منبع الشر

تغمرنى الراحه النفسيه اليوم

اشعر برغبه شديده ان اتحدث

ان احكى

..............................

لست من هواة الكلام

و لم اكن يوما ممن يحبون التحدث عن انفسهم

و لكن ....اليوم يوم جديد ... مختلف

سأحدثكم اليوم عن المرآه

:::::

لا ..انها ليست كبقية المرايا

انها

:

:

انها .... منبع الشر

::

لطالما كنت احسب للمرايا الف حساب

لم ارتح يوما لصورتى فيها

::::

و تأكدت مخاوفى عندما وقفت امامها

هذه المرآه

:::::

او لنقل ...هذا الشئ

!!!!!!!!!!!!!!!!!!!!!!!

هذا الشئ الذى يعتبر السبب الرئيسى لموتى .آ آ .. اقصد لمقتلى

!!!!!

اه ......هل نسيت ان اقول لكم انى ميت الان

........

اسف .... و لكن اعتقد انه يجب على ان اقص كل شئ من البدايه

بداية اعرفكم بنفسى

انا

...

انا كمال الدين محمود الاباصيرى

او الصاغ كمال كما كان يحب ان ينادونى زملائى فى ثكنتى العسكريه

و الان سانتظر الى ان تتجمعوا لكى ابدأ

اعتقد ان هذا هو افضل شئ سأفعله منذ ان تم قتلى

فى الخامس من يناير عام 1961

فى مدينة القاهره

بعد ثلاثة اشهر من رؤية صورتى لأول مره فى هذه المرآه

آ آ ... أقصد

مــــنبع الشر

I'm Back

التحضير للاجازه فى مصر

ثم الاجازه فى مصر

:

التحضير لمدرسة ابنى

ثم دخول ابنى المدرسه

:

التحضير لرمضان

ثم قدوم رمضان

:

التحضير للعيد

ثم قدوم العيد

هذه باختصار جميع الاحداث التى حدثت منذ اخر لقاء بيننا

و طبعا كلها حاجات محتاجه تفكير و تدبير و توفير و دفع و كع ...الخ ..الخ

فاضطررت اسفا انى اتوقف عن الكتابه و التعليق

و لكنى لم اتوقف عن القراءه و متابعة اعمالكم

:

:

:

وحشتونى كلكم

و هاحاول ارجع تانى للتعليق.. و ربنا يستر و ارجع تانى للكتابه

..........و انشاء الله اول موضوع هايكون

:

:

:

يوووووووووه ده العيد الكبير قرب

:)
:)

كل سنه وانتوا طيبين

يادى الكسوف

مازال صوت التصفيق يدوى فى اذاننا بعد ان خرجنا من الحفله

نظرت لزوجتى و قلت : مبسوطه ياحبيبتى

قالت و عيناها تلمع من السعاده : اه طبعا ...الحفله كانت تحفه

................
ثم

ثم نظرنا الى بعضنا ...و ... و انفجرنا فى ضحك هيستيرى

ضحك لم يتوقف منذ خمسة ايام ... و لن يتوقف لعدة ايام اخرى


و لكى تعرفوا السبب ....... سنعود الى ما حدث قبل ذلك باسبوعين

*********
***************
ديســـمبر 2005

انا : على فكره ... عمر خيرت هايعمل حفله قريب ...يوم 25 عشان الكريسماس

مراتى : بجد ... طب كويس

و لسان حالها يقول ... و انا مالى مايعمل

انا : دى اكيد هاتبقى تحفه .... و الله حفلاته وحشتنى ...بقالى كتير مارحتلوش حفلات

مراتى : اه ...طبعا ...هاتبقى تحفه

انا : طب ماتيجى نروح

مراتى : بجد ..... طب و الولد

ملحوظه : كان ساعتها المحروس التانى لسه ماشرفش

انا : نبقى نسيبه عند طنط ... مايجراش حاجه

مراتى : و الحفله هاتكون فين ؟

انا : على مسرح جاليريا فى جراند حياة ...اللى هو كان ميريديان يعنى

مراتى : ايوه ..... ايوه

طبعا هى لا عارفه فين ميريديان و لا فين جراند حياة .. مراتى تتفسح و انا ادفع و بس ...الاسامى مش مهم

انا : طيب انا هاتصل بيهم و اسأل

هى : اوك

*****************

Galleria , Good Evening

دى البنت اللى ردت عليا ..و بصوت اخر مياصه

انا : من فضلك عايز اسأل على حفلة عمر خيرت

المايصه : اتفضل يا فندم تحت امرك

انا : يا ترى لسه فيه تذاكر ؟

ملحوظه : لازم الف و ادور و اعمل فيها برنس ...مش معقول اقولها التذكره بكام علطول كده

المايصه : اه يا فندم فيه طبعا

انا : فى اول صف ؟؟

حركات برضه

المايصه : ايوه يافندم .. لسه فيه.... تقريبا مافيش الا اول صف ب 300 جم

و الصفوف الاماميه ب 200 جم الباقى ابو 100 جم و 50 جم خلص خلاص

الله يحرقك ...ده انا باقول فى سرى

انا : طيب عموما ...هابقى اتصل تانى ....باى

********************************

انا : ماتيجى نروح ابو 200 وخلاص

مراتى : انت بتهرج يا شاور بلاش دلع

انا : يابنتى دى فرصه

مراتى : الحفلات جايه كتير

انا : طيب ...نستنى بقى اى حفله ليه فى الساقيه من ابو رخيص

**************************


بعد 3 ايام

انا : شفتى الاعلان اللى فى الاهرام ده

مراتى : اعلان ايه

انا : بيقولك ياستى ... ان احنا لو اشترينا من جاليريا سنتر حاجات ب 300 جم ...هايدونا تذاكر حفلة عمر خيرت ببلاش

مراتى : طب و احنا مالنا

انا : ايه اللى احنا مالنا ... نروح نشترى حاجات من هناك و ناخد التذاكر .. ..موجانان

هى : انت يابنى ايديك بتاكلك ...عايز تفرتك و خلاص

انا : ماهو اكيد هانلاقى حاجه محتاجينها ..و اهو نبقى ضربنا عصفورين بحجر

هى : ماشى لما نشوف

**************

رحنا جاليريا سنتر .......و لقينا الموضوع اخر مهرجان

و اعلانات الحفله فى كل حته ..و زينات عشان راس السنه ...و بابا نويل ادى للولد بالونه

و حاجه اخر ابتهاج

انا : بصى .. الكاونتر بتاع الحفله هناك اهه لما اروح اسأل

هى : اوك

**

انا : ياترى الاوفر بتاع تذاكر عمر خيرت لسه شغال ؟

الراجل : ايوه يافندم ... لغاية ليلة الحفله

انا : همممم ..... و ياترى التذاكر الهديه بقى فى انهى صف ؟

الراجل : فى الصفوف الاماميه طبعا يافندم

على فكره الراجل كان بيتكلم بمنتهى الذوق و الادب ..و بصراحه المكان كله كان على المستوى المتوقع

****

المهم رجعت لمراتى و ابتدينا نعمل الشوبنج الاجبارى ...و بعد اللف على المحلات اشترينا شوية حاجات ب 300 جم فعلا

يعنى ..... جينز ليا و شوية حاجات لابنى و كده

المهم خلصنا و توجهنا الى الكاونتر تانى علشان ناخذ الجايزه

**************

واحنا متجهين ناحية الكاونتر اكتشفت ان الراجل اللى انا سألته مشى و جه مكانه شاب حليوه كده ... و النظافه هاتنط منه حاجه كده زى احمد عز و العياذ بالله

انا : مين الواد الامور ده ..؟ امال فين الحاج اللى كان هنا

مراتى ( وهى فاتحه بقها : اه ...هو فعلا امور

انا : احترمى نفسك شويه

هى بغيظ : الله .... مش انت اللى بتقول ؟

انا : طب استنى هنا مع الولد و انا هاروحله

******

المهم رحت عند الشاب الحليوه و انا متآلط على الاخر و عاوج لسانى

انا : هاى جود ايفيننج

شبيه احمد عز : اهلا يافندم تحت امرك

.......انا : بخصوص تذاكر الحفله ...انا عملت المشتريات و

الشاب : ايوه ...تحت امرك ممكن اشوف الايصالات

برضه الواد كان فى منتهى الادب و التربيه وهو بيتكلم ...هى الناس دى مش ساكنه فى مصر ولا ايه !!!؟

انا بآلاطه و قرف : اتفضل

الولد اخد الايصالات منى .....وبص فيها وهو لسه مبتسم ... شويه و ابتدا وشه يحمر .. ويقلب فى الايصالات و كان باين عليه انه محرج او مكسوف من حاجه

انا و انا لسه متقمص شخصية عبود باشا : ايه ...فى حاجه ولا ايه ؟؟؟

الواد الحليوه : لا ...أأ ...بس ...حضرتك دى مشتريا ت ب 300 جم

!! انا : ايوه

الواد : بس الاوفر على المشتريات ب 3000 جنيه مش 300

طــــــــاخ

ده صوت الخبطه اللى جت على نافوخى

انا وانا اتجه الى نصف هدومى : ازاى كده ..الاعلان بيقول 300

الولد وهو محرج بجد : اسف يافندم .... الاعلان اهه و كمان البورشور بتاع الاوفر شوف حضرتك

نظرت و انا هايغمى عليا من الموقف ..و بالفعل كل حاجه فى الاعلان بتقول 3000 !!!!! امال انا جبت رقم تلتميه ده منين ؟؟

انا : أ..أأأ انا متأسف جدا ...انا مش عارف شفتها 300 ازاى ده انا قريت الاعلان اكتر من مره

طبعا كنت باكلمه و انا عباره عن قطعة غسيل لسه خارجه من الغساله الايديال بتاعة زمان - فاكرينها - و بصيت جمبى و اكتشفت ان مراتى و الولد كان واقفين من بدرى و الموضوع بقى بجلاجل

الولد و هو ينظر لنا بأحراج حقيقى : اسف مره تانيه يافندم ...اكيد حضرتك ماخدتش بالك

*************

انسحبنا من امام الشاب انا ومراتى و احنا زى السكرانين من كتر الاحراج و الكسوف ، و اللى زود الموضوع احراج ان الولد كان فى منتهى الذوق و الادب و كان محرج اكتر مننا

المهم ...قعدنا نلف انا و مراتى عشر دقايق فى المول و بعدين قررنا ان احنا نروح

انا : انا مش هاخرج من الباب اللى هناك ...انا مش ممكن ابص فى وش الولد بتاع الكاونتر تانى

مراتى : بس احنا راكنين هناك

انا : مش مشكله ... نخرج من اى باب و نمش شويه ...انما انا مش ممكن اخليه يشوفنى تانى

اقتنعت بكلامى ...و قعدنا نلف المول كله ان احنا نلاقى اى باب تانى ... ابدا

انا : يعنى ام المول ده كله مافيهوش الا الباب اللى هناك ...ده فقر ايه ده

هى و قد بدأت فى الضحك : خلاص بقى يلا نروح وخلاص انا تعبت

انا : امرى لله .. نخرج من الباب و نعمل نفسنا مش شايفينه ...هى يعنى البصه هاتلزق ...ماتبطلى ضحك يا ظريفه

هى وهى مسخسخه على الاخر : اصلك ماشفتش منظرك لما عرفت

انا : ها ها ها ...يا دمك

المهم توجهنا ناحية الباب الرئيسى عشان نمشى ..ووجدنا الشاب الحليوه واقف لسه على الكاونتر

انا : يخرب بيتك ...انت لسه مرزوع

عملنا نفسنا سياح و مشينا نتفرج على المحلات فى اتجاه الباب

و فجأه ...الواد شافنا و توجه بسرعه ناحيتنا و على وجهه نفس الابتسامه العسوله وكأنه كان مستنينا

مراتى : ايه ده هو عايز ايه تانى ؟ جاى علينا ليه ؟

انا -بقلق - : مش عارف ....يانهار اسود .... لاحسن يكون فاكر ان احنا كملنا مشتريات و جايين ناخد التذاكر ....يادى الكسفه الدوبل ياربى

**

الواد : اسف على الازعاج ... ممكن لحظه

انا -فى سرى - : ارغى يا عم الامور

الواد : انا بكرر اسفى على الموقف اللى حصل يافندم

يانهار اخضر ده هو اللى بيعتزر

انا : لأ مافيش حاجه

وفجأه دخل ايديه فى جيبه ...واخرج ظرف فى منتهى الشياكه

الواد : لو سمحت يافندم ،،، بأسم مسرح جاليريا ...ارجو انك تقبل مننا الاعتزار ده ...دول تذكرتين لحفلة عمر خيرت فى الصفوف الاماميه ...علشان نصلح الموقف ده

انا : بمففممفمفم فتفتفن .........نعم

الواد : ارجو انك تقبلها منى انت و المدام

نظرت لأجد مراتى تحولت الى اللون البرتقالى من كتر الاحرا ج

انا : مممقهقعق ........... شكرا

الواد : سهره سعيده انشاء الله ...استأذن حضرتك فى رقم تليفونك عشان تكون معانا فى الحفلات الجايه

وجدتها فرصه مناسبه ..واخرجت الكارت الخاص بى و اديتهوله ...عشان يتأكد ان احنا مش شحاتين

انا وقد استعدت مقدرتى على الكلام : انا متشكر جدا ... و اسف على سوء الفهم

الولد : لأ يافندم ماحصلش حاجه

*************

خرجت انا وزوجتى و جوانا احاسيس كتير .... مكسوفين و فرحانين .. و مستغربين ...و بنضحك بجنان .... و بردانين موت لأننا كنا فى شهر ديسمبر ....... و كمان فخورين ان البلد لسه فيها حاجه اسمها ذوق

و ابنى الصغير بيضحك على ضحكنا و هو مش فاهم حاجه

:)

ثم خطر لى خاطر بعد مادخلنا العربيه

انا : اوعى يابت يكون مقلب و الظرف مافيهوش حاجه

هى : يالهوى .... طب افتح بسرعه

و فتحت الظرف لأجد تذكرتين للحفل من فئة 300 جم

********************

" عمر خيرت مغمض العينين ...و هو يعزف مقطوعته الخالده ... "ليلة الفبض على فاطمه

جمهور الصفوف الاولى من حولنا من مشاهير الفن و الصحافه ... و الالماظات و الفوريرات زى الرز

الجماهير تتمايل من النشوه مع الانغام الساحره

وانا ومراتى - واحنا لابسين اشيك حاجه فى العيله - ننظر الى بعضنا و مازلنا نضحك بجنون

***********************

انا بعد الحفله : لأ ..وانا اللى كنت بادور على باب تانى عشان نخرج منه

هعهعهعهع ....هعهعهعهعهع

هعهعهعهعهع ....... هعهعهعهعهع

هذا الرجل

لا اعرف لماذا تسمرت فى مكانى عندما شاهدت هذا المنظر

لا اتذكر ما هى المناسبه

و لكن العائله بالكامل كانت مجتمعه فى منزل جدتى رحمها الله
:
و فى وسط الصخب الصادر من حديث الناس و صوت التليفزيون و صوت الشارع

كنت احمل فى يدى كوب من الشاى التقطته بصعوبه وسط هذه الحرب

و قررت ان اهرب الى حجرة الصالون

فوجدته هناك و تسمرت فى مكانى

و لم ادخل الى الغرفه

و لم اصدق عيناى

كان جالسا فى الصالون ... و ابنى يجلس على احدى قدميه

كان الطفل يضحك بجنون ... و الرجل يلعب معه

يلعب معه بحب شديد ...حب صافى خالص


يلعب معه و هو يضع على رأسه .....


طــرطــور

نعم طرطور خاص بالاطفال لزوم الحفله


قلت لنفسى و انا لا اصدق

يا الله .........اهذا هو ؟

اهذا هو الرجل الجبار الذى اعرفه ؟

!!!!!لكم تغير

اهذا هو ؟

الذى كان يتحدث معنا بحساب ...و يضحك بحساب !!؟

الذى كانت و مازالت الناس تحترمه و تهابه من اول مره تراه

الذى كانت العائله و حتى الجيران ...يحسبون له الف حساب

الذى كان يضرب اكثر مما يتكلم

!!!!!

تفرست فى ملامحه مره اخرى ..و انا لا اصدق مااراه

هذه السعاده التى تطل من عينيه

و هذه البراءه التى لا تقل عن براءة االطفال من حوله


*******
ثم دخلت ابنة اختى

الطفله الرقيقه ذات العامين

*

لنزيد دهشتى مما اراه ... و يتحول الرجل الى مهرج حقيقى

يلاعبهم و يلاعبونه .....و الجميع فى سعاده


:::::::

طوال عمرى مقتنع ان هذه الجديه الشديده ورائها اطيب و احن قلب

وكل هذه القسوه طوال السنوات الماضيه ...كانت من دافع الحب و القلق

لم يقصر فى حقنا ...لم يرفض لنا طلبا ... لم يدخر جهد لاسعادنا

كان بالفعل عطوفا حنونا و لكن بطريقته

طريقته التى للأسف لم افهمها فى وقتها

وفهمتها الان
الان

و هو يلبس الطرطور .... و يلاعب اولادنا

ولأول مره اقولها

و عيناى تدمع

اقولها فى سرى ..و لا اجرؤ ان اصرحها له

احبك يا أبـى

أحـبك

تاج من شيرمين

تاج من العزيزه شيرمين ......الله يسامحها بقى

:)

ملحوظه : انا هاجاوب على التاج ده اجابات حقيقية و صادقه

و مش هاغير الحقيقه علشان اجاوب اجابات نموذجيه علشان اؤثر فى اللى بيقرأ

بسم الله نبدأ

أحب شخص الى قلبك في الدنيا؟

هاحكيلكم على حلم حلمته من حوالى سته اشهر - قبل ما اسيب مصر - ..و بعدها هاتعرفوا اجابتى على السؤال ده :

الحلم عباره عن انى كنت سايق عربيتى باليل ... فى مكان غريب و موحش

كان معايا مراتى و اولادى فى العربيه

ابنى الكبير عنده 4 سنوات و قاعد على الكنبه ورا

و الصغير كان عنده وقتها 5 شهور و مربوط فى الكرسى بتاعه على الكنبه

المهم انى وانا سايق ..لقيت الطريق انتهى و اصبح النيل قدامى فجأه

!!و مافيش غير لوح رفيع جدا يادوب يكفى العربيه ..علشان اعدى الناحيه الثانيه

المهم اتحركت بالعربيه بالعافيه فوق اللوح علشان نعدى

و فجأه

اختل توازن السياره و سقطت فى النيل

طبعا السياره بدات تغوص ..و تغوص ....

بدون تفكير امتدت يدى الى حزام الامان عشان افكه

و لكنى نظرت حولى داخل السياره

لقيت مراتى جنبى و هى مبتعرفش تعوم

ابنى الكبير مش بيعرف يعوم طبعا ... و اكيد المخلوق التانى ابو 5 شهور مابيعومش هو راخر

و انا الوحيد اللى ممكن انقذ نفسى ...و انقذ واحد منهم معايا

!!!!!!!!

عارفين عملت ايه

؟؟؟

فضلت ابصلهم و احنا كلنا مسروعين و مش عارف اعمل ايه

و فى الاخر قررت

انى مش هافك الحزام ...و مش هاخرج من العربيه

و قررت انى اموت معاهم

لانى ببساطه ماعرفتش ارد على السؤال

انا بحب مين فيهم اكتر ؟؟؟؟

إنسان مستعد تضحي بحياتك _ركز في كلمة حياتك_عشانه؟

راجع الاجابه السابقه

إنسان كرهته لدرجة الجنون و تمنيت لو تمسك سكينة و تنقض عليه و تغرزها في قلبه تقتله و تقف تبص على جثته و تشفي غليل قلبك؟

واحده خانتنى ...... زماااااااااااااان ... ايام الهبل

بس لما بافتكر الفيلم ده باقعد اضحك ضحك ...و لو شفتها دلوقتى هاديها هديه محترمه ...لانها كانت السبب ان حياتى تتغير و لله الحمد للأحسن دائما

:)

ما هو إسم أجمل كتاب كتبه بشرقرأته و محتفظ به حتى الآن؟

انبياء الله لاحمد بهجت

إسم كتاب_كتبه بشر برضه_إنت متعلق بيه و بتقراه كل فترة؟

نفس الكتاب

أهم جهاز منزلي متعلق بيه أوبتستخدمه كتير؟

الراديو ...بس ايام ما كنت فى مصر

شىء تحس بالراحة النفسية عندما تنظر إليه؟

الكعبه

مكان تحس فيه بالحنين إلى شىء لا تدري ما هو و ذكريات جارفة إلى لا شىء؟

و سط البلد - القاهره

مكان تحس بالراحة عندما تدخله؟

منزل جدتى رحمها الله بشبرا

أجمل مدينة زرتها داخل مصر؟

هاجاوب الاجابه الشعبيه

الاسكندريه

:)

شخصية كرتونية تحبها؟

عم دهب ..

:)

و كنت باموت فى القصص بتاعته لما كان بيجرجر بطوط و العيال معاه و يروحوا يدوروا على كنز فى البحر

هههههههههههههه

نوع هاتفك المحمول؟

Nokia N 70

بقاله معايا سنه و زهقت من امه

قولولى اغيره و اجيب ايه ؟

Apple i phone

ولا

Nokia E 90

اصلهم هاينزلوا السوق قريب و انا محتار

سرعة بروسيسور جهازك؟

1.8 GHZ

ذاكرة _هارد_جهازك؟

60 G

المساحة التي تشغلها المساحة الاسلامية على جهازك؟

الله اعلم

نفس الاجابة السالف ذكرها في قلبك_الاجابة لنفسك عشان الرياء يا اخوانا؟

الله اعلم

أهم هدف انت واضعه لحياتك الآن؟

اكمل الماجستير و اثبت نفسى فى الشغل الجديد و اربى و لادى و اعلمهم كويس

مواصفات فتى الاحلام بالنسبة لي؟

قصدك فتاة الاحلام ؟

الحمد لله ربنا رزقنى بزوجه رائعه ..... لم تجرؤ الاحلام على معرفتها بعد

شعورك لما بتسمع كلمة مصر؟

دلوقتى و انا فى الغربه طبعا هاموت و ارجعلها

بس عموما ... باحس ان ربنا ابتلاها و ان مصر بجد ملعونه لعنه ابديه

الابتلاء و اللعنه اسمهم

المصــــــــريين

شعورك لما بتسمع كلام عن اليهود؟

اه .... كده هانزعل من بعض لانى مش هاقول الكلمتين اللى انتوا عايزينهم

!!!!!!!!!!!!!!

بما ان كل شغلى فى البيزنس فاليهود هم اعظم رجال اعمال فى العالم . ... و ده طبعا فى المطلق بغض النظر عن انهم يهود

و بما انى بنى ادم متحضر و مثقف - ايون مثقف :) - فانا بالنسبه لى اليهود مخلوقات الله زينا و فيهم الكويس المؤمن اللى هايخش الجنه زي الكويسين مننا و فيه الضايع اللى هايروح فى داهيه زى الكتير مننا برضه

اللى انتوا بتسألوا عليهم اسمهم الصهاينه ... و برضه هاقول انى شايف انهم بيعملوا اللى فى مصلحتهم ...صحيح هما و لاد ستين كلب و عايزين 100 هتلر يولع فيهم بجاز

بس ارجع و اقول انهم بيشتغلوا لمصلحتهم و مصلحة شعبهم ...مش فى الاحتلال و الكلام بتاع النشره بس .. لكن فى التعليم و الزراعه و الفن و الطب و كل مجالات الحياه بتاعة البنى ادمين اللى بجد

احنا بقى يا كتاكيت عملنا ايه ... عملنا كل حاجه لمصلحتهم برضه و ضد مصلحتنا و ماشاء الله بنجرى بسرعة الصاروخ ....الى الخلف

يبقى هما برافو عليهم ...و احنا برضه رايحين فى داهيه ...أأ... قصدى غورنا فى داهيه من زمن

:)

شعورك لما بتشوف ضابط شرطة؟

لو محترم باحترمه اضعاف اضعاف لأنه فعلا حاجه مهمه جدا لينا كلنا ... و با ساعده على قد ماقدر ...و لو واحد من اياهم باقول ربنا يكفينا شرك

و للأسف ..انا بعد ما جيت هنا دبى عرفت لأول مره فى حياتى - بعد 32 سنه عمر يا بشر - ان جملة الشرطه فى خدمة الشعب موجوده فى الحقيقه مش يافطه على الحيط

شعورك لما بتشوف الكناس العجوز في الطريق؟

قصدكوا الشحات العجوز اللى فى الشارع ...لأن مصر مافيهاش كناسين

أفكارك تجاه شاب ماشي في الطريق يلبس جلابية بيضاء قصيرة و عمامة و له لحية و بجيبه السواك و في يده المصحف؟

لو نزود كمان انه متدين بجد ..و لوجه الله ... يبقى شعورى ناحيته انى باحسده و باتمنى اكون نصفه

انما لو كل دى حركات عشان اى اغراض تانيه ..يبقى انا مش فاضى افكر فيه

إحساس يراودك في اشارة مرور مغلقة بسبب مسئول كبير؟

احساس قليل الادب

ههههههههههههههههههه

********************

الف شكر ياشيرمين على التاج ...و انك فكرتى فيا

:)

دعواتكم

باعتزر لكل الاصدقاء و الصديقات على التأخير

و لكن انا بجد عندى ظروف صعبه جدا

و احد من اعز اصدقائى حالته حرجه جدا و بيعمل عمليه خطيره فى الرئه

هو عايش هنا فى دبى ...بس ربنا اراد انه يتعب فجأه بعد ما مراته و ولاده نزلوا مصر اجازه

:

و هو طبعا دلوقتى معاه ربنا و احنا و بس

فطبعا مش قادرين نسيبه ...... و واقفين جنبه باستمرار

هو من سنى بالظبط و اولاده فى سن ولادى ..و انا وهو اصحاب من عشر سنين

و الموضوع ده ظهر عنده فجأه

:(

ارجو لكل من يقرأ هذا الكلام ان يدعوا له بالشفاء

و ان يحمد الله على نعمه الكثيره وبالذات نعمة الصحه

اللهم اشفيه هو و جميع مرضى المسلمين ياكريم

اللهم لك الحمد حمدا كثيرا ..كما ينبغى لجلال وجهك الكريم و عظيم سلطانك

:

:

امــــين

****************

وحشتونى جدا ..و انشاءالله هاكون معاكوا قريب

متى ؟

متى ...؟

متى احبها .... ؟

حينما تأكد انها تحبه ؟

لا

حينما بكت ...عندما هددها بالفراق ؟

لا

حينما تزوجها .. .و وجد عينيها تقول : سوف احبك للأبد ؟

لا

متى احبها اذن ؟

حينما وجدها زوجة مثاليه ... كما كانت محبة مثاليه ؟

لا

حينما قالت له ... انها ستنجب له طفلهما الاول ... و عيناها تقول بسعاده : بداخلى قطعة منك ؟

لا

حينما كان يخونها اكثر من مره ... بدون اى سبب .... بدون اى تقصير منها ... فقط لانه خائن ؟

لا

متى اذن ؟

حينما انجبت طفلتهم الاولى .... و عيناها تقول له .... هذه هديتى اليك ؟

لا

حينما كان يكذب عليها ...و يقول لها : و انا ايضا احبك ؟

لا

:

حينما جاءه خبر مرضها اللعين ؟

حينما عرف ان امامها ستة اشهر فقط ؟

حينما كانت تنظر اليه وعيناها تقول .... لم يمهلنى القدر ....لن استطيع ان اجعلك تحبنى

!!!!!!!!!!!!!!!

لا ....لا ....لا

متى اذن ؟

متى اذن ؟

الان

الان فقط عرفت كم احبك

و كم كنت دوما احبك

:

الان و انا انفض غبار قبرك من على ملابسى

:

هل ستســامحينى ؟

:

و لكن متى ؟

متى ستسامحينى ؟

******************

متى اذن ؟

Romantic Post

لكى تحب امرأه فعلا

لكى تفهمها

:

يجب ان تعرفها من اعماقها

تستمع لكل افكارها

و ترى كل احلامها

و تعطيها اجنحه حينما تريد الطيران

عندئذ .....حينما تجد نفسك ترقد بدون حيله ..بين زراعيها

ستعرف حقا انك تحب امرأه

:

عندما تحب امرأه .... قل لها كم هى مرغوبه

عندما تحب امرأه ... قل لها انه لا يوجد سواها

فهى بحاجة الى احد ليخبرها ...ان هذا سوف يدوم الى الابد

و الان قل لى ...هل انت حقا .....حقا ...احببت امرأه من قبل ؟؟

*********************************************

*********************************************

لكى تحب امرأه فعلا

اجعلها تضمك

و تخبرك كم هى الان تحتاج للمستك

:

يجب ان تتنفسها

يجب ان تتذوقها

حتى تشعر بها تجرى فى عروقك

:

و عندما ترى اطفالك الذى لم يولدوا فى عينيها

ستعرف حقا انك تحب امرأه

**************************

يجب ان تخلص لها

و تضمها بحنان

و تعاملها كما ينبغى

و ستكون دائما هنا من اجلك

لترعاك

يجب عليك ان تعرف حقا كيف تحب امرأتك

=======================================

=======================================

ده بوست رومانتيكى عشان افك التوتر بتاع القصه اللى فاتت

:)

دى ترجمة اغنيه للمطرب الانجليزى

Bryan Adams

و اسمها

HAVE YOU EVER REALLY LOVED A WOMAN

الاغنيه ليا معاها ذكريات حلوه قوى ... و دلوقت اتفاجئت ان الترجمه العربى بتاعتها تنفع زجل هايل

فا قلت نتشارك فيه

تحياتى

:

اسف جدا انى متأخر عليكوا ...بس و الله مشغول مووووووووت ..بس انا دايما متابع و قريب هاكون معاكوا

مرآه الحمـــام ... Shower Mirror

لقراءة الجزء الاول " تفريغ الذاكره " اضغط هنا
لقراءة الجزء الثانى " ماذا فعلت ؟ " اضغط هنا

لقراءة الجزء الثالث " رساله بدون اسم ..." اضغط هنا

************************************************

صامت و انتم تكلمونى

اعرفكم جيدا ... و لا تعرفونى

اسراركم ...تأتمنونى

و عيوبكم ...لا تخفونى

انه انــــا

انـا

:

مرآة الحمـــــــام

************************

انهت رشا حمامها

ووقفت امام مرآة الحمــــام

تمسحها من البخار المتكثف

ليظهر وجهها

و تبدأ فى تصفيف شعرها الاشقر

و

و توقفت

و نظرت الى وجهها .... و كأنها تراه لأول مره

و تحولت نظرتها الى القرف الشديد

وتمتمت

!!!!!! بــــــــاكرهك

:

.......بــــــــــــاكرهك يا سافله

:

عمرك ماهاتنضفى ... ابدا

:

:

شفتى اخرة عمايلك .....شفتى

يارب تتفضحى ...و تروحىفى ستين داهيه

وده ذنب جوزك ... المسكين

كانت تتحدث بكره شديد و كأنها تتحدث الى الد اعدائها

و بدأت عيناها تدمع

خلاص يارشا .....

ربنا اداكى فرص كتير..... كتـــير اوى

ثم اعطت ظهرها للمرآه ...... و اكملت تصفيف شعرها

*******************

اسمك و سنك و عنوانك ...؟

عزت محمد عطا.... 34 سنه ..... مساكن الشباب - 6 اكتوبر

اتكلم ياعزت .... احكى على اللى شفته

سعادتك ياباشا ... انا سواق المستشار رائف باشا من 4 سنين

و انا سعادتك افهمها و هى طايره ... باشم الخطر من على بعد

......سعادتك حتى اسأل المست

انت رغاى ليه ياجدع انت ؟؟ ماتتكلم على قد السؤال ..انت هاتحكى قصة حياتك

انكمش عزت.... و لاول مره يجف من اللزوجه

سعادتك يابيه ..انا و الفنى بتاع الدش كنا و اقفين على السطوح

و بعدين يابيه انا اخدت بالى من الدم ....اصلى لماح من صغرى سعادتك و الحاجات دى ماتعديش عليا

ماتخلص يابنى ادم انت... ..ده انت رزل صحيح

حاضر سعادتك ....شفنا الدم خارج من باب الاوضه

فكسرنا الباب عشان نشوف فى ايه

و لقينا الاوضه ريحتها صعبه اوى سعادتك .... و الحفار مرمى على وشه و غرقان دم

............انا بقى قلت للفنى بتاع الدش سعادتك

خلاص ...خلصنا ....عندك اقوال تانيه

لا سعادتك

طب اتفضل امضى ....و ماتسافرش الا لما تدينا خبر

طب سعادتك انا متعود اروح الاسماعيليه كل جمعه ... ...و يك اند يعنى

غور يابارد من خلقتى ..بدل مالبسك مصيبه

غـــــــــــــور

*****************************

انت شكلك تعبان بجد ياحبيبى

مالك بس ...بقالك يومين مش بتروح الشغل

قالت رشا لمصطفى ...الذى يجلس على طرف السرير معطيها ظهره

امبارح خرجت من الحمام لقيتك نمت ...مارضيتش اصحيك

انا كويس يارشا ...البسى انتى و انزلى ...عشان شغلك

طب انت مش عايز حاجه اعملهالك قبل ما انزل .....

نظر اليها طويلا

ثم قال ...

.شكرا

******************************

ظل مصطفى على جلسته ...بعد خروج رشا

انه يكاد ان يجن الان .... الموقف اصبح فى غاية الغموض

الرؤيا - المسدس - رشا .... الرساله

ثم تذكر ...الرساله

و اختطف هاتفه من جوار السرير

كان قد ارسل الرساله من هاتف رشا لهاتفه ...بعد ان قرأها ...قبل ان يمسحها

الرساله التى وجدها بالامس ...الرساله التى ارسلت من رقم غير معلوم

و غالبا مايحدث ذلك للرسائل المرسله من دوله اخرى

:الرساله التى تقول

انا مش فاهم انتى مابترديش عليا ليه .... اللى عملته ده كان عشانك ...... انتى اللى طلبتى منى اتصرف ... مع ان الموضوع مش غلطتى لوحدى

اربع سنوات و هو يعاشر تلك المرأه .....كيف لم يكتشف .......كيف

رساله بدون اسم .......اذن هى من خارج مصر

رساله بدون اسم .......اذن هى من خارج مصر

تردد هذا الخاطر فى ذهنه ..... اكثر من مره .... و هو ينظر فى هاتفه و يفكر

و يفكر

ثم طلب رقم

و ردت عليه عاملة الهاتف

شركة ميلينيوم تكنولوجى ... تحت امرك يا فندم

: حاول مصطفى ان يسيطر على صوته و قال

من فضلك ..احنا مطار القاهره الدولى

احنا لقينا شنطه مفقوده من حد سافر من كام يوم ...... الاسم اللى عليها مش واضح....... بس اسم شركتكم مكتوب عليها

ياترى فى حد سافر من عندكم قريب ؟؟؟

تقريبا مافيش غير مستر ممدوح.......صاحب الشركه .... سافر من اربع ايام

ثانيه واحده احولك لسكرتيرته

!!!!!!اسمها مدام رشا

:::::::::::::::::::::::::::::::::::::::::::::::::::::::::::::::::::::::::

واغلق مصطفى الخط ......... .لم يكن يحلم ان يعرف اكثر من هذا

**********************************

: المكان

سطح البنايه 104 الحى المتميز - 6اكتوبر

: الزمان

التاسعه صباحا

المتواجدين

الرائد : محمد الصناديلى - المباحث الجنائيه

السيد : حسام غبريال - رئيس نيابة اكتوبر

و مجموعه من رجال المباحث و النيابه

الدماء تملأ ارض الغرفه المتواضعه بعد رفع الجثه

صوت فلاش كاميرات رجال البحث الجنائى

انا شايف ان الطلقه انضربت من مكان قريب جدا

قال الرائد محمد لحسام و هو يشير الى مكان الجثه على الارض و المخطط بالطبشور الابيض

و ده طبعا باين من طريقة وقوع القتيل على الارض و من تهتك الجلد مكان دخول الطلقه فى الجسم

هات الفارغ يابنى

اتى احد المجندين بكيس بلاستيك صغير ..و اعطاه لمحمد الذى قال

بص ياحسام بيه ... فارغ تسعه مللى

هممممم .... تمام

رد حسام و هو يركز فى كلامه

الجانى ماهتمش انه ياخد الفارغ معاه قبل مايمشى

و ده يدل انه مش محترف و كان خايف جدا

تانى حاجه ياباشا ...قال و هو يقرب الكيس من وجه حسام

لو بصيت على قوة الضربه بتاعة الابره على الفارغ ... هاتلاحظ ان الضربه شديده و غائره جوه الفارغ

و طبعا ده يدل ان الطلقه انضربت من طبنجه جديده

و ده برضه يدل على ان القاتل مش محترف ..و غالبا استخدم طبنجه منزليه قليلة الاستخدام

بس ازاى الجيران ماسمعوش صوت الطلقه

تسائل حسام

انا اقولك ......تقريبا انا عرفت السبب

و اشار الى تلفزيون صغير موضوع على منضده بجانب الغرفه

التلفزيون لو تلاحظ سعادتك كان مقفول بس ... لو بصيت على السويتش بتاع الصوت هاتلاقيه مرفوع على الاخر

و قام بتشغيل التليفزيون ...ليخرج صوته مدويا يصم الاذان ......فاغلقه ثانيا

الحمد لله يا محمد ان الراجل ماعندوش تليفزيون ديجيتال ...ماكنتش هاتشوف السويتش

ضحك الاثنين ..ضحكه قصيره

: يا حسام بيه انا تصورى عن اللى حصل كالتالى

فيه حد خبط على الباب .... حد يعرفه ابراهيم الحفار كويس ..و ده لان الباب مفتوح من الداخل و بدون اثار عنف

ثم بدأ الرائد محمد يتحرك فى الغرفه بحماس... و هو يشرح

و بعدين سعادتك ..هو فتحله الباب كده

و اداله ظهره علشان يدخل الغرفه تانى

فقام القاتل برفع صوت التليفزيون

و اخرج مسدسه و اطلق عليه النار من ظهره .....

الطلقه جت فى وسط الظهر تقريبا ...و ده برضه يدل ان القاتل مش محترف

لان المنطقه دى مش المفروض تموت ... بس الحفار غالبا مات من النزيف الحاد

لان القاتل بعد ماخلص ...قفل الباب من الخارج بالقفل ... و ده اللى خلى الناس ماتشكش ان فى حد جوه

ايه يا عم محمد ...حيلك..... سيب حاجه للجماعه بتوع الطب الشرعى و بتوع البحث الجنائى

اصل زى مانت شايف العمليه بسيطه

هههههههه

سيبهم هما يشوفوا شغلهم .... و انت شوف شغلك و اعرفلنا الجانى

انا هاكلفك ببدء التحريات

...........ابتدت سعادتك خلاص من ساعه و

تمام يافندم

خير يا امين مجدى انت مش شايفنى باتكلم

قال بحزم لامين الشرطه الذى دخل الغرفه مسرعا

معلش ياباشا ...فيه و احد بره عايز يدخل و يكلم سعادتك ...و مش راضى يصبر

مين ده

انا ياباشا

رد شخص اسمر نحيف ... و هو يدخل من باب الغرفه ...و تبدو عليه علامات الاسى

انت مين يا جدع انت

اسمى محمود يا باشا ...انا بواب العماره اللى جنب دى ....... و صاحب ابراهيم الحفار من ساعة ماجه المنطقه

و عايز ايه يا محمود

انا عارف مين اللى قتل الحفار ياباشا

!!!!!!!!!!!!!!!

********************************

ممدوح ....ازيك

رشا حبيبتى ..اخيرا كلمتينى

و لا مره سمعت صوتك ....و اخر رساله مرديتيش عليها

انا رديت عليها ... من يومين

يومين ايه ...انا باتكلم علي الرساله بتاعة امبارح .......كنت باشرحلك انا ليه عملت كده

لا ماوصلتنيش

غريـــبه

المهم المطار اتكلم و بيقول لقوا الشنطه

شنطة ايه ؟؟؟؟؟

الشنطه بتاعتك اللى ضاعت

انا شنطى كلها معايا ...مافيش حاجه ضاعت

...................................

رشا ماببترديش ليه ؟

الو رشا انتى لسه معايا ؟؟

لم تكن رشا معه فى الواقع ...فقد كانت تبحث فى هاتفها عن الرساله

اوك يا ممدوح ...باى دلوقت

قوليلى ايه الاخبار ...عندك ؟

حد عرف حاجه ؟؟

مشعارفه ...بس واضح انهم اكتشفوا الموضوع ...العماره كان قيها بوليس النهارده

ممدوح انا بجد خايفه ...

ماتخافيش ياروحى ... انتى بس اعملى اللى اتفقنا عليه

مش قادره يا ممدوح ... بجد مش قادره

ما هو مافيش حل الا كده .....لازم تخليه يطلقك .... و بعدين هاعملك توكيل و تصفى الشركه ..و تجيلى هنا باريس

هو ده الحل الوحيد

ماشى يا ممدوح ...خد بالك انت من نفسك

باى يا روحى

اغلقت رشا الخط ...و فى عقلها تتردد جمله و احده

مصــطفى عرف

******************************************

ها يامحمود كمل كلامك

كنا سهرانين مع بعض زى كل ليله ياباشا ... و بعدين ال .... الجوزه لعبت بدماغ ابراهيم حبتين

الجوزه بس يا محمود .....؟

اه و شرفك ياباشا

طب كمل ... و هاطنش بمزاجى

المهم سعادتك ..بعد ماالكل روح ...فضلت قاعد انا و هو ،،و حكالى على اللى شافه

شاف و احده من سكان المنطقه .... و هى فى وضع مش و الا بد - استغفر الله العظيم - مع و احد غريب

غيرجوزها

و شافها فين ؟؟

عند النادى سعادتك كانوا فى عربيته ......و كانت راكبه معاه لما شافهم

و بعدين نزلت من العربيه و اخدت عربيتها و روحت

و كانت العربيه مرسيدس حمرامكشوفه ......زى بتوع السيما

المهم سعادتك هو طلع غشيم فى حاجه ..... انه راح قالها انه شافها ... و طلب منها فلوس..بس هو ما قاليش مين هى و لا مين جوزها

ها ...كمل

المهم سعادتك ...انه من كام يوم ... انا كنت باجيب حاجات من على الشارع العمومى

لقيت عربيه مرسيدس حمرا زى اللى حكالى عليها ابراهيم

بس كانت و اقفه بعيد عن المنطقه شويه

و قفت اتفرج عليها ...

