Saturday, March 17, 2007

من الاول

ابعد عن المصريين هناك !!!!!!!!!!!
تخيلوا هى دى النصيحه اللى الناس كانت بتقولهالى فى مصر قبل ماسافر !!!
قلت فى بالى اهو كلام - اصل انا عارف ان الناس فى مصر تحب تضيف - و مش مهم اخد بيه انا هاتصرف من دماغى و ماليش دعوه بحد .
بس بعد ماجيت هنا فوجئت ان النصيحه دى اتكررت كتير !! كتير جدا و من اكتر من حد ... و ساعتها ابتدت العرسه تلعب فى عبى - اصلى عريض شويه :) - و قلت هو ايه النظام ... هو بجد والا ايه ..
رد عليا صديقى الصدوق و اللى عايش هنا من 3 سنين و خبره ... بص لو كان ولا بد تصاحب مصريين يبقى بعيد عن الشغل و مايكونش فى بينكم اى مصالح متضاربه لاحسن هاياكلوك .
ياكلونى .... لأ على ايه ده انا سايب مصر عشان الاشكال دى اجى الاقيهم هنا !!!!
و للأسف طلع الكلام مظبوط ... من ساعة ماجيت و انا ملاحظ ان اساس العلاقه بين الناس هنا هى الاحترام كل واحد فى حاله و عارف شغله ،، مافيش كلام كتير ،،، 1+1 = 2 بجد و مافيش فصال فيها
انا اتنرفزت مرتين بس من ساعة ما جيت - ايه .. بتقولوا ايه _ ايوه تمام صح برافو عليكوا .. المرتين كانوا مع اتنين مصريين .. اه و الله بجد ....
اللى اكتشفته ان المصريين هنا من احسن الجنسيات و بتوع شغل فعلا يعتمد عليهم ... الى ان يتعاملوا مع واحد مصرى زيهم ..هنا يقولك ثانيه واحده و يقوم مطلع من جيبه الوش بتاع مصر ..!!! و فجأه تلاقى نفسك فى مصر من تانى ... نفس قلبة الخلقه و التعامل بأرف كأنه بيعمل الشغل مجانا ..نفس نظرة العيون الجشعه اللى صاحبها عايز يخطف اى حاجه و يجرى ... نفس الاسئله السخيفه و التدخل فى كل حاجه ....
و لازم الحوار يبدأ كده : هو حضرتك بتشتغل ايه ؟ ....
ارد : فى بنك ؟
طيب و ايه نظام القروض عندكوا ؟ اصلى عايز اعمل مشروع !!!
و لو قلت دكتور ... هايقول بطنى و اجعانى دايما ... و لو قلت بتاع بليله هايقول هى البليله بقت بكام..... اى مصلحه منك و خلاص .
طبعا انا مش قصدى ان كل المصريين كده ..انا باتكلم عن بعض الصفات فى الناس اللى خربوها ...
و اللى بسببهم بجد انا سبت البلد ... بعد ما تحول النصب الى النشاط الرئيسى .. و الازدواجيه الرهيبه اللى عندنا .... و القواعد اللى اتعكست بصوره عجيبه ( الصح بقى غلط و الغلط بقى صح ) .
انا قررت امشى لما ابتدى احساسى الفطرى بالناس يختل .... و ابتديت احس ان كل الناس نصابين..... .و بقيت اعد صوابعى بعد ما اسلم على الناس :) .. ...يعنى كان هايجييلى بارانويا ....
قررت امشى لما لقيت انى مش عارف اربى و لادى اقولهم ايه ..... امشى مظبوط و خليك مؤدب .... الناس هايقولوا عليه عبيط
و لو كان كداب و حلانجى و بتاع تلات و رقات ...هايقولوا عليه واد مدردح و روش طحن .......
مش عارف اللى عملته ده صح والا غلط .... بعد ما ستقريت و الحمد لله و ربنا كرمنى بكل حاجه ...جيت هنا ابدأ من جديد ليه ...مش عارف ......
يارب ماطلعش غلطان .. ساعتها مش هاسامح نفسى ابدا ....
مش هاسامح نفسى انى سبت امى و ابويا .. و تراب بلدى اللى باموت فيه ... كنت دايما باقول انا عمرى ما هاسيب البلد .. لو الناس الكويسه مشيت يبقى مين اللى هايصلحها ...
سامحينى يا مصر .. ما قدرتش .... غلبونى .... طلعت انانى و بصيت لنفسى و هربت ... هربت منهم و سيبتك ليهم ...
يــارب ماطلعش غلطان ........

