Thursday, April 19, 2007

مرآه الحمـــام ... Shower Mirror


لقراءة الجزء الاول " تفريغ الذاكره " اضغط هنا
لقراءة الجزء الثانى " ماذا فعلت ؟ "
اضغط هنا

لقراءة الجزء الثالث " رساله بدون اسم ..." اضغط هنا

************************************************
صامت و انتم تكلمونى
اعرفكم جيدا ... و لا تعرفونى
اسراركم ...تأتمنونى
و عيوبكم ...لا تخفونى
انه انــــا
انـا
:
مرآة الحمـــــــام
************************

انهت رشا حمامها
ووقفت امام مرآة الحمــــام
تمسحها من البخار المتكثف
ليظهر وجهها
و تبدأ فى تصفيف شعرها الاشقر
و
و توقفت
و نظرت الى وجهها .... و كأنها تراه لأول مره
و تحولت نظرتها الى القرف الشديد
وتمتمت
!!!!!! بــــــــاكرهك
:
.......بــــــــــــاكرهك يا سافله
:
عمرك ماهاتنضفى ... ابدا
:
:
شفتى اخرة عمايلك .....شفتى
يارب تتفضحى ...و تروحىفى ستين داهيه
وده ذنب جوزك ... المسكين
كانت تتحدث بكره شديد و كأنها تتحدث الى الد اعدائها
و بدأت عيناها تدمع
خلاص يارشا .....
ربنا اداكى فرص كتير..... كتـــير اوى
ثم اعطت ظهرها للمرآه ...... و اكملت تصفيف شعرها
*******************
اسمك و سنك و عنوانك ...؟
عزت محمد عطا.... 34 سنه ..... مساكن الشباب - 6 اكتوبر
اتكلم ياعزت .... احكى على اللى شفته
سعادتك ياباشا ... انا سواق المستشار رائف باشا من 4 سنين
و انا سعادتك افهمها و هى طايره ... باشم الخطر من على بعد
......سعادتك حتى اسأل المست
انت رغاى ليه ياجدع انت ؟؟ ماتتكلم على قد السؤال ..انت هاتحكى قصة حياتك
انكمش عزت.... و لاول مره يجف من اللزوجه
سعادتك يابيه ..انا و الفنى بتاع الدش كنا و اقفين على السطوح
و بعدين يابيه انا اخدت بالى من الدم ....اصلى لماح من صغرى سعادتك و الحاجات دى ماتعديش عليا
ماتخلص يابنى ادم انت... ..ده انت رزل صحيح
حاضر سعادتك ....شفنا الدم خارج من باب الاوضه
فكسرنا الباب عشان نشوف فى ايه
و لقينا الاوضه ريحتها صعبه اوى سعادتك .... و الحفار مرمى على وشه و غرقان دم
............انا بقى قلت للفنى بتاع الدش سعادتك
خلاص ...خلصنا ....عندك اقوال تانيه
لا سعادتك
طب اتفضل امضى ....و ماتسافرش الا لما تدينا خبر
طب سعادتك انا متعود اروح الاسماعيليه كل جمعه ... ...و يك اند يعنى
غور يابارد من خلقتى ..بدل مالبسك مصيبه
غـــــــــــــور
*****************************
انت شكلك تعبان بجد ياحبيبى
مالك بس ...بقالك يومين مش بتروح الشغل
قالت رشا لمصطفى ...الذى يجلس على طرف السرير معطيها ظهره
امبارح خرجت من الحمام لقيتك نمت ...مارضيتش اصحيك
انا كويس يارشا ...البسى انتى و انزلى ...عشان شغلك
طب انت مش عايز حاجه اعملهالك قبل ما انزل .....
نظر اليها طويلا
ثم قال ...
.شكرا
******************************
ظل مصطفى على جلسته ...بعد خروج رشا
انه يكاد ان يجن الان .... الموقف اصبح فى غاية الغموض
الرؤيا - المسدس - رشا .... الرساله
ثم تذكر ...الرساله
و اختطف هاتفه من جوار السرير
كان قد ارسل الرساله من هاتف رشا لهاتفه ...بعد ان قرأها ...قبل ان يمسحها
الرساله التى وجدها بالامس ...الرساله التى ارسلت من رقم غير معلوم
و غالبا مايحدث ذلك للرسائل المرسله من دوله اخرى
:الرساله التى تقول
انا مش فاهم انتى مابترديش عليا ليه .... اللى عملته ده كان عشانك ...... انتى اللى طلبتى منى اتصرف ... مع ان الموضوع مش غلطتى لوحدى
اربع سنوات و هو يعاشر تلك المرأه .....كيف لم يكتشف .......كيف
رساله بدون اسم .......اذن هى من خارج مصر
رساله بدون اسم .......اذن هى من خارج مصر
تردد هذا الخاطر فى ذهنه ..... اكثر من مره .... و هو ينظر فى هاتفه و يفكر
و يفكر
ثم طلب رقم
و ردت عليه عاملة الهاتف
شركة ميلينيوم تكنولوجى ... تحت امرك يا فندم
: حاول مصطفى ان يسيطر على صوته و قال
من فضلك ..احنا مطار القاهره الدولى
احنا لقينا شنطه مفقوده من حد سافر من كام يوم ...... الاسم اللى عليها مش واضح....... بس اسم شركتكم مكتوب عليها
ياترى فى حد سافر من عندكم قريب ؟؟؟
تقريبا مافيش غير مستر ممدوح.......صاحب الشركه .... سافر من اربع ايام
ثانيه واحده احولك لسكرتيرته
!!!!!!اسمها مدام رشا
:::::::::::::::::::::::::::::::::::::::::::::::::::::::::::::::::::::::::
واغلق مصطفى الخط ......... .لم يكن يحلم ان يعرف اكثر من هذا
**********************************
: المكان
سطح البنايه 104 الحى المتميز - 6اكتوبر
: الزمان
التاسعه صباحا
المتواجدين
الرائد : محمد الصناديلى - المباحث الجنائيه
السيد : حسام غبريال - رئيس نيابة اكتوبر
و مجموعه من رجال المباحث و النيابه
الدماء تملأ ارض الغرفه المتواضعه بعد رفع الجثه
صوت فلاش كاميرات رجال البحث الجنائى
انا شايف ان الطلقه انضربت من مكان قريب جدا
قال الرائد محمد لحسام و هو يشير الى مكان الجثه على الارض و المخطط بالطبشور الابيض
و ده طبعا باين من طريقة وقوع القتيل على الارض و من تهتك الجلد مكان دخول الطلقه فى الجسم
هات الفارغ يابنى
اتى احد المجندين بكيس بلاستيك صغير ..و اعطاه لمحمد الذى قال
بص ياحسام بيه ... فارغ تسعه مللى
هممممم .... تمام
رد حسام و هو يركز فى كلامه
الجانى ماهتمش انه ياخد الفارغ معاه قبل مايمشى
و ده يدل انه مش محترف و كان خايف جدا
تانى حاجه ياباشا ...قال و هو يقرب الكيس من وجه حسام
لو بصيت على قوة الضربه بتاعة الابره على الفارغ ... هاتلاحظ ان الضربه شديده و غائره جوه الفارغ
و طبعا ده يدل ان الطلقه انضربت من طبنجه جديده
و ده برضه يدل على ان القاتل مش محترف ..و غالبا استخدم طبنجه منزليه قليلة الاستخدام
بس ازاى الجيران ماسمعوش صوت الطلقه
تسائل حسام
انا اقولك ......تقريبا انا عرفت السبب
و اشار الى تلفزيون صغير موضوع على منضده بجانب الغرفه
التلفزيون لو تلاحظ سعادتك كان مقفول بس ... لو بصيت على السويتش بتاع الصوت هاتلاقيه مرفوع على الاخر
و قام بتشغيل التليفزيون ...ليخرج صوته مدويا يصم الاذان ......فاغلقه ثانيا
الحمد لله يا محمد ان الراجل ماعندوش تليفزيون ديجيتال ...ماكنتش هاتشوف السويتش
ضحك الاثنين ..ضحكه قصيره
: يا حسام بيه انا تصورى عن اللى حصل كالتالى
فيه حد خبط على الباب .... حد يعرفه ابراهيم الحفار كويس ..و ده لان الباب مفتوح من الداخل و بدون اثار عنف
ثم بدأ الرائد محمد يتحرك فى الغرفه بحماس... و هو يشرح
و بعدين سعادتك ..هو فتحله الباب كده
و اداله ظهره علشان يدخل الغرفه تانى
فقام القاتل برفع صوت التليفزيون
و اخرج مسدسه و اطلق عليه النار من ظهره .....
الطلقه جت فى وسط الظهر تقريبا ...و ده برضه يدل ان القاتل مش محترف
لان المنطقه دى مش المفروض تموت ... بس الحفار غالبا مات من النزيف الحاد
لان القاتل بعد ماخلص ...قفل الباب من الخارج بالقفل ... و ده اللى خلى الناس ماتشكش ان فى حد جوه
ايه يا عم محمد ...حيلك..... سيب حاجه للجماعه بتوع الطب الشرعى و بتوع البحث الجنائى
اصل زى مانت شايف العمليه بسيطه
هههههههه
سيبهم هما يشوفوا شغلهم .... و انت شوف شغلك و اعرفلنا الجانى
انا هاكلفك ببدء التحريات
...........ابتدت سعادتك خلاص من ساعه و
تمام يافندم
خير يا امين مجدى انت مش شايفنى باتكلم
قال بحزم لامين الشرطه الذى دخل الغرفه مسرعا
معلش ياباشا ...فيه و احد بره عايز يدخل و يكلم سعادتك ...و مش راضى يصبر
مين ده
انا ياباشا
رد شخص اسمر نحيف ... و هو يدخل من باب الغرفه ...و تبدو عليه علامات الاسى
انت مين يا جدع انت
اسمى محمود يا باشا ...انا بواب العماره اللى جنب دى ....... و صاحب ابراهيم الحفار من ساعة ماجه المنطقه
و عايز ايه يا محمود
انا عارف مين اللى قتل الحفار ياباشا
!!!!!!!!!!!!!!!
********************************
ممدوح ....ازيك
رشا حبيبتى ..اخيرا كلمتينى
و لا مره سمعت صوتك ....و اخر رساله مرديتيش عليها
انا رديت عليها ... من يومين
يومين ايه ...انا باتكلم علي الرساله بتاعة امبارح .......كنت باشرحلك انا ليه عملت كده
لا ماوصلتنيش
غريـــبه
المهم المطار اتكلم و بيقول لقوا الشنطه
شنطة ايه ؟؟؟؟؟
الشنطه بتاعتك اللى ضاعت
انا شنطى كلها معايا ...مافيش حاجه ضاعت
...................................
رشا ماببترديش ليه ؟
الو رشا انتى لسه معايا ؟؟
لم تكن رشا معه فى الواقع ...فقد كانت تبحث فى هاتفها عن الرساله
اوك يا ممدوح ...باى دلوقت
قوليلى ايه الاخبار ...عندك ؟
حد عرف حاجه ؟؟
مشعارفه ...بس واضح انهم اكتشفوا الموضوع ...العماره كان قيها بوليس النهارده
ممدوح انا بجد خايفه ...
ماتخافيش ياروحى ... انتى بس اعملى اللى اتفقنا عليه
مش قادره يا ممدوح ... بجد مش قادره
ما هو مافيش حل الا كده .....لازم تخليه يطلقك .... و بعدين هاعملك توكيل و تصفى الشركه ..و تجيلى هنا باريس
هو ده الحل الوحيد
ماشى يا ممدوح ...خد بالك انت من نفسك
باى يا روحى
اغلقت رشا الخط ...و فى عقلها تتردد جمله و احده
مصــطفى عرف
******************************************
ها يامحمود كمل كلامك
كنا سهرانين مع بعض زى كل ليله ياباشا ... و بعدين ال .... الجوزه لعبت بدماغ ابراهيم حبتين
الجوزه بس يا محمود .....؟
اه و شرفك ياباشا
طب كمل ... و هاطنش بمزاجى
المهم سعادتك ..بعد ماالكل روح ...فضلت قاعد انا و هو ،،و حكالى على اللى شافه
شاف و احده من سكان المنطقه .... و هى فى وضع مش و الا بد - استغفر الله العظيم - مع و احد غريب
غيرجوزها
و شافها فين ؟؟
عند النادى سعادتك كانوا فى عربيته ......و كانت راكبه معاه لما شافهم
و بعدين نزلت من العربيه و اخدت عربيتها و روحت
و كانت العربيه مرسيدس حمرامكشوفه ......زى بتوع السيما
المهم سعادتك هو طلع غشيم فى حاجه ..... انه راح قالها انه شافها ... و طلب منها فلوس..بس هو ما قاليش مين هى و لا مين جوزها
ها ...كمل
المهم سعادتك ...انه من كام يوم ... انا كنت باجيب حاجات من على الشارع العمومى
لقيت عربيه مرسيدس حمرا زى اللى حكالى عليها ابراهيم
بس كانت و اقفه بعيد عن المنطقه شويه
و قفت اتفرج عليها ...
و افتكرت كلام ابراهيم
و بعدين لقيت و احد جاى بسرعه ...و شكله كده زى مايكون عامل عمله
ركب العربيه بسرعه ...و خدها و جرى
انا حفظت نمرة العربيه سعادتك ....زى مايكون قلبى حاسس
و جيت هنا عشان اشوف الحكايه مع ابراهيم ... بس الباب كان مقفول بالقفل
كتب الرائد محمد الرقم بسرعه ...و اعطى الورقه لاحد معاونيه
المرور يا حازم بسرعه
محمود .... انا عايزك تهدا و تقعد كده .... و تحكيلى اللى انت قلته ده تانى من الاول
و احده ...واحده
قال الرائد محمد و هو يخرج سيجاره من علبته ...و يعطيها لمحمود
********************************************
المكان : منزل مصطفى - غرفة السفره
الزمان : بعد الاحداث بعشرة ايام
المتواجدون : مصطفى و رشا و كريمه تضع الطعام امامهم
!!!!!! الحوار : صمت تام
مافيش اخبار ياكريمه عن اللى قتل الحفار ... ؟؟؟
قال مصطفى فجأه و هو ينظر الى رشا التى وضعت و جهها فى الطبق
لأ يابيه .... عزت بيقول ..أ أ....قصدى سواق رائف باشا اللى فوقينا بيقول :انهم لسه بيدوروا على الراجل ابو عربيه حمرا .... علشان النمره اللى كانت على العربيه طلعت مسروقه من عربيه تانيه و مش لاقيين العربيه الحمرا لحد دلوقت
بس اكيد هايجيبوه بعد مايعرفوا مين اللى كانت معاه ...الله يسامحها بقى
بطلى رغى شويه ...و غورى روحى المطبخ
كان هذا صوت صراخ رشـــا
و لم تستطيع ان تخفى ايديها المرتعشه عن عيون مصطفى
***************************************
رشا انتى بتهرجى
مش قادره يا ممدوح مش نافع
يعنى ايه مش نافع ...انا مش هاعيش هربان كده لوحدى انت لازم تجيلى و نتجوز زى مااتفقنا
رشا انا قتلت بنى ادم عشانك
انا ماقلتلكش اقتل ... و بعدين واضح انى كنت فاهمه غلط
مصطفى ماعرفش حاجه ...و انا و هو ابتدينا نعيش طبيعى زى الاول الموضوع فات عليه 3 شهور اهه و الامور قربت تبقى تمام
يعنى ايه
يعنى يا ممدوح خلاص انسى الفتره دىوانسانى و انا كمان هانساك.... انا ست متجوزه و لازم احافظ على بيتى بقى
........ متجوزه و بيتك ...اه يا بنت الكلب يا
كان لازم تعرف من زمان انى .......... سلام يا ممدوح
و اقفلت رشا الخط
و على وجهها ابتسامة عاهره فعلا
عاهره تخلصت لتوها من زبون ثقيل الظل
***********************************************
الزمان : ثمانية اشهر من عيد ميلا د رشا
ثمانية اشهر و يوم من مقتل الحفار
المكان منزل مصطفى
امام مرآ ة الحمام
انا خائف
يقول مصطفى و هو يحدق فى المرآه
يقف امامها مشدوها
:
و فى يده مسدسه
وتحت اقدامه ترقد جثه على وجهها
:
و الحمام ملئ بالدماء
!!!!!!!!!!!!!!!!!!!!!!
اليس هكذا بدأ كل شئ
اليس هذا هو مارآه و هو يفرغ ذاكرته اول مره
نظر الى الجثه
جثة رشــــــا
و اطال النظر
و هو ثابت مكانه كتمثال من حجر
:
وارتفع صوته عاليا
عاليا
يضحك بجنون
يضحك و يضحك و يضحك
و فى عقله تتردد كلمات رنانه سمعها على مدار اربع سنوات
تدوى فى عقله و يتردد صداها بين جنباته
كلمات يتذكرها الان فقط
:
و انا كمان بحبك
:
زوجتك نفسى على سنة الله و رسوله
:
لازم اعرفك على مستر ممدوح المدير بتاعى ده حد جميل بجد
:
انا خارجه مش هاتأخر...... انا مع زمايلى ماتخفش
:
لو ماكنتش باحبك ماكنتش عملت كلمة السر بتاعة الخزنه يوم عيد ميلادك يا حبيبتى
:
اما يا ابيه مصطفى انا عندى حتة برنامج خطير ..... ممكن تعرف تطلع بيه كل الرسائل اللى اتمسحت من على التليفون تانى
:
مستر ممدوح هاجر و قفل الشركه ...انا هافضالك ياروحى
:
.......الو...بوليس النجده ياريت تيجوا بسرعه انا هاقتل مراتى ... خد العنوان
::::::::::::::::::::::::::::::::::::::::::::::::::::::::
لم يلحق به ظابط الشرطه
فقط سمعوا صوت اطلاق الرصاص و هم على السلالم
و حينما دخلوا
و جدوا الحمام غارق فى الدماء
:
و على الارض ترقد رشــا على وجهها كما هى
و بجوارها
يرقد مصطفى ....و المسدس مازال فى فمه
و اجزاء مخه تطايرت فى كل مكان
!!!!!!
::::::::::::::::::::::::::::::::::::::::::::::::::::::::
!!!!!و قف ظابط النجده و هو ينظر لى ...و كأنه يسألنى ماذا حدث
و لكنى لا استطيع ان اخبره
:
فانا لا ابوح الاسرار ابدا
و لا اتحدث مع احد
انا ...اســـمع فقط
!!
الا تعرفون من انا ؟
:
انا الذى احكى لكم هذه القصه
و ساحكى للاخرين قصتكم
انا
::
مرآة الحمــــام
*****************************
بسم الله الرحمن الرحيم
و من يتق الله يجـعل له مخرجا
صدق الله العظيم

........................................................
النهـــــــــــــــــــــــــــايه

58 comments:

Esmeralda said...

فظيعه فظيعه فظيعه
:)
بجد حلوة

Esmeralda said...

ألاااااااااااااااااا صحيح
يعنى ايه اللى تحت ده؟؟

لو بصيت على قوة الضربه بتاعة الابره على الفارغ ... هاتلاحظ ان الضربه شديده و غائره جوه الفارغ

على فكرة انا منكن
اعلق تانى بس ده انطباع مش تعليق

Rivendell** said...

حلووووووووووووووووووة موووووووووووووووت






اسلوبك رشيق بجد


لا بجد جامدة

هيييييييييه


انا ميسوطة انها طلعت حلوة انا كنت عمالة افكر انت هتقفلها ازاي

بس بجد جامدة

احيييك

The Groom said...


ما شاء الله

جميل جدا يا حبي

كل ما هنالك ابقى كمل الاية

"ويرزقه من حيث لا يحتسب"

تحياتي العميقة لك من ماناساس البلد ووحشتني كتير

Rivendell** said...

على فكرة مزيكا عمر فاروق جامدة

حاول تسمع كريسنت و كوليامي

هما الاتنين تحفة وانا مجنونة بيهم

Shower-Mirror said...

ازميرالدا :

ربنا يخليكى يارافعه معنوياتى بجد انا مبسوط انها عجبتك

المقصود بالكلام ده ..ابرة ضرب النار بتاعة الطبنجه ...و بيكون اثرها جامد على المظروف كل ما كانت الطبنجه جديده ....

فهمتى حاجه كده ....

انتى لازم تعلقى تانى و تالت ...عايزك تفصصى القصه و تقولى رأيك بجد .

rivendell :

ربنا يكرمك يارب ...يا قطة البلوجرز كلهم .


كويس ان الموسيقى عجبتك

المره اللى جايه هاحطلكوا موسيقى فرايحى لحسام رمزى

تحياتى


ابو جروم الجامد :

ده انت يا باشا اللى واحشنى ... و مبسوط انها عجبتك ...بس كنت
فاكرك هاتكتب تعليق جامد مش كلمتين و اليلام

:) مكانش العشم ده انت الغالى

هههههه

بالنسبه للآيه ... انا كتبت الجزء ده بس لانه بصراحه افضل تعليق شامل على احداث القصه ... و كان قصدى اقول اللى انا قاعد اقوله فى شهر فى قصه طويله عريضه ...قاله سبحانه و تعالى فى ايه من خمس كلمات

ربنا يكرمك يارب

:)

قطر الندي said...

تحفه بجد انا كنت بحاول اتخيل النهايه ممكن تكون ازاي بس بجد نهايه منطقيه جداااااً بس ياحرام صعب عليا مصطفي المسكين ذنبه ايه الراجل يعيش مخدوع و يموت منتحر !! انا مستنيه القصه الجايه بس بسرعه بسرعه لو سمحت انا مستعجله اووووي

shermen said...

بجد هايله جدا
ونهاية غير متوقعة
الميوزيك المره دي أحلى كتير من اللي قبل كده ومناسبة أوي للموقف

~ Bato0ot ~ said...

keda kol el nas matet :(
mustafa tyb mat leh da ragel tayeb :(
kan by7baha w kan 3mlha 3ed meladaha 3ashan tefok w kan by7baha :S
el qesa 7elwa awy .. w mstnyeen tany wa7da besor3aaaaaaaaaaaaaaaaa

emos said...

rasha maaaaaaaaaaaaaaaaaaaatet ya regla

keda te2tel rasha?
howa ana sa7ee7 mesh ba2eet ba7ebaha wala 7aga bs enta tela2eek 2ataltaha 3endan feyya

w ba3deen tawako3aty kanet sa7
hahahaaaaaaaay
zay mana 2olt tamam el gada3 el 7afar 3eref 7aga 3an 7ad wel 7ad 2atalo
ya3ny 2orayeb men tawako3aty

3eeb 3aleek dana beta3et action 2adema

bs barawa 3aleek
kessa hayla 7'ales
howa ana 2etnaked 3alaya fel 2a7'er bs gamilaaaaaaaaaaa

bastokka طهقانة said...

تفاصيلك تحفة
و النهاية مرضية جدا
انت فنان فعلا

مبروك

تخاريف said...

فظييييييييييعه يا ابيه بجد...
جامده جدااا

والنهايه فعلا ..حلوة...زى ما توقعت والله بس مارضيتش احرق الموضوع

مستنين الجديد دايما...
:)

Noony said...

يا خبر؟
يا خبر؟

اية تاني كدة؟
دة انت طلعت كارثة

فظيع شنيع مريع

حلوة أوي
أحلى حاجة عجبتني

بجوارها يرقد مصطفى ....و المسدس مازال فى فمه و اجزاء مخه تطايرت فى كل مكان

جميلة بجد

ههههههه

نوني

Sampateek said...

هايل هايل
تنفع تعمل مسلسل رمضان
انا بفكر نعمل انتاج مشترك بنا
مدونة شركة بالنص
حنتشهر و نجيب فلوس و نصيف في ابو رواش
لو عجباك الفكرة ممكن تراسلني


بس كنت عايزة اشوف يوم في عزت

rosealia29 said...

لا بجد إنت راااجل مالكش حل .. اهتمامك بالتفاصيل حاجة في قمة الروعة .. و عندك فعلآً المقدرة على نقل التفاصيل بشكل يخلي كل إللي يقرااها يعيش مع الناس دي بكل جوارحهم و جوارحنا ..


بجد أستاذ .. و انا استمتعت جداً ..

عبدالله said...

مش بحب الاجزاء علشان كده قريتهم كلهم مره واحده و خلاص
:)
علي العموم الفكره جميله وطريقة السرد كويسه القفله و النط علي الاسباب مش مظبوطين
يعني اشمعني استني و ليه بقي عادي وكان بيفكر في ايه حاجات صغيره لما بتتكلم عن جريمه بتبقي حلو انك تحكيها
انا كنت مستنيها قصه بوليسيه و الظابط يطلع بيفهم بقي والافلام دي بس كويس الحمد لله جت سلميه اصل الحاجات دي خيال علمي دلوقتي بقي

تحياتي

fad-fadat nour said...

بجد روعة ...احسنت

بس كلام في سرك انا قريت الجزء الاخير بس
هو لوحده قصة كاملة الاطراف

اشكرك

Mohamed Hamdy said...

القصه ممتازة لا اعيب عليها غير انك استعملت شويه فصحى وشويه عامى

دة غير انك صرحت بكل شىء ومسبتش اى حاجه لاستنتاج القارىء

خش المدونه عندى

www.demaghy.blogspot.com

هتلاقى على الناحيه الشمال بوستر لقصه من تاليفى اسمها حدث فى محطه الرمل
اقراها وقولى رايك
سلام

علا said...

إبداااااااااع.

تابعتها للنهاية و استمتعت بيها.. بس ليه قتلها و انتحر؟ متهيألي الحياة بتستمر رغم كل شئ.

انما بجد تسلم دماغك.

كراكيب عادل said...

اعتقدأن الكذب يمحو كل آثار المودة.. ومن أخفى عنك نفاقاً لا يستحق أن تهجر مكانك من أجله..هناك ما ومن يستحق وجودك معه..وأظنهم كثر

Bride Zone said...

أنا جيت اهو :)
أنا اللي عجبني في ده كلو... إن اللي قص القصة دي كلها بالنهاية كان الشاور ميرور :)
ابقى فكرني أما أوقف قدامها ماقولش حاجة من أسراري لحسن اتفضح زي ما اتفضحوا الجماعة عندك كده :)

بصراحة قصة موفقة وعجبني فيها تسلسل الأحداث وتنقلها من مشهد إلى آخر والربط بين المشاهد بعد كده..

بس سؤال.. عزت اتجوز البنت السفرجية بعد كده ولا ايه؟ :)

Bride Zone said...
This comment has been removed by the author.
NeRmeeN said...

بجد اسلوبك و سلاسة كلامك جامدين جدا...اكتب على طول ومتعنا دايما بقصصك ..ربنا معاك

BackBone said...

lazyza

wanna b a bride said...

تحفة يا أستاذ

أسلوبك جميل جدا جدا

ماقدرتش أقف في نصها كان لازم أكملها لآخرها وده دليل القصة المحبوكة و الأسلوب الجميل

خليها سلسلة و اوعى تطول الغياب

ماتعملش زيي

تحياتي

mohandat said...

فعلا القصة اكثر من رائعه
تمنياتي لها بالفوز
مهند المصري
يا ريت تبقي تنشر موضوع المسابقة بين اصحابك المدونين
احنا بندور علي التعريف بكل المدونات
اكتر منها مسابقة عادية

smraa alnil said...

مش عارفة اقولك ايه
بس بجد القصة اثرت عليا اوي

بس انت كان لازم تموته يعني
كنت سيبه عايش

بس عارف هو لو كان عايش كان هيتعذب باحساسه جدا
ومش كان هيرتاح بعدها

بس انت مش قلت ايه سبب الخيانة

دايما بيكون في سبب ان المرأة تخون جوزها

ون خلال الاجزاء اللي فاتت مصطفي كان بيحب مراته جدا

انت خليتني افكر فيها
هلي رشا كانت مع ممدوح مصلحة يعني

طب ماهي في الاخر مش خدت منه حاجة

زبون ثقيل الظل

افهم من كد انها متعودة علي اصطياد الزبائن

بس ازاي مصطفي اتجوزها

بقولك ايه انت خليت دماغي تلف

القصة وهمية بجد
يعني حلوة موووووووت

بس وحياة الغالي يا اخي
ما تجزئها كدة
بلاش شغل ادهم صبري دة
وكويس انها الجزء الاخير
الي الامام يا شاور
:))

david santos said...

O dia 25 de Abril de 1974 foi o dia do derrube da ditadura fascista em Portugal, a chamada REVOLUÇÃO DOS CRAVOS, e a queda do (poder) dos inimigos do povo. 25 de Abril, sempre.

Day 25 of April of 1974 was the day of it knocks down of the dictatorship fascist in Portugal, the call REVOLUTION OF the flowers, and the fall of the power of the enemies of the people. 25 of April, forever!
يوم 25 نيسان 1974 كان يوم تقرع عليها من الديكتاتوريه الفاشيه في البرتغال والدعوة للثورة الزهور ، وسقوط سلطة أعداء الشعب. 25 نيسان ، الى الابد!


День 25 апреля 1974 года, в день он постучит в воздухе фашистской диктатуры в Португалии слово О РЕВОЛЮЦИИ цветы, и падение власти враги народа. 25 апреля, навсегда!
Le jour 25 d'avril de 1974 était le jour de lui frappe vers le bas du fasciste de dictature au Portugal, de la RÉVOLUTION d'appel des fleurs, et de la chute de la puissance des ennemis du peuple. 25 d'avril, pour toujours !
Tag 25 von April von 1974 war der Tag von ihm klopft unten vom Diktaturfaschisten in Portugal, von der Anruf REVOLUTION der Blumen und vom Fall der Energie der Feinde von den Leuten. 25 von April, für immer
25天41974年的一天,它拍下來的法西斯獨裁政權,葡萄牙 號召革命的鮮花,秋天的權力得到人民的敵人. 25日,永不停息

REEMOO said...

وااااااااااااااو
انا قلت هرجع تانى اعلق بالتفصيل
بس انا حاليا مش قادره اقول غير كده على القصه اللى قريتها دى
هرجع تانى اعلق بالتفصيل بعد ما افوق من تاثير القصه
تحياتى

REEMOO said...

رجعت تانى بعد ما فقت من تأثير القصه عليا :))
اولا القصه نفسها فى حد ذاتها اكيد معروفه تم تناولها كثيرا زوج مخدوع وزوجه خائنه وعشيق وشاهد وقتل
بس الفكره هنا فى التناول اسلوب السرد بجد كان ممتع جدا
التنقل ما بين حدث والاخر عرفت توظفه صح تماما
بطريقه جعلت القارئ يتنقل معاك ويتخيل الاحداث وكيفيه حدوثها
بس انا بتفق مع سمرا فى نقطه
ان اكيد فى سبب للخيانه
مفيش واحد بتخون زوجها من غير اى سبب
الا لو كانت هى نفسها انسانه مش كويسه
ده طبعا بيبان ومعتقدش النوعيه دى بتحظى بزوج كويس زى مصطفى ده
بعدين ليا ملحوظه حسيت انها مش منطقيه شويه
ان الحفار شافها فى العربيه مع ممدوح فى وضع غير لائق
حاسه ان الجزء ده مش منطقى شويه
يعنى مفيش واحد زوجه وفى وضع اجتماعى كويس ومرتبطه بصاحب شركه زى ما فهمت
يعنى الاتنين ناضجين مش مراهقين هتعرضو نفسهم وسمعتهم بالبساطه دى ويجتمعو فى العربيه بوضع غير لائق
مش عارفه انا الجزء ده مقتنعتش بيه اوى
بس اجمالا القصه عجبتنى جدا واثرت عليا
انا قريت الاربع اجزاء كلهم على بعض
وبجد مش عارفه ازاى كان ممكن استنى اعرف الاحداث جزء جزء
بلاش حكايه الاجزاء دى وخاصه لما تكون قصه بالروعه دى
انا رغيت كتير اوى
بس انت طلبت تفصيل
مدونتك رائعه بجد
ميرسى لزيارتك ليا
تحياتى

صوت فيروز said...

عاااااااااااااااااا
عاااااااااااااااااا
يا ماميييييييييي انا بخاف
انا كده مش هدخل حمامنا اصلا

عموما جامدة موت و لك مستقبل مع قصص الاكشن و التشويق
سير يا نروماندي ااااقصد يا ميرور علي بركة الله
اللهم صلي علي محمد

Dalia said...

ياااااااااااه
روعه جدا
قصه تحبس الانفاس من فرط الغموض
مش فاكره الجمله دى قريتها تقريبا على غلاف ما وراء الطبيعه
بس بجد نهايتها روعه اوى

سكينة said...

أنا قلت هزعل منك واديني زعلت
:(
إيه الهدف من أن رشا تطلع ست بطالة؟؟
إيه الهدف أنك تحطم الزوج المثالي وتطلعه جردل في الآخر
؟؟؟
قولي الحق يا مرايا وبرضو مستنية البوست اللي وعدتني بيه

أحمــــــــدبــــــــــلال said...

أنتظرت نهاية القصة
صراحة أجدها رائعة
بجد غيبتك رجعت منها أقوى مما كنت
ماشاء الله
لو عندك مجموعات تانية ياريت تنشرها
حتى لو عملتلها بلوج تانى لوحدها

تحفة

shermen said...

انت روحت فين يا أستاذ شاور
مفيش جديد ولا ايه
مستنينك
بسرعه
-------------
على فكره انا بكتب قصة
ف مدونتي
تعالى شوفها
مستنياك
سلام

Esmeralda said...

انت فين يا شاور
انت فين يا خويا
حاغطى راسي و انزل ادور عليك
شاور تايه يا ولاد الحلاااااااااااااااااال

يعقــــوب .... said...

أخيرا ..أنا كنت خايف ارجع ملقيش القصة خلصت...لا والله برافو عليك...بس مكنش لازم الزوج يموت يا عم..هو ايه ده..كنت تسيبه ياخد براءه و يكمل حياته سعيد بعد كده...البت احدت جزائها و هو يظبط حاله بعد كده

bluesky said...

سلوب جميل جدا اهنئك عليه حقيقي اسلوبك ممتع جدا

Dalia said...

انت روحت فيييييييين
ايه مافيش جديد
لو مافيش جديد رد علينا طيب
يلا سلام

Esmeralda said...

انا فهمت موضوع الظرف ده
يا باشا انا حريفه ضرب نار
واخده بطوله بلدنا فى نيشان المولد

موضوع الخيانه ده حاجه تقرف بجد و تقتل كمان

رشا ديه عايزه الحرق

حسيت اوى معنى شاور ميرور
موضوع الذاكرة المستهبليه ده بدأ يخوفنى
ساعات الواحد بيعمل حاجه و هو مزأوء ناحيتها

ربنا يستر فى اللى جاى

وحشنى صباحك يا كبير و مفتقده تعليقك عندشي

محسوبتك
من داخل الساقيه

shermen said...

البوست الجديد نزل يا رجاله
---------
بسرعه يا شاور في مسابقة على أول كومينت
انت حر بقى

emos said...

ayn ant ya shower

enta ro7t feen

el ragel dah garalo 7aga walla eh?

showeeeeeeeeeeeeeeeeeeer

shermen said...

انت فين يا شاور
خضيتنا عليك
شوف كلنا بنسأل عنك
والجماهير طلباك
يلا بسرعه تعالى

SoRsaRaa said...

السلااااااااام عليكم






طيب اقول ايه بسسسسسسس
فعلا انا بتأسف انى مدخلتش اشوف الروعة دى قبل كدا لأنى كان عندى كبسة اليومين اللى فاتو:)))



بص هو كل كلام المدح مش هيكفى بجد


انا بمووووووت فى اسلوب السرد دا والنوع دا من القصص
انا قريت الاجزاء كلهاااا
ماكنتش عاوزاها تخلص:(((

المرة الجايه عاوزة خيال علمى

واللى بعدها مذكرات صرصارة والشاور ميرور بتاعتها:)))

SoRsaRaa said...

ايه دا انت اتخطفت واللا ايه؟؟؟

بعد ما كتبت تعليقى لقيت الكل بيسأل عليك

ياليله احسن مصطفى يكون بعت الشبح بتاعه ياخد بتاره منك بعد مانشرت مأساته

رد عليناااا بقى وطمنا..

ياسيدى انت مفيش منك اتنين ياللا بلاش التقل دا بقى على الجماهير

shermen said...

شاور تايه يا ولاد الحلال
أنا بلف عليك المدونات كلها
مفيش تعليق جديد ليك من مده
ايه حكايتك
نجيب منادي

safa7_karmooz said...

تحففففففففففففففففففففه

بجد روووووووووووووووووووووووووووعه ملهااش حل

طريقة كتابتك....انتقالك من حدث لاخر ....كل ده خلانى ااتابع وانزل بالماوس لتحت والاثارة شغاله...والواحد عنده شغف انه يكمل قراية

احييك فعلا ..:)

emos said...

shaklo keda merato gat

enta meratak 3amalak ro3b walla eh

7\alas ya gama3a watto sotko la7san merato te3raf

صاحب البوابــة said...

بإختصار

رائعة

قرأتها من أول حرف الى آخر حرف وانا احبس انفاسي من اثارتها

تحياتي لقلمك المبدع

MiMi said...

هايل ..رائع.. بديع.. مجرم.. تحفة... جميل ... مشكلة.. حلو اوي ..كل اللي بتكتبه ،، مكنتش مصدقة انها هتطلع حلوة كده ، مبروك ، اسجل اعجابي بك وبكتاباتك،، ومظنش فيه تعليق يدي للي كتبته حقه ،، بجد شكرا ليك
Danke Shohn

MiMi said...

انت مش بترد علي معجبينك ليه ؟؟ هوا اللي عِلي عِلي ولا ايه الحكايه؟؟

3abdo me7tas said...

بصراحة مش عارف أكتب إيه بس اللى جوايا يتحس مش يتكتب
يا ريت نتكلم

Anonymous said...

ليه كده يا احمد؟؟؟...ليه كده يا حبيبي؟؟؟...ما قلتليش ليه إنك مجرم سفاح يا روحي ؟؟؟..إنك متعقد من البنات... وإنك كل ما تحب واحدة حلوة و عاوز تتجوزها...تروح خنقها وإنت بتصرخ "لا إنت مش أمي... إنت مش أمي!!!...وبعدين تروح رامي جثتها بالأسيد ...
كده برده يا احمد!!! ...كده تخبي على لولا حبيبتك!!!...كنت تقوللي وانا كنت حاقول اوكيه عادي...هو انا كنت لاقية عريس غيرك...بس تكدب علي يا روحي...لالالا...إلا الكدب انا ما مرضهوش ابدا...واحنا قولنا ايه؟؟؟...الولاد الحلوين الطعمين زي حبيبي حمادة مايكدبش ابدا... إنت دلوقت تقول "سامحني يا رب.. سامحني يا رب أنا مش حكدب تاني أبدا على لولا حبيبتي"...آه ياحبيبي انا بخاف عليك عشان ما تخشش النار...وكمان إفرض يعني إنك إتكعبلت وقعت بالأسيد لا سمح الله...كده يعني تعرض نفسك للخطر..لا دنا كنت حإزعل منك بجد يا حبيبي...ودلوقت ممكن أطلب منك طلب صضنن قوي قد كده...عشان خاطري...عشان خاطر لولا حبيبتك نين عينك...ممكن تأجل قتلي لتاني يوم بعد الدخلة يا روحي؟؟؟...قلت إيه؟؟؟...ما سمعتش...قلت أوكي...طيب ...ربنا ما يحرمنيش منك أبدا يا حبيبي ...

Shower-Mirror said...

مين اللى كاتب الكلام الغريب اللى فوق ده !!!!!!!!!!!!!!!!!!!!! ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Anonymous said...

يخرب عقللك يا شاور
تحفة القصة
عملتها ازاى دى
بجد تحفة
بت خيخة واى كلام

Toblerone007 said...

Ragel fanan, ana kont mashdoda tol elwa2t, please write more :) good luck.

slabandra said...

هايله جدا
استمتعت بالقراءه جدا جدا و بأسلوبك الشيق و الأكثر من رائع
أشكرك

Leanna said...

Good for people to know.