و افتكرت كلام ابراهيم

و بعدين لقيت و احد جاى بسرعه ...و شكله كده زى مايكون عامل عمله

ركب العربيه بسرعه ...و خدها و جرى

انا حفظت نمرة العربيه سعادتك ....زى مايكون قلبى حاسس

و جيت هنا عشان اشوف الحكايه مع ابراهيم ... بس الباب كان مقفول بالقفل

كتب الرائد محمد الرقم بسرعه ...و اعطى الورقه لاحد معاونيه

المرور يا حازم بسرعه

محمود .... انا عايزك تهدا و تقعد كده .... و تحكيلى اللى انت قلته ده تانى من الاول

و احده ...واحده

قال الرائد محمد و هو يخرج سيجاره من علبته ...و يعطيها لمحمود

********************************************

المكان : منزل مصطفى - غرفة السفره

الزمان : بعد الاحداث بعشرة ايام

المتواجدون : مصطفى و رشا و كريمه تضع الطعام امامهم

!!!!!! الحوار : صمت تام

مافيش اخبار ياكريمه عن اللى قتل الحفار ... ؟؟؟

قال مصطفى فجأه و هو ينظر الى رشا التى وضعت و جهها فى الطبق

لأ يابيه .... عزت بيقول ..أ أ....قصدى سواق رائف باشا اللى فوقينا بيقول :انهم لسه بيدوروا على الراجل ابو عربيه حمرا .... علشان النمره اللى كانت على العربيه طلعت مسروقه من عربيه تانيه و مش لاقيين العربيه الحمرا لحد دلوقت

بس اكيد هايجيبوه بعد مايعرفوا مين اللى كانت معاه ...الله يسامحها بقى

بطلى رغى شويه ...و غورى روحى المطبخ

كان هذا صوت صراخ رشـــا

و لم تستطيع ان تخفى ايديها المرتعشه عن عيون مصطفى

***************************************

رشا انتى بتهرجى

مش قادره يا ممدوح مش نافع

يعنى ايه مش نافع ...انا مش هاعيش هربان كده لوحدى انت لازم تجيلى و نتجوز زى مااتفقنا

رشا انا قتلت بنى ادم عشانك

انا ماقلتلكش اقتل ... و بعدين واضح انى كنت فاهمه غلط

مصطفى ماعرفش حاجه ...و انا و هو ابتدينا نعيش طبيعى زى الاول الموضوع فات عليه 3 شهور اهه و الامور قربت تبقى تمام

يعنى ايه

يعنى يا ممدوح خلاص انسى الفتره دىوانسانى و انا كمان هانساك.... انا ست متجوزه و لازم احافظ على بيتى بقى

........ متجوزه و بيتك ...اه يا بنت الكلب يا

كان لازم تعرف من زمان انى .......... سلام يا ممدوح

و اقفلت رشا الخط

و على وجهها ابتسامة عاهره فعلا

عاهره تخلصت لتوها من زبون ثقيل الظل

***********************************************

الزمان : ثمانية اشهر من عيد ميلا د رشا

ثمانية اشهر و يوم من مقتل الحفار

المكان منزل مصطفى

امام مرآ ة الحمام

انا خائف

يقول مصطفى و هو يحدق فى المرآه

يقف امامها مشدوها

:

و فى يده مسدسه

وتحت اقدامه ترقد جثه على وجهها

:

و الحمام ملئ بالدماء

!!!!!!!!!!!!!!!!!!!!!!

اليس هكذا بدأ كل شئ

اليس هذا هو مارآه و هو يفرغ ذاكرته اول مره

نظر الى الجثه

جثة رشــــــا

و اطال النظر

و هو ثابت مكانه كتمثال من حجر

:

وارتفع صوته عاليا

عاليا

يضحك بجنون

يضحك و يضحك و يضحك

و فى عقله تتردد كلمات رنانه سمعها على مدار اربع سنوات

تدوى فى عقله و يتردد صداها بين جنباته

كلمات يتذكرها الان فقط

:

و انا كمان بحبك

:

زوجتك نفسى على سنة الله و رسوله

:

لازم اعرفك على مستر ممدوح المدير بتاعى ده حد جميل بجد

:

انا خارجه مش هاتأخر...... انا مع زمايلى ماتخفش

:

لو ماكنتش باحبك ماكنتش عملت كلمة السر بتاعة الخزنه يوم عيد ميلادك يا حبيبتى

:

اما يا ابيه مصطفى انا عندى حتة برنامج خطير ..... ممكن تعرف تطلع بيه كل الرسائل اللى اتمسحت من على التليفون تانى

:

مستر ممدوح هاجر و قفل الشركه ...انا هافضالك ياروحى

:

.......الو...بوليس النجده ياريت تيجوا بسرعه انا هاقتل مراتى ... خد العنوان

::::::::::::::::::::::::::::::::::::::::::::::::::::::::

لم يلحق به ظابط الشرطه

فقط سمعوا صوت اطلاق الرصاص و هم على السلالم

و حينما دخلوا

و جدوا الحمام غارق فى الدماء

:

و على الارض ترقد رشــا على وجهها كما هى

و بجوارها

يرقد مصطفى ....و المسدس مازال فى فمه

و اجزاء مخه تطايرت فى كل مكان

!!!!!!

::::::::::::::::::::::::::::::::::::::::::::::::::::::::

!!!!!و قف ظابط النجده و هو ينظر لى ...و كأنه يسألنى ماذا حدث

و لكنى لا استطيع ان اخبره

:

فانا لا ابوح الاسرار ابدا

و لا اتحدث مع احد

انا ...اســـمع فقط

!!

الا تعرفون من انا ؟

:

انا الذى احكى لكم هذه القصه

و ساحكى للاخرين قصتكم

انا

::

مرآة الحمــــام

*****************************
بسم الله الرحمن الرحيم
و من يتق الله يجـعل له مخرجا
صدق الله العظيم
........................................................

النهـــــــــــــــــــــــــــايه