24 comments:

The Groom said...



أنت مش غلطان - مفيش حاجة بنعملها في حياتنا غلط - انما النتيجة هي اللي يا غلط يا صح لكن كل حاجة نصيب و مكتوب

على الأقل بتتعلم كتييييير

ممكن تكون انت السبب في التغيير و الاصلاح لما ترجع مصر ان شاء الله

أو على الأقل تكون سبب في اصلاح صورة المصريين في الخارج ومش كلهم برا وحشين والله - صحيح حتى في أمريكا و ماناساس البلد ياما اتنصحت أبعد عن المصريين بس ولو

زمااااان وانا صغير مكانشي فيه في الفصل بتاعي في المدرسة في الامارات مصريين و لو الفصل فيه مصريين كنت بحول منه على فصل تاني
سبحان الله مكنتش بطيقهم بس محدش يفهمني غلط - أنا طول عمري فخور بمصر و كوني مصري حتى هنا وماناساس البلد و أهلها يشهدوا

عمااااااار يا مصر

خد بالك من نفسك يا شاور وحاول تصلح الحال حواليك و ليك الأجر

سلااااااااااام

Noony said...

أنا ضد فكرة الغربة من أساسها...أولاً الأحوال كلها مش ظرية لا جوة ولابرة البلد ...ممكن بس العائد المادي يبقى أفضل...بس اية المقابل؟!...انك تتنفي في العربة ولو حتى معاك عائلتك بتبقى دايماً بعيد عن بقية أهلك وناسك...في مصر هتلاقي اللي يفرح على فرحك ويحزن على حزنك...برا...مش شرط إنك هتعرف تلاقي حد حتى تتكلم معاه في أوقات فراغك...والله أعلم
ناهيك عن العلاقات الأسرية واللي بيجرالها
أنا بحس ان كل اللي بيسافر برا في الأول بيبقى متضايق وبعد لما يتأقلم مبيبقاش عايز يرجع تاني مصر...لية بقول كدة؟
بص أنا عندي قرايبي كانوا عايشين برا مصر...وبالرغم من إنهم كانوا بينزلوا كل سنة وبيزوروا العائلة كاملة وعارفينهم..إلا إنهم مش متعودين على حد خالص...لغاية دلوقتي...حاسين إنهم دايماً مش محبوبين والناس كلها بتتآمر عليهم وحاجات من دي
أنا تجربتي الشخصية...إن بابا (الله يرحمه) كان بيشتغل برا...لما رجع...مكنتش متعودة عليه خالص...حتى المصروف كنت بطلبه من ماما وهي تطلبه منه...وحكايات تانية كتييير أوي بتحصل بسبب الغربة
أنا مقدرش أقولك إن كنت غلطان أو لأ...أنت الوحيد اللي ممكن تحس بحاجة زي كدة...وإن كان على الأخطاء اللي بيقع فيها أغلب الناس لما يسافروا...حاول دايماً تتفاداها...وربنا ييسر وتجيب عائلتك تونسك
وطالما إنت خلاص قررت إنك تطلع برا مصر و بالفعل اتخذت الخطوة دي...متبصش وراك...بص أدامك...وخلي عندك دايماً الإصرار إنك تغير المفاهيم الغلط السائدة

ربنا يوفقك إن شاء الله

emos said...

غلطاااااااااااااان و الغلط راكباك من فوق لتحت من رآى منكم منكرا فليغرية مش يسيبو و يطلع يجرى هو انت كل حتة هتلاقى فيها ناس وحشين هتسبها يبقى شوفلاك كوكب تانى
و لو انت كويس و الناس وحشين خليك كويس برضو يمكن حد يتعدى منك ولا حاجة
ما انا كنت مؤدبة مع الناس اللى عايزين شلة بلطجية عشان يعرفو يتفاهمو معاهم بس لحد دلوقتى انا مش نادمانة على اى حاجة انا عاملتها عشان انا مغلطش فى حد
و عيالك تربيهم على الدين و يقابلو الاساءة بالاحسان عشان يدخلوا الجنة اللى انت هتعلمهلهم هيتكتب فى ميزان حسناتك و حسنتهم محدش واخد منها حاجة احنا عايشين عشان نعمل خير ندخل بية الجنة
و بعدين هتربى ولادك ازاى و انت بعيييد عنهم ارجع ياللا احنا مستنيين اهو

دينا فهمي said...

الله أعلم
ممكن تكون غلطان وممكن يكون معاك كلالحق في إنك تسيب بلدك
بس في حاجة سمعتها إنهاردة ويمكن تفيدك
الكاتب والفيلسوف الرائع زكي نجيب محمود عاش طول حياته لغاية سن 50 سنة معتقد تماما في إن دول الشرق لازم تنتقل بحذافيرها إلى كل ما هو غربي.. وكان مؤمن إن ده هو الطريق الوحيد للرقي والنهوض بالمجتمع
وبعد ما بأه عنده 50 سنة اكتشف إنه كان غلطان وكتب مقالة اعترف فيها بخطأ اعتقاده بعد ما كان ألف مؤلفات كتيرة جدا عن اعتقاده القديم
مامنعوش سنه ولا مؤلفاته إنه يعترف إنه أخطأ وانه يعود للصواب

ربنا يجعل لك الخير في اللي اخترته وبإذن الله يكون هو القرار السليم
بس لو اكتشفت في يوم إنك كنت ماشي في سكة غلط لازم ترجع منها مهما كان عدا عليك في السكة الغلط ومهما كان

كل التحايا

ياسمين said...

شكرا على دعمك لى فى محنتى وشكرا على تعليقك الرقيق عندى

ربنا يرجع كل غائب بالسلامة ومهما كانت فى سلبيات بجد الغربة وحشة قوى وصوابعك مش زى بعضها

كل الناس فيهم الحلو و الوحش كل البشر

تحية من قلب مجروح

تخاريف said...

مممممم
انا شايفه ان تصرف حضرتك تصرف طبيعى...
ماحدش يقدر يلومك عليه...
بس المهم النتيجه فى الاخر..
يعنى ماتنساش بلدك برضه

وربنا يوفقك وتحقق احلامك اللى تقدر تشارك بيها ولو بجزء صغير فى خدمه
البلد دى...

اما بالنسبه لمسأله المصريين وعلاقتهم ببعض بره مصر...
فحقيقى وعن تجربه حقيقيه ..احنا فى فترة سفرنا بره مصر كسبنا اصدقاء مصريين كتير جمعتنا بيهم الغربه... ولسه لحد دلوقت لينا صله بيهم بعد ماهما كمان نزلوا مصر
وافتكر ماما كانت بتحكى اننا لما سافرنا..جم ناس مصريين مع ماما ف الشغل اللى كانت بتشتغله هناك..وزارونا فى البيت وعرضوا علينا مبلغ يعنى لحد ما الامور تتظبط
ماما حلفتلهم انهامعاها فلوس والامور متظبطه الحمد لله ...
فقالوا انهم بيعملوا كده مع كل المصريين اللى لسه جاييين جديد فى مكان العمل ده...

يمكن انت ماصدفتش ناس زى د ى...
حظك بقى...
:)

Shower-Mirror said...

ياسلاااام ربنا يخليكوا ليا ... الف شكر لكل اللى قرا البوست و اهتم ..و الف شكر للى قرا و ماهتمش ... :)

للأسف الموضوع خاضع لحسابات كتير قوى _ غير ماديه - و ياريت اقدر استفيد من التجربه دى و فى نفس الوقت ما نساش بلدى ...

جرووم :

انت بتتكلم صح ...طالما قلت انى مش غلطان يبقى بتتكلم صح :) و الله كلامك ادانى زقه ...قصدى دفعه .

نهاد :
انا كمان ابويا كان بيشتغل بره بس انا انشاء الله هابعت اجيب عيلتى خلال ايام .. فمش هانبعد عن بعض انشاء الله .

ايموس :
كلامك هايل يا ايمز :) بس نظرى قريت منه كتب و ألفت فيه كتب ...بس الواقع ايه ..اقرى البروفايل بتاعى .... مراية حمام يعنى مافيش كلام جرايد ... الحقيقه فقط .

يعنى بعد التعويره اللى انت جربتيها لسه ماتعلمتيش ..

الى د. شيماء ( تخاريف ) :

بلاش حضرتك دى و النبى ...انا مش كبير اوى ياختشى :)

و طبعا فى ناس مصريين كويسه كتير اوى و يحبوا يساعدوا بس هو ده الطبيعى و المفروض .. و الحاجه الطبيعيه مش المفروض نكتب عنها ....

مش كده حضرتك :)

Shower-Mirror said...

دينا :

هو ده الكلام التمام ... مافيش حاجه اسمها صح و غلط .. كل و احد بيحسبها بطريقته ... و ايضا كل و قت و له ادان زى مابيقوبوا ...اللى انا كنت رافضه زمان ادينى باعمله دلوقت و مش عارف بكره ايه ....

على فكره .. دى شخصيتى اصلا ..لو غلطان هالم هدمتيينى و ارجع بلدى و مش هاتكسف انى اقول انا حسبتها غلط .

ياسمين :

شفتى بأه ادى موود الكابه بتاعك بهدلنا كلنا ... و بقينا كلنا حانوتيه خلاص :)

باهزر طبعا ...و نفسى انتى كمان ترجعى تهزرى .. ( مع احترامى لاختلاف حجم الجرح )

Azmiralda said...

اديا بتاكلنى و عايزة ارد
بس خاليها بالليل عشان انا لسه فى الشغل

جود لك فى كل الاحوال

Azmiralda said...

بص يا ريس
بغض النظر عن موضوع السفرانا فاهمة اوى اللى انت بتقوله و حاساه لانه كان السبب فى ازمة من نفس النوع , زى ما اكون ماشية فى شارع فى اتجاه و كل الناس , كلهم, ماشيين عكسي , الصح بقى غلط و الغلط بقى صح صدقنى نفس الكلمة قلتها , حتى الاذدواجيه بقت هى العادى و الفهلوة و اللى كانت سبب خلافى مع الناس اول ماشتغلت , من نتيجة الازمة ديه انى سبت شغلى و مستقبلى بعد سنتين,طبعا اتقال عليا مجنونة , كان لازم اعيد حساباتى مع نفسي و اخد وقتى بعيد عشان اقدر اكمل لانى فعلا كنت تعبت , جه عليا وقت فعلا و كنت عايزة اسيب البلد و و اللى فيها , بس الحمد لله ظبت افكارى و نفسي و رجعت تانى شغلىو لمستقبلى , كنت محتاجة لوقت ابعد عشان افكر بهدوء

موضوع السفر بقى : انت لوحدك اللى تقدرتحدد ايه الكويس لمستقبلك و عيلتك بس بلاش تخلى سفرك يكون رد فعل , الجماعة اللى بيتكلموا على الغربة و انك سبت بلدك فعايزه اقول محدش عايز يبعد عن اهله , مش كل حاجة بنعملها بنبقى عايزين نعملها بس ممكن مضطرين نعملها

حاول تربي ابنك زى ماتربيت انت , بكرة مش زى النهارده و اوعى تمشى مع التيار

Shower-Mirror said...

ازميرالدا :

ياسلام على الكلام المترتب ... فعلا العقل زينه :) ... و اضح انك انتى كمان كنت بتفكرى كتير زى حالاتى .... و اللى يفكر فى بلدنا يتعب ... كله ماشى و خلاص و سايب نفسه للتيار .

بالنسبه لقرار السفر .. هو طبعا ماكانش قرار سهل و اخد منى ليالى بدون نوم ... وبعد استخارة الله وجدت انى لن اقدم اى نوع من التنازلات - باستثناء ترك الاهل و البلد -

و لكن فى النهايه قررت ان اخوض التجربه .

اشكرك و ياريت رجليكى تاخد على هنا :)

Azmiralda said...

انا عارفة ان البوست بتاعك بس اسمح لى اقول حاجة خاصة بيا
اكتر نصيحة باسمعها من ماما لما تلاقينى ساكته, بتقولها بحده ساعات, بطلى تفكبر شويه دماغك حتتعب
و ده حاصل فعلا
حاجة تانية كذا حد قالها , عيبك انك جد و عاقلة

شفت العقل بقى يا سيدى


زورنى انا كمان عايزة اسمع تعليقاتك على البوستس بتاعتى محتاجة اعرف دماغى دى رايحه فين

يعقــوب أو فانتــي said...

يا شاور باشا انا حاسس بيك و عارف ايه الاسباب و الدوافع..بس الغريب يا أخي و انت في الغربة متقبلش واحد مصري زي مانت بتقول إلا و يؤلك خالي بالك من المصريين طب هو الأخ مش مصري برضه ؟؟ انا حتى الأن مفيش مصري قابلنه إلا و يكرر النصيحه ده..و كل الينصحك مصريين..طب تيجي إززززاي بأه

يعقــوب أو فانتــي said...

أستاذ شاور، معاك أكرم الفنتي، واحد اتنين تلاتة يا تارا المايك شغال؟؟؟ أسمع يا عم الحج، أنا واحد من الناس اللي اتحطوا في نفس موقفك و اتقالي من قبل مسافر كمان خد بالك يابني من المصريين و الفلسطنيين، طبعا الفلسطنيين مش قصتنا دلوقتي مع العلم اني لقيت أغلبهم زي الفل و اذا اتكلمنا بقي عن المصريين، بصراحة يا ريس أنا أغلب اللي عرفتهم أو خليني أقول كلهم كانوا شباب زي الفل، أنا شايف ان سوري في الكلمة يعني العادات و الشخصيات المعفنة دي كانت زمان، معلش مع احترامي لأي حد كان زمان أي حد بيسافر و بيشتغل أي حاجة و أهو السوق مفتوح، لكن دلوقتي العالم دي بقت ناصحة و مش بيشغلوا أي حد، عشان كدة دايما تلاقي ان معظم اللي بيسافروا دلوقتي عالم بنت ناس جدا و متعلمة أحسن تعليم و عالم دماغها نضيفة، طبعا مش مقياس 100 % بس صدقني بتفرق، أما بقي بالنسبة انك بتقول انك لقيت العملية ماشية 1+1=2 ف طبعا دي حاجة أساسي و أهلي بقو مستغربين انني مش بتكلم زي الأول عمال علي بطال و طبعا في بعض الاحيان كانوا بيفتكروا انني بقيت بتنك علي مخاليق ربنا بس والله أبدا بس الواحد يمكن اتعلم انه يبقي عملي و ميفضلش يلت و يعجن عمال على بطال زي زمان، بس بصراحة فعلا أغلب اللي قابلتهم شباب زي الفل بس أكيد بصد أي حد معرفوش يحاول يتكلم معايا في الجمعية مثلا و أنا بشتري حاجة أو مثلا يبقي واحد بيحاول يفتح حوار في قاعة الانتظار قبل ما نطلع الطيارة عشان ميفضلش ياكل أم دماغي و مش بعيد يئعد يهرج كائنه متربي معايا وحياة خالته أو يسئل أسئله شخصية سخيفة، أما بقي عن المثل اللي بيقول البلد دي أحسن من غيرها بقي مثل فاشل خلاص، البلد مبئاش فيها غير الهم و الغم و قلة الفلوس، سافر يا عم و دور علي مستقبلك، الناس اللي بتقول خليك في بلدك و مش عارف ايه مش حسه تقريبا بحاجه، مع احترامي لرأي أي بنت ان مهما الست بتحتاج الراجل جمبها و البنت مش هاممها غير الرومانسية، مختلفناش يا بنات ان الرومانسية و الحنية ضروري جدا بس انتم مجربتوش احساس انكو تبقوا ولاد و عاتلين هم شقة و مهر و شبكة الي آخره و متعرفوش حتجيبوا الحجات دي كلها ازاي و بالتالي السفر بيكون أقصر الطرق لتحقبق الحاجات دي لأن تحقيقها في مصر بقي صعب الا من رحم ربي، و السلام ختام من أخوكم ف الغربة أكرم الفنتي

