مازال صوت التصفيق يدوى فى اذاننا بعد ان خرجنا من الحفله
نظرت لزوجتى و قلت : مبسوطه ياحبيبتى
قالت و عيناها تلمع من السعاده : اه طبعا ...الحفله كانت تحفه
................
ثم
ثم نظرنا الى بعضنا ...و ... و انفجرنا فى ضحك هيستيرى
ضحك لم يتوقف منذ خمسة ايام ... و لن يتوقف لعدة ايام اخرى
و لكى تعرفوا السبب ....... سنعود الى ما حدث قبل ذلك باسبوعين
*********
***************
ديســـمبر 2005
انا : على فكره ... عمر خيرت هايعمل حفله قريب ...يوم 25 عشان الكريسماس
مراتى : بجد ... طب كويس
و لسان حالها يقول ... و انا مالى مايعمل
انا : دى اكيد هاتبقى تحفه .... و الله حفلاته وحشتنى ...بقالى كتير مارحتلوش حفلات
مراتى : اه ...طبعا ...هاتبقى تحفه
انا : طب ماتيجى نروح
مراتى : بجد ..... طب و الولد
ملحوظه : كان ساعتها المحروس التانى لسه ماشرفش
انا : نبقى نسيبه عند طنط ... مايجراش حاجه
مراتى : و الحفله هاتكون فين ؟
انا : على مسرح جاليريا فى جراند حياة ...اللى هو كان ميريديان يعنى
مراتى : ايوه ..... ايوه
طبعا هى لا عارفه فين ميريديان و لا فين جراند حياة .. مراتى تتفسح و انا ادفع و بس ...الاسامى مش مهم
انا : طيب انا هاتصل بيهم و اسأل
هى : اوك
*****************
Galleria , Good Evening
دى البنت اللى ردت عليا ..و بصوت اخر مياصه
انا : من فضلك عايز اسأل على حفلة عمر خيرت
المايصه : اتفضل يا فندم تحت امرك
انا : يا ترى لسه فيه تذاكر ؟
ملحوظه : لازم الف و ادور و اعمل فيها برنس ...مش معقول اقولها التذكره بكام علطول كده
المايصه : اه يا فندم فيه طبعا
انا : فى اول صف ؟؟
حركات برضه
المايصه : ايوه يافندم .. لسه فيه.... تقريبا مافيش الا اول صف ب 300 جم
و الصفوف الاماميه ب 200 جم الباقى ابو 100 جم و 50 جم خلص خلاص
الله يحرقك ...ده انا باقول فى سرى
انا : طيب عموما ...هابقى اتصل تانى ....باى
********************************
انا : ماتيجى نروح ابو 200 وخلاص
مراتى : انت بتهرج يا شاور بلاش دلع
انا : يابنتى دى فرصه
مراتى : الحفلات جايه كتير
انا : طيب ...نستنى بقى اى حفله ليه فى الساقيه من ابو رخيص
**************************
بعد 3 ايام
انا : شفتى الاعلان اللى فى الاهرام ده
مراتى : اعلان ايه
انا : بيقولك ياستى ... ان احنا لو اشترينا من جاليريا سنتر حاجات ب 300 جم ...هايدونا تذاكر حفلة عمر خيرت ببلاش
مراتى : طب و احنا مالنا
انا : ايه اللى احنا مالنا ... نروح نشترى حاجات من هناك و ناخد التذاكر .. ..موجانان
هى : انت يابنى ايديك بتاكلك ...عايز تفرتك و خلاص
انا : ماهو اكيد هانلاقى حاجه محتاجينها ..و اهو نبقى ضربنا عصفورين بحجر
هى : ماشى لما نشوف
**************
رحنا جاليريا سنتر .......و لقينا الموضوع اخر مهرجان
و اعلانات الحفله فى كل حته ..و زينات عشان راس السنه ...و بابا نويل ادى للولد بالونه
و حاجه اخر ابتهاج
انا : بصى .. الكاونتر بتاع الحفله هناك اهه لما اروح اسأل
هى : اوك
**
انا : ياترى الاوفر بتاع تذاكر عمر خيرت لسه شغال ؟
الراجل : ايوه يافندم ... لغاية ليلة الحفله
