ ....

ارد : فى بنك ؟

طيب و ايه نظام القروض عندكوا ؟ اصلى عايز اعمل مشروع !!!

و لو قلت دكتور ... هايقول بطنى و اجعانى دايما ... و لو قلت بتاع بليله هايقول هى البليله بقت بكام..... اى مصلحه منك و خلاص .

طبعا انا مش قصدى ان كل المصريين كده ..انا باتكلم عن بعض الصفات فى الناس اللى خربوها ...

و اللى بسببهم بجد انا سبت البلد ... بعد ما تحول النصب الى النشاط الرئيسى .. و الازدواجيه الرهيبه اللى عندنا .... و القواعد اللى اتعكست بصوره عجيبه ( الصح بقى غلط و الغلط بقى صح ) .

انا قررت امشى لما ابتدى احساسى الفطرى بالناس يختل .... و ابتديت احس ان كل الناس نصابين..... .و بقيت اعد صوابعى بعد ما اسلم على الناس :) .. ...يعنى كان هايجييلى بارانويا ....

قررت امشى لما لقيت انى مش عارف اربى و لادى اقولهم ايه ..... امشى مظبوط و خليك مؤدب .... الناس هايقولوا عليه عبيط

و لو كان كداب و حلانجى و بتاع تلات و رقات ...هايقولوا عليه واد مدردح و روش طحن .......

مش عارف اللى عملته ده صح والا غلط .... بعد ما ستقريت و الحمد لله و ربنا كرمنى بكل حاجه ...جيت هنا ابدأ من جديد ليه ...مش عارف ......

يارب ماطلعش غلطان .. ساعتها مش هاسامح نفسى ابدا ....

مش هاسامح نفسى انى سبت امى و ابويا .. و تراب بلدى اللى باموت فيه ... كنت دايما باقول انا عمرى ما هاسيب البلد .. لو الناس الكويسه مشيت يبقى مين اللى هايصلحها ...

سامحينى يا مصر .. ما قدرتش .... غلبونى .... طلعت انانى و بصيت لنفسى و هربت ... هربت منهم و سيبتك ليهم ...

يــارب ماطلعش غلطان ........

و اخيرا ....هاكتب تانى

و حشتووونى موووت ... و بدون الدخول فى التفاصيل . و ايه اللى اخرك .... و بقالك ميت سنه ماكتبتش ......و الحركات دى .. بكل بساطه هاقولكم انى مشيت !! هجيت ...!! طفشت من البلد .... !! بكل بساطه كده و مع ما تحمله الكلمات البسيطه دى من معاناه رهيبه خلال الثلاث شهور الاخيره .... لأن مجرد انتقالى من مكتب لمكتب فى شغلى كنت بأقعد اسبوع على ما يتعود .. و بابقى قرفان و مش طايق نفسى - اصلى عشرى قوى يا جماعه - فما بالكم بقى بالانتقال بحياتى بالكامل من بلد لبلد تانيه ...!! يعنى تغيير فى الشغل و السكن و البيئه و الجيران ....... ده غير الوحده اللى انا فيها طبعا .... بقالى فى دبى شهر دلوقتى و حاسس انى بقالى 42 سنه .

المهم ماطولش عليكوا و هابقى احكيلكوا تباعا عن اللى انا شفته فى التجربه دى من طقطق لسلاموا عليكوا .. المهم انكوا حشتونى جدا ....

و ياريت حد يفهمنى هى اوسه اختفت ليه ........؟؟؟