Thursday, May 31, 2007

تاج من شيرمين



تاج من العزيزه شيرمين ......الله يسامحها بقى




:)


ملحوظه : انا هاجاوب على التاج ده اجابات حقيقية و صادقه

و مش هاغير الحقيقه علشان اجاوب اجابات نموذجيه علشان اؤثر فى اللى بيقرأ

بسم الله نبدأ

أحب شخص الى قلبك في الدنيا؟


هاحكيلكم على حلم حلمته من حوالى سته اشهر - قبل ما اسيب مصر - ..و بعدها هاتعرفوا اجابتى على السؤال ده :

الحلم عباره عن انى كنت سايق عربيتى باليل ... فى مكان غريب و موحش

كان معايا مراتى و اولادى فى العربيه

ابنى الكبير عنده 4 سنوات و قاعد على الكنبه ورا

و الصغير كان عنده وقتها 5 شهور و مربوط فى الكرسى بتاعه على الكنبه

المهم انى وانا سايق ..لقيت الطريق انتهى و اصبح النيل قدامى فجأه

!!و مافيش غير لوح رفيع جدا يادوب يكفى العربيه ..علشان اعدى الناحيه الثانيه

المهم اتحركت بالعربيه بالعافيه فوق اللوح علشان نعدى

و فجأه

اختل توازن السياره و سقطت فى النيل

طبعا السياره بدات تغوص ..و تغوص ....

بدون تفكير امتدت يدى الى حزام الامان عشان افكه

و لكنى نظرت حولى داخل السياره

لقيت مراتى جنبى و هى مبتعرفش تعوم

ابنى الكبير مش بيعرف يعوم طبعا ... و اكيد المخلوق التانى ابو 5 شهور مابيعومش هو راخر

و انا الوحيد اللى ممكن انقذ نفسى ...و انقذ واحد منهم معايا

!!!!!!!!

عارفين عملت ايه

؟؟؟

فضلت ابصلهم و احنا كلنا مسروعين و مش عارف اعمل ايه

و فى الاخر قررت

انى مش هافك الحزام ...و مش هاخرج من العربيه

و قررت انى اموت معاهم

لانى ببساطه ماعرفتش ارد على السؤال

انا بحب مين فيهم اكتر ؟؟؟؟


إنسان مستعد تضحي بحياتك _ركز في كلمة حياتك_عشانه؟

راجع الاجابه السابقه


إنسان كرهته لدرجة الجنون و تمنيت لو تمسك سكينة و تنقض عليه و تغرزها في قلبه تقتله و تقف تبص على جثته و تشفي غليل قلبك؟
واحده خانتنى ...... زماااااااااااااان ... ايام الهبل
بس لما بافتكر الفيلم ده باقعد اضحك ضحك ...و لو شفتها دلوقتى هاديها هديه محترمه ...لانها كانت السبب ان حياتى تتغير و لله الحمد للأحسن دائما
:)




ما هو إسم أجمل كتاب كتبه بشرقرأته و محتفظ به حتى الآن؟



انبياء الله لاحمد بهجت

إسم كتاب_كتبه بشر برضه_إنت متعلق بيه و بتقراه كل فترة؟



نفس الكتاب

أهم جهاز منزلي متعلق بيه أوبتستخدمه كتير؟

الراديو ...بس ايام ما كنت فى مصر

شىء تحس بالراحة النفسية عندما تنظر إليه؟


الكعبه



مكان تحس فيه بالحنين إلى شىء لا تدري ما هو و ذكريات جارفة إلى لا شىء؟


و سط البلد - القاهره


مكان تحس بالراحة عندما تدخله؟

منزل جدتى رحمها الله بشبرا

أجمل مدينة زرتها داخل مصر؟


هاجاوب الاجابه الشعبيه

الاسكندريه

:)




شخصية كرتونية تحبها؟
عم دهب ..
:)
و كنت باموت فى القصص بتاعته لما كان بيجرجر بطوط و العيال معاه و يروحوا يدوروا على كنز فى البحر
هههههههههههههه


نوع هاتفك المحمول؟

Nokia N 70

بقاله معايا سنه و زهقت من امه

قولولى اغيره و اجيب ايه ؟

Apple i phone

ولا

Nokia E 90

اصلهم هاينزلوا السوق قريب و انا محتار

سرعة بروسيسور جهازك؟


1.8 GHZ

ذاكرة _هارد_جهازك؟

60 G

المساحة التي تشغلها المساحة الاسلامية على جهازك؟


الله اعلم



نفس الاجابة السالف ذكرها في قلبك_الاجابة لنفسك عشان الرياء يا اخوانا؟
الله اعلم

أهم هدف انت واضعه لحياتك الآن؟


اكمل الماجستير و اثبت نفسى فى الشغل الجديد و اربى و لادى و اعلمهم كويس


مواصفات فتى الاحلام بالنسبة لي؟
قصدك فتاة الاحلام ؟
الحمد لله ربنا رزقنى بزوجه رائعه ..... لم تجرؤ الاحلام على معرفتها بعد


شعورك لما بتسمع كلمة مصر؟



دلوقتى و انا فى الغربه طبعا هاموت و ارجعلها

بس عموما ... باحس ان ربنا ابتلاها و ان مصر بجد ملعونه لعنه ابديه

الابتلاء و اللعنه اسمهم

المصــــــــريين



شعورك لما بتسمع كلام عن اليهود؟
اه .... كده هانزعل من بعض لانى مش هاقول الكلمتين اللى انتوا عايزينهم
!!!!!!!!!!!!!!
بما ان كل شغلى فى البيزنس فاليهود هم اعظم رجال اعمال فى العالم . ... و ده طبعا فى المطلق بغض النظر عن انهم يهود
و بما انى بنى ادم متحضر و مثقف - ايون مثقف :) - فانا بالنسبه لى اليهود مخلوقات الله زينا و فيهم الكويس المؤمن اللى هايخش الجنه زي الكويسين مننا و فيه الضايع اللى هايروح فى داهيه زى الكتير مننا برضه
اللى انتوا بتسألوا عليهم اسمهم الصهاينه ... و برضه هاقول انى شايف انهم بيعملوا اللى فى مصلحتهم ...صحيح هما و لاد ستين كلب و عايزين 100 هتلر يولع فيهم بجاز
بس ارجع و اقول انهم بيشتغلوا لمصلحتهم و مصلحة شعبهم ...مش فى الاحتلال و الكلام بتاع النشره بس .. لكن فى التعليم و الزراعه و الفن و الطب و كل مجالات الحياه بتاعة البنى ادمين اللى بجد
احنا بقى يا كتاكيت عملنا ايه ... عملنا كل حاجه لمصلحتهم برضه و ضد مصلحتنا و ماشاء الله بنجرى بسرعة الصاروخ ....الى الخلف
يبقى هما برافو عليهم ...و احنا برضه رايحين فى داهيه ...أأ... قصدى غورنا فى داهيه من زمن
:)


شعورك لما بتشوف ضابط شرطة؟


لو محترم باحترمه اضعاف اضعاف لأنه فعلا حاجه مهمه جدا لينا كلنا ... و با ساعده على قد ماقدر ...و لو واحد من اياهم باقول ربنا يكفينا شرك

و للأسف ..انا بعد ما جيت هنا دبى عرفت لأول مره فى حياتى - بعد 32 سنه عمر يا بشر - ان جملة الشرطه فى خدمة الشعب موجوده فى الحقيقه مش يافطه على الحيط

شعورك لما بتشوف الكناس العجوز في الطريق؟

قصدكوا الشحات العجوز اللى فى الشارع ...لأن مصر مافيهاش كناسين


أفكارك تجاه شاب ماشي في الطريق يلبس جلابية بيضاء قصيرة و عمامة و له لحية و بجيبه السواك و في يده المصحف؟
لو نزود كمان انه متدين بجد ..و لوجه الله ... يبقى شعورى ناحيته انى باحسده و باتمنى اكون نصفه
انما لو كل دى حركات عشان اى اغراض تانيه ..يبقى انا مش فاضى افكر فيه



إحساس يراودك في اشارة مرور مغلقة بسبب مسئول كبير؟
احساس قليل الادب
ههههههههههههههههههه
********************
الف شكر ياشيرمين على التاج ...و انك فكرتى فيا
:)

12 comments:

shermen said...

يارب يسامحني يارب
أهم حاجه ف التاج إنك جاوبت بصدق وصراحه
مش هناقشك في إجاباتك
لأني مصدقاها

معلش انا عديت فترة ما فتحتش فيها مدونتك لأني كنت كل أما أفتحها مالاقيش جديد ولما افتح الكومينتات مالقيش رد منك

قلت يبقى انت مطنشنا وزعلت
لكن عرفت السبب وألف سلامه على صاحبك
وربنا يعافيه يارب

------------
بالمناسبة
أنا معرفش غير نوكيا
لكن النوع التاني اللي انت بتقول عليه ده
Apple i phone
معرفوش

لكن أقدر أنصحك نصيحه
أعمل
search on googel
وقارن بين مزايا النوعين
يمكن المقارنة تفيدك

بالمناسبة تبيعلي اللي معاك دلوقتي ؟؟؟
هههههههههههههههه
تحياتي

Noony said...

ربنا يبارك لك في مراتك وأولادك ويجعلهم الذرية الصالحة يا رب
ربنا يخليكم لبعض

بقى اللعنة الأبدية اللي مصر مبتلية بيها هي المصريين!؟....الله يسامحك
طيب نروح فين طيب!؟

تعرف، بمناسبة اليهود والكلام اللي قلته عليهم، أخويا مرة قالي انه بيحترمهم أوي. ولما شافني مستغربة أوي قالي أصل عندهم هدف واضح في حياتهم وعايشين حياتهم كلها لتحقيق الهدف دة (بغض النظر عن الهدف نفسه)...شم عايشين سبهللة كدة زي أغلبنا
(عشان مش بحب التعميم)

ربنا يتمم شفا صاحبك يا رب..أسفة إني مقريتش البوست اللي فات
إن شاء الله يقوم بالسلامة وتبقى تطمنا عليه
بالنسبة للموبايل، ممكن اللينك دي يكون فيها معلومات مفيدة شوية
http://www.gsmarena.com/compare.php3?idPhone2=1827&idPhone1=1857

وهابقى أسألك ولو عرفت حاجة هأقولك إن شاء الله
:)
نوني

Reemo said...

عجبتنى جدا اجابتك عن فتاه احلامك
ربنا يخليلك مراتك وأولادك ويسعدك بيهم يا رب
كل تاج وانت طيب
تحياتى

Esmeralda said...

حمدالله على السلامه :)
المهم انت مش مهم التاج فداك اى حاجه

Bride Zone said...

ابقى طمنا على صاحبك عامل ايه دلوقتي؟

أما في المقارنة بين الموبايلات فنوكيا عموما باكرهها خصوصا انها شركة يهودية وأنا بقاطع..

والاي فون مواصفاته ما نزلتش في اي تلفون تاني قبله.. فيه حاجات ومميزات فعلا رائعة..

:)

Eric Matt said...


:)

تحياتي لك من ماناساس البلد

تخاريف خاصه! said...

فينك من زمان يا ابيه...
ماشاءالله الاجابات جامده جدا..
ويارب تحقق كل احلامك وتعيش اما تشوف ولادك فى الكوشه ان شاء الله
:)))))))))

bastokka طهقانة said...

شكلك كنت شرقان على التاج ده بتجاوب على الاسئلة بحماسة و قصص و احلام

ربنا يكفينا شر التاجات و العربيات اللي من غير فرامل


قال بيعرف يعوم قال
اوروفوار

Anonymous said...

some of your answers
really affected me!!
May Allah bless you and your family insha ALlah

صوت فيروز said...

يا حلو صبح يا حلو طل
ايه الغيبه دي
انت فين
ابقوا تعالوا زروناااااااااااا

علي فكرة نفس التاج ده جالي
اشوفك علي خير
اللهم صلي علي محمد

3abdo me7tas said...

انت عارف يا مان انا اول ما دخلت المدونة بتاