Sunday, April 15, 2007

ماذا فعلت .... ؟


لقراءة الجزء الاول " تفريغ الذاكره " اضغطّّ هنا

**************************************

مصطفى ... قوم الساعه بقت سبعه و نص

انا مش نازل يارشا ... رد عليها بدون ان يخرج رأسه من تحت الغطاء

!!!!! ليه ...؟ مالك

رشا انا لسه مانمتش من امبارح ..... مش هاروح الشغل النهارده

اه صحيح ...مش هاتقولى على الكابوس

قالت و هى تحاول انتزاع الغطاء من على وجهه

و هالها منظر عينيه ...!!! التى انتفخت و تورمت من عدم النوم

هه .... لا مش فاكر ....اهو كابوس و خلاص

نظرت اليه طويلا دون ان ترد

انها تعرف زوجها جيدا ...و الان هى متأكده انه ليس على مايرام

طيب انا هامشى ...هابقى اطمن عليك بالتليفون
*******************

استمع الى خطواتها تبتعد و انتظر الى ان سمع باب البيت يغلق

و

انتفض و اقفا ... دب فيه النشاط فجأه

وأخذت عيناه تدور فى الغرفه كمن يبحث عن شئ

و ذهب الى غرفة الملابس ... و فتح احد الادراج لتظهر الخزنه الالكترونيه الصغيره

داعب ارقامها فى سرعه

و فتحها ....... و

و التقط مسدسه منها

****************************************************

ناقص طلقه

قال مصطفى بذهول ..بعد ان فرغ من عد طلقات المسدس

المسدس الذى لم يستعمله يوما

المسدس المرخص الذى اهداه له صديقه اشرف ... مقدم الشرطه عندما اخبره انه سوف ينتقل الى شقته الجديده فى 6 اكتوبر

و التى كانت تبعد عن العمران وقتها - حوالى 10 دقائق- و لم يستخدمه

ابــــــــــدا

فتح غرفة الغاز بالمسدس بحذر .... و قربه من انفه

!!!!!! و ابتعد بسرعه ...بعد ان ملأت رائحة البارود انفه

يبقى الطلقه مش ضايعه .... قال لنفسه

الطلقه انضربت من الطبنجه ..............

******************************************

لم يستطيع مصطفى ان يخرج تلك الصوره من ذهنه

الصوره التى رآها بالامس ..و هو يفرغ ذاكرته

لم تكن تلك المره مثل كل مره

هذه المره كانت المشاهد حيه ..... ليست صوت و صوره فقط ...و لكن حيه بكل ماتحمل الكلمه من معان

فقد احس بأنه يعيش هذه اللحظه ....و هذا هو ما ارعبه لهذا الحد

تخيل انك انتقلت فجأه الى مكان اخر ... لتعيش و تحس هذه الرؤيا المرعبه

فقد كان فى غرفه صغيره

وعلى ارضها يرقد شخص على وجهه

و

غارقا فى دمائه

كان ينظر اليه بلا خوف ...و لا دهشه

و اقفا عند باب الغرفه ...ممسكا بمسدسه

**********************************

انه يكاد يقسم انه يعرف هذا الشخص .... مع انه لم يرى وجهه

و لكنه يعرفه ...و يعرف المكان جيدا

بس هو مين .... و فين المكان ده

سأل نفسه ...و هو يكاد ان يجن

ايه اللى انا فيه ده ....ده و الا الافلام ؟؟؟؟

***********************************

ابراهيم ...... انت يابنى أدم ...صرخ مصطفى و هو يقف خارج العماره

اوامرك يابيه ..... رد عليه محمود بواب العماره المجاوره

امال ابراهيم السايس فين ؟؟؟

ده ماحدش شافه من امبارح يابيه ..... انا هانضف لحضرتك العربيه

شكــــــــرا

راقبه مصطفى وهو ينظف السياره ...و هو يستعجب من اختفاء ابراهيم

ابراهيم ..السايس الاعرج الذى ظهر فجأه فى المنطقه منذ عدة سنوات

و الذى يصحو من الفجر يوميا ... و يغسل سيارات المنطقه كلها

قبل ان يصحو اول ساكن من نومه

و بعد ذلك يكون متواجد فى المنطقه .... يقوم بأى عمل لأى احد من السكان يحتاجه

و هو معروف بين بوابين المنطقه ..بأبراهيم الحفار

حيث انه يعرف اخبار سكان الحى بالكامل ... و لا يعرف احد من اين يأتى بها

و حين سألوه مره

انت بتجيب الاخبار دى منين ياعم ابراهيم
قال و هو منهمك فى تدخين الجوزه .....باحفر و اجيبها من تحت الارض

و انفجر و من حوله فى الضحك

و من يوميها .... صار اسمه ابراهيم الحفار

ده حتى يابيه كان مواعدنا يسهر معانا امبارح زى كل ليله ...بس ماظهرش بردك

و لم يقول له محمود ان ابراهيم الحفار كان وعدهم انه سيأتى الليله و معاه خبر جديد

خبر طازه على حد تعبيره

خبر


عن احدى ساكنات الحى

****************************************
وصل مصطفى الى مقهاه المفضل فى منطقة المهندسين

و طلب قهوته و اخذ ينظر للناس من حوله

وهو لا يستطيع التخلص من افكاره و من ليلة امس

::::::::::::::

و فجأه وقعت عيناه على الطاوله التى امامه ... و عليها لافته صغيره تقول

" الانترنت اللاسلكى ...متوافر هنا "

و بدون تردد ذهب الى سيارته .... و عاد و معه حقيبه جلديه كبيره

واخرج منها الكمبيوتر المحمول الخاص به

و بدأ فى البحث على الانترنت

حاول ان يعبرعن هذا الذى يراه وهو ينام
و يبحث عن اى شئ ...اى شئ له علاقه به

و اخذ يبحث.... و يبحث .... و يبحث

الى ان احس بالملل ... و هم بالخروج من محرك البحث

الى ان وجد احد نتائج البحث .لفت نظره . وفتح الرابط و احس بارتياح عندما

: قرأ مايلى

رد الدكتور باركر : سيدتى ان مايحدث لك هو حاله نادره جدا ...و للأسف غير معترف بها فى الظواهر الفائقه المسجله ...!! و هى تسمى
"الذاكره المستقبليه "

ان ماتريه ياسيدتى قبل نومك ...هذا الشريط السينمائى الذى تحكى عنه

انها ليست احداث قديمه لا تتذكريها

و لكنها احداث لم تحدث بعد ..... و لكن اؤكد لك انها ستحدث

و ستحدث ...قريبا


الى اللقاء فى الجزء الثالث


رســـــــاله بدون اســـم






30 comments:

Noony said...

بقى كدة؟
بعد كل الغيبة دي كلها برضه هنستنى تاني؟
ماشي يا سيدي

نستنى عشان بجد طريقتك مشوقة جداً..وبجد عايزة أعرف أخر القصة
متبقاش تغيب أوي كدة...عائلتك وصلت بالسلامة؟
:)

نوني

shermen said...

قصة خيال علمي
بجد مشوقة جدا ما تغيبش كتير
----------------
أنا أسفه جدا التعليق بتاعك اللي انت كتبته عندي أتمسح غصب عني ياريت ترجع تكتبه تاني
أنا بعتذر جدا
تحياتي

The Groom said...


صباحه رعب و ظواهر مستقبلية فائقة ستحدث بعد حين

اللهما استرنا و احسن خاتمتنا يا عم

متتكبرشي أوي كده و روح حفلة اعتزال نبيل فاروق
ماهو كله بسببك

:)

تحياتي من ماناساس البلد

hesterua said...

جميل بجد

اسلوبك حلو قوى قوى

ومتماسك

يعقوب said...

يا عم زود الجرعة شوية يا باشا ...الحية دول مبيعملوش حاجة

Sampateek said...

حلوة قوي
تفاصيل دقيقة الوان و روائح و اشكال بتحسسني اني قدام شاشة سينما
ممتاز يا مراية بس متغيبش علينا بقى لحسن العملية سخنت و عم ابراهيم باين راح بسبب لسانه
الى الامام

rosealia29 said...

تسجيل حضور و إعجاب بالمدونة ..


و تسجيل متابعة للقصة ..

Esmeralda said...

انت روح فرانكشتاين ركبتك و لا اييييييييييه؟
الموسيقى جامده اوى و مناسبه

عارف فيلم
Minority Report???

عشان ازود رعبك احب اقول لك انى عندى الموضوع المنيل داه و لك ان تصدق او لا

هو انا امشى من الشات بوكس تروح انت؟؟
حانلعب حاورينى يا طيطه؟؟؟

ابقى سلم لى عليها

Esmeralda said...

انا موجوده عالشات بوكس

تخاريف said...

واضح انها جامده فعلا...
كمل بسرعه بقى.....

Dalia said...
This comment has been removed by the author.
Dalia said...

ايه ده ..:O

يالهوى

قول ايه اللى هيحصل بسرعه

عاوزه اعرف فيه ايه


على فكره انا لسه عايشه مانتحرتش

شجره الدر said...

ميرور
ليلتك كاروه مخطط كحلى
القصه جامده جدا لغايه دلوقتى ايه المواهب دى ياراجل
مشوقه جدا
بس انت طولت اوى لغايه مانزلت الجزء التانى ياترى الجزء التالت ابقى اسيب فى الوصيه لأحفادى انهم يقروه على روحى فى المقابر
والنبى بسرعه ياميرور ربنا يكرمك عايزا اعرف الباقى
تحياتى

emos said...

يووووووووووووووووووة
متكمل يا عم انت
المهم بس اللى يموت فى القصة دى متكنش مراتة عشان عجبانى اوى
متموتهاش لو سمحت

حلوة القصة الاكشن دى انا هعملهالك فيلم

Rivendell** said...

خلاص الكومب هيولع من كل الساسبنس دا


المزيكا عاملة احلى شغل


توتر عصبي فعلا


انا في انتظار الباقييييي

ادم المصري said...

القصتين حلوين قوي قوي
.
.
انا قريت الاتنين دي واللي فاتت

بصراحه شوقتني ومستني التكملة

تحياتي والسلام

A.SAMIR said...

بلوج اكتر من رائع
ياريت تقبلوني صديق للبلوج الممتع دة
تحياتي

شيرين said...

اول مرة ادخل هنا بس قريت القصة وانا مستمتعة وياريت تكملها بسرعة

سكينة said...

مش فاكرة أين قرأت عبارة تقول أن المواطن العربي لا يستمتع بأفلام الرعب
الي كان بيكلم كان بيقول كلام جامد جدا طبعا انا مش قده
دلوقتي عرفت قصده
:(
بقى أنا راجعة من الشغل مهدود حيلي وطالعة عيني وقلت ازهزه نفسي شوية في البلوجات صحابي الاقيك مرقدلي رعب
!!!
أنا مش بتاعة الكلام ده وأسال عليا أنا عيلة خالص وكمان حاطط موسيقى
رعب اديني قفلتها عشان اعرف اكمل
دموووووع دموووووع واحباط كبير جدا

أخف دم said...

أنا لسة اول مرة أجيلك يا عم
مش لازم اعلق على البوست يعنى
رغم انى قريت حتت منه ولقيت فيه اسلوب إثارة جميل
بس أنا جاى فى الأول عايز اقوللك كويس انك سبت مصر وبعدين خايف اقولهالك عشان صعبانة عليا.. وخايف اقوللك ارجع تشوف اللى احنا بنشوفه..
عموما ربنا يوفقك هنا او هناك .. ولو لقيت عقد هناك عايزين ولى عهد وللا حاجة قوللى .. أنا جاهز

Shower-Mirror said...

الف شكر لجميع من ضيع وقته لقراءة القصه ...

و موضوع الاجزاء ده اناعامله لسببين :

اولا القارئ مايملش لانى عارفكوا بتكرهوا البوستات الطويله .

ثانيا : شوية اثاره برضوا ماهوا انتوا بتستنوا المسلسلات بالاسبوع ..جت عليا انا يعنى

و اوعدكوا هاكمل قريب .

و دلوقتى نرد عليكوا :

:نونى

الف شكر انك بتيجى دايما و منوره

:شيرمين

هى خيال بس مش علمى ... :)

انا جيت و كتبت كومنت تانى ..اوعى تضيعيه بقى

:جروم

ياعم ابوس ايدك ...دانا غلباااان

hesterua :

ربنا يجبر بخاطرك


:يعقوب

و الله من عينيا ...بعد كده القصه هاتقروها فى 3 ايام


: سمباتيك

و الله ياكلبظ انا نفسى خايف من عم ابراهيم :)



rosealia29:

تسجيل ..ترحيب بيكى

و تسجيل ..ابقى تعالى


:)هههه


ازميرالدا :


الى فتاة الميكروباس العزيزه الغاليه
...هههه...
زى ماحكيتلك على الشات بوكس ..ان موضوع تفريغ الذاكره ده اصلا عندى ...و هو سبب التفكير فى كتابة القصه من 3 سنين

و نفسى اعرف صور ميين اللى باشوفها كل ليله دى ....

Shower-Mirror said...

تخاريف:

حاضر بقى
:)

داليا :

الحمد لله انك بخير ... مع انى كنت عايز اشوفك و انتى منتحره ...و الدم مغرق السرير ... و اكتب قصة حياتك بنفسى

:P

نورتينى


شجرةالدر :

هو انتى ناويه تتجوزى و تخلفى و تجيبى احفاد كمان ... فى الكام يوم اللى هاكتب فيهم القصه ..

صحيح عصر السرعه

emos :

ازيك ... انا خلاص مش زعلان منك

انتى طلعتى جدعه و صالحتينى

مش هاقول اذا كانت رشا هاتموت والا لأ

:P

revendell :

شكرا انك جيتى ...بجد ... و خليكى متوتره كده لحد مارجعلك

:)


ادم المصرى :

اولا منور

ثانيا قصتين ايه ...دول قصه و احده بس على جزئين

اقرا تانى من الاول ياعم :)

a.samir :

انت خلاص بقيت صديق البرنامج ... و انت مشرفنا

ابقى هات اصحابك و تعالى

:)

شيرين :

منوره و اهلا بيكى و ياريت تيجى علطول


سكينه :

دموع و احباط ليه بس ...اوعدك المره اللى جايه هانشر قصه مسخره .. هاتفرفرى من الضحك


اخف دم :

و عهد الله منور ... ياريت بس تقرا البوست ...مش جاى تقول كلمتين جبر خواطر و خلاص ...

عموما انا عارف العظماء امثالك مش فاضيين

مستنيك تانى

صوت فيروز said...

علي فكرة
انا نشرت الكومنت عشان اعرف ردك انت بالذات
ههههههههههه
اصل انا مسعده اوي في الحجات دي
و بعدين كل ما اقرا القصه حد يقاطعني
بس بجد جامد الاسلوب ده
حقيقي يعني مش مجملة
اختشك دودو

ياسر حسين said...

أنا حبيت أرد الزيارة .. بس حقيقي استمتعت بكتاباتك
أتمنى أنك تشارك بجزء منها في منتدي القصة بمنتديات ياسرتوون
www.yassertoon.com/vb
وشعار المنتديات ملتقى المواهب الشابة
مرة تانية أنا سعيد بزيارتي لمدونتك وقراءة كتاباتك

emos said...

ya salam ya shower ya motasame7 enta
rabena ye7'aleek lel2omma el islameyya

bs matmawetsh rasha plzzzzz

BOS BOS said...

جميل جدا القصة بس ياريت تكمل بسرعة ماشى
دى أول زيارة ليا هنا بس مش هاتكون الأخيرة لأن مدونتك عجبتنى جدا

~ Bato0ot ~ said...

:S lesa goz2 talet 7aram 3alek ana 3yza a3raf eh daaaaaaaaaaaaaaaaaaaaaa

Sampateek said...

سلالم البوست بتاعك دابت كل يوم اجي ابص و ملقيش جديد امشي
و بعدين يعني


لما تنشر ابقى صفرلي بقى

:)

وينكى said...

سجل يابنى عندك زيارتى الألى لمدونتك
قرأت الجزئين الأول والتانى من القصه دى
الفكره حلوه كتير وأسلوبك سلس وبسيط
فيه شويه من نبيل فاروق زى ماقلت
مستنيه الجزء التالت على نار
ياريت ما تأخرهوش
سلامات

Dalia said...

ايه ده هو انا لو انتحرت هيبقي الدم مغرق السرير

لا خلاص مش هتحر عشان مش بحب منظر الدم