انا : همممم ..... و ياترى التذاكر الهديه بقى فى انهى صف ؟
الراجل : فى الصفوف الاماميه طبعا يافندم
على فكره الراجل كان بيتكلم بمنتهى الذوق و الادب ..و بصراحه المكان كله كان على المستوى المتوقع
****
المهم رجعت لمراتى و ابتدينا نعمل الشوبنج الاجبارى ...و بعد اللف على المحلات اشترينا شوية حاجات ب 300 جم فعلا
يعنى ..... جينز ليا و شوية حاجات لابنى و كده
المهم خلصنا و توجهنا الى الكاونتر تانى علشان ناخذ الجايزه
**************
واحنا متجهين ناحية الكاونتر اكتشفت ان الراجل اللى انا سألته مشى و جه مكانه شاب حليوه كده ... و النظافه هاتنط منه حاجه كده زى احمد عز و العياذ بالله
انا : مين الواد الامور ده ..؟ امال فين الحاج اللى كان هنا
مراتى ( وهى فاتحه بقها : اه ...هو فعلا امور
انا : احترمى نفسك شويه
هى بغيظ : الله .... مش انت اللى بتقول ؟
انا : طب استنى هنا مع الولد و انا هاروحله
******
المهم رحت عند الشاب الحليوه و انا متآلط على الاخر و عاوج لسانى
انا : هاى جود ايفيننج
شبيه احمد عز : اهلا يافندم تحت امرك
.......انا : بخصوص تذاكر الحفله ...انا عملت المشتريات و
الشاب : ايوه ...تحت امرك ممكن اشوف الايصالات
برضه الواد كان فى منتهى الادب و التربيه وهو بيتكلم ...هى الناس دى مش ساكنه فى مصر ولا ايه !!!؟
انا بآلاطه و قرف : اتفضل
الولد اخد الايصالات منى .....وبص فيها وهو لسه مبتسم ... شويه و ابتدا وشه يحمر .. ويقلب فى الايصالات و كان باين عليه انه محرج او مكسوف من حاجه
انا و انا لسه متقمص شخصية عبود باشا : ايه ...فى حاجه ولا ايه ؟؟؟
الواد الحليوه : لا ...أأ ...بس ...حضرتك دى مشتريا ت ب 300 جم
!! انا : ايوه
الواد : بس الاوفر على المشتريات ب 3000 جنيه مش 300
طــــــــاخ
ده صوت الخبطه اللى جت على نافوخى
انا وانا اتجه الى نصف هدومى : ازاى كده ..الاعلان بيقول 300
الولد وهو محرج بجد : اسف يافندم .... الاعلان اهه و كمان البورشور بتاع الاوفر شوف حضرتك
نظرت و انا هايغمى عليا من الموقف ..و بالفعل كل حاجه فى الاعلان بتقول 3000 !!!!! امال انا جبت رقم تلتميه ده منين ؟؟
انا : أ..أأأ انا متأسف جدا ...انا مش عارف شفتها 300 ازاى ده انا قريت الاعلان اكتر من مره
طبعا كنت باكلمه و انا عباره عن قطعة غسيل لسه خارجه من الغساله الايديال بتاعة زمان - فاكرينها - و بصيت جمبى و اكتشفت ان مراتى و الولد كان واقفين من بدرى و الموضوع بقى بجلاجل
الولد و هو ينظر لنا بأحراج حقيقى : اسف مره تانيه يافندم ...اكيد حضرتك ماخدتش بالك
*************
انسحبنا من امام الشاب انا ومراتى و احنا زى السكرانين من كتر الاحراج و الكسوف ، و اللى زود الموضوع احراج ان الولد كان فى منتهى الذوق و الادب و كان محرج اكتر مننا
المهم ...قعدنا نلف انا و مراتى عشر دقايق فى المول و بعدين قررنا ان احنا نروح
انا : انا مش هاخرج من الباب اللى هناك ...انا مش ممكن ابص فى وش الولد بتاع الكاونتر تانى
مراتى : بس احنا راكنين هناك
انا : مش مشكله ... نخرج من اى باب و نمش شويه ...انما انا مش ممكن اخليه يشوفنى تانى
اقتنعت بكلامى ...و قعدنا نلف المول كله ان احنا نلاقى اى باب تانى ... ابدا
انا : يعنى ام المول ده كله مافيهوش الا الباب اللى هناك ...ده فقر ايه ده
هى و قد بدأت فى الضحك : خلاص بقى يلا نروح وخلاص انا تعبت
انا : امرى لله .. نخرج من الباب و نعمل نفسنا مش شايفينه ...هى يعنى البصه هاتلزق ...ماتبطلى ضحك يا ظريفه
هى وهى مسخسخه على الاخر : اصلك ماشفتش منظرك لما عرفت
انا : ها ها ها ...يا دمك
المهم توجهنا ناحية الباب الرئيسى عشان نمشى ..ووجدنا الشاب الحليوه واقف لسه على الكاونتر
انا : يخرب بيتك ...انت لسه مرزوع
عملنا نفسنا سياح و مشينا نتفرج على المحلات فى اتجاه الباب
و فجأه ...الواد شافنا و توجه بسرعه ناحيتنا و على وجهه نفس الابتسامه العسوله وكأنه كان مستنينا
مراتى : ايه ده هو عايز ايه تانى ؟ جاى علينا ليه ؟
انا -بقلق - : مش عارف ....يانهار اسود .... لاحسن يكون فاكر ان احنا كملنا مشتريات و جايين ناخد التذاكر ....يادى الكسفه الدوبل ياربى
**
الواد : اسف على الازعاج ... ممكن لحظه
انا -فى سرى - : ارغى يا عم الامور
الواد : انا بكرر اسفى على الموقف اللى حصل يافندم
يانهار اخضر ده هو اللى بيعتزر
انا : لأ مافيش حاجه
وفجأه دخل ايديه فى جيبه ...واخرج ظرف فى منتهى الشياكه
الواد : لو سمحت يافندم ،،، بأسم مسرح جاليريا ...ارجو انك تقبل مننا الاعتزار ده ...دول تذكرتين لحفلة عمر خيرت فى الصفوف الاماميه ...علشان نصلح الموقف ده
انا : بمففممفمفم فتفتفن .........نعم
الواد : ارجو انك تقبلها منى انت و المدام
نظرت لأجد مراتى تحولت الى اللون البرتقالى من كتر الاحرا ج
انا : مممقهقعق ........... شكرا
الواد : سهره سعيده انشاء الله ...استأذن حضرتك فى رقم تليفونك عشان تكون معانا فى الحفلات الجايه
وجدتها فرصه مناسبه ..واخرجت الكارت الخاص بى و اديتهوله ...عشان يتأكد ان احنا مش شحاتين
انا وقد استعدت مقدرتى على الكلام : انا متشكر جدا ... و اسف على سوء الفهم
الولد : لأ يافندم ماحصلش حاجه
*************
خرجت انا وزوجتى و جوانا احاسيس كتير .... مكسوفين و فرحانين .. و مستغربين ...و بنضحك بجنان .... و بردانين موت لأننا كنا فى شهر ديسمبر ....... و كمان فخورين ان البلد لسه فيها حاجه اسمها ذوق
و ابنى الصغير بيضحك على ضحكنا و هو مش فاهم حاجه
:)
ثم خطر لى خاطر بعد مادخلنا العربيه
انا : اوعى يابت يكون مقلب و الظرف مافيهوش حاجه
هى : يالهوى .... طب افتح بسرعه
و فتحت الظرف لأجد تذكرتين للحفل من فئة 300 جم
********************
" عمر خيرت مغمض العينين ...و هو يعزف مقطوعته الخالده ... "ليلة الفبض على فاطمه
جمهور الصفوف الاولى من حولنا من مشاهير الفن و الصحافه ... و الالماظات و الفوريرات زى الرز
الجماهير تتمايل من النشوه مع الانغام الساحره
وانا ومراتى - واحنا لابسين اشيك حاجه فى العيله - ننظر الى بعضنا و مازلنا نضحك بجنون
***********************
انا بعد الحفله : لأ ..وانا اللى كنت بادور على باب تانى عشان نخرج منه
هعهعهعهع ....هعهعهعهعهع
هعهعهعهعهع ....... هعهعهعهعهع