يعقــوب أو فانتــي said...

تاني مره يا يعقوب ابقي أكتب أسمك عشان العالم متتزاولش فينا.. سلام

يعقــــوب .... said...

أنا لاحظت حاجة مهمة جدا برضه إن كل الشباب التقابلهم هنا أصدي برة و في أي مكان 90% منهم زي الفل ,بس المشكلة في الكبار,تحس انهم محززين من جواهم,يؤلك بأه واد مفعوس يجي و يشتغل كذا و ياخد كذا وانا موصلتش لده إال بعد ما عمري خلص,,,دول بأه التخاف منهم...و بعدين يا عم متندمش انت اتكلت على الله و ربنا هيكرمط انساء الله...أمال ربنا خلق البلاد و الناس ده كلها ليه,عشان نستفيد من بعض..و بعدين زاى منتا ممكن تكون مفيد لبلدك من جوه برضه ممكن تكون افيد من بره..يعني ممكن تلاقي نفسك بره و تتدفن جوه و ده الحاصل دلوقتي و سلملي علي ام عدلات,,اصدي التعديلات...يعقـــوب معاك مش فانتـي

Shower-Mirror said...

يعقوب و فانتى ... و فانتى و يعقوب ....

ما يابنى كل و احد فيكوا يعمله بلوج ... بدل اللخبطه دى ... دول ببلاش ...:)


انتو بتتكلموا صح على فكره انتوا الاتنين كلامكوا مظبووط ....

زى ما قال اكرم ..بس المصريين هنا ثلاث انواع : الناس الكبيره اللى جت هنا ايام لما الشغل فى مصر كان فقايرى و جايين يلموا فلوس و بس ...دول فعلا هما اللى يتخاف منهم لأنهم كل تفكيرهم فى الفلوس و التحويش و الاسافين و الحاجات بتاعة زمان دى ...

و النوع التانى اللى هو زى حالاتنا ...اللى مش محتاجين فلوس و متربيين كويس بس جايين يدوروا على حياه مختلفه و يخوضوا تجربه جديده ... و النوع الثالث هما الناس اللى ضايعين فى مصر و جايين هنا يضيعوا برده بس بياخدلهم قرشين ... و دول حلهم هو هو زى مصر ... منتهى اللزاجه و التطفل و...و ....للصبح

انما انتوا عايشين فيين .... كلمة جمعيه دى مش غريبه عليا ... ابقى زورونى دايما ...تحياتى

يعقــوب أو فانتــي said...

كابتن شور، أنا عن نفسي بشتغل في شركة في أبو ظبي و تتميز الشركة دي بمناخ صحراوي جدا شديد الجفاف جوا و حريما، و يقع موقع الشركة في منطقة الربع الخالي لو كنت سمعت عنها أيام الجغرافيا في أعدادية، طبعا ده مش معناه اني بكتبلك التعليق ده دلوقتي و أنا قاعد في الخيمة بشر عرق، الحمد لله الكامب بتاعنا لذيذ و أحلي حاجة فيه هي القطط اللي بتخليك لسة فاكر لفظ مؤنس حيث إن القطط هي الحاجة المؤنثة الوحيدة اللي بنشوفها هنا، تحياتي و كان معكم أكرم الفنتي من أطري، قصدي أجف مكان في العالم

Shower-Mirror said...

طب مش تقول ياعم اكرم ...ده انا جنبك فى دبى .... و كنت امبارح فى ابو ظبى و الله ....:)

يعقــــوب .... said...

ابسط يا عم فنتي طلع ليك واحد بلوجاوي جمبك اهه,بس ادعيله يا شاور باشا يرجع من محنته أصاه مخطوف اليومين دول و مش هيفرجوا عنه إال بعد شهر...أنا عن نفسي في جده بعيد عنكم بس على طول مع فانتي أون لاين..عموما كلامك كله صح يا محترم و ما عليك إلا إنك تمسك في النوع التاني ده و تدي الباقي 100 صرمة فوق دماغهم لو حد بس فكر يكلمك منهم...و أهم حاجة تصاحب ناس من مستواك الفكري و الاجتماعي,فالمرء على دين يصاحب...و ربنا معاك

يعقــوب أو فانتــي said...

3am shower ya gamed, e7na msh gamb ba3d wala 7aga ya rayes, ana el location elly bashta3'al feeh b3ed 3an el down town bi 150 Km, ya3ny wenta fi Abu Dhabi, 3eesh ba2a bel 3arabeya ya rayes yegy sa3a wi nos, bas zai ma ya32oub 2alak keda ana ma7'tof el youmen dool, ba3atony project fel head office bta3 el sherka bta3etna wel project dah modet sho3'ly feeh shahr, ya3ny i will be in Abu Dhabi (down town msh sa7ara) l7ad a7'er shahr April inshaallah.

Salam ya prof wi good luck with your new job.

camera_girl said...

لا عاوزه اقراه تانى وبعدين اعلق

shermen said...

على فكرة مش كل المصريين كده صوابعك مش ذي بعضها
وممكن تلاقي في بلاد الغربة من أصحاب ا لبلد اللي أنت فيها ناس كده بردوه بس لو أنسجمت أوي معاهم وأختلطت كتير بيهم وإذا تجنبوا الإختلاط بيك يبقى أكيد الصفه دي فيهم وعشان كده بيتجنبوا يختلطوا بأي حد

3abdo me7tas said...

إزيك يا مان الأول وإيه أخبارك
بجد كل كلامك صح حتى هنا جوا البلد انا لما كنت متغرب نص متغرب يعنى عشان الكلية شوفت أشكال زى اللى انت بتقولها دى مثلا كمثال ومحدش يزعل اهل بورسعيد تلاقيهم سمن على عسل جوا البلد لاكن لما يطلعو من المنطقة الحرة بتاعتهم تلاقيهم بياكلو فى بعض ومحدش يعر ف التانى انا بجد شوفت أشكال وألوان من البشر هنا فى مصر عشان عاشرت ناس كتير من جميع المحافظات من اول رفح والغردقة والعريش لغاية السلوم ومن دمياط لغاية اسوان عشان كده الواحد بيتعلم اما بالنسبة لبره هتلاقى ناس كتير كويسه برضه وعلى خلق وتقف جنبك ومش تحسسك بالغربة انا عن نفسي نفسي اسافر بره اوى اوى اوى بس من تعلمى وغربتى سواء فى الكلية او الشغل مليش دعوه بجد اه هتقول عليا انانى بس اعمل ايه لا كده عاجب ولا كده عاجب يبقى اشوف مصلحتى احسن
وربنا يهون عليك الغربة يا رب وابقى شوفنا فى شغلانه كده عندك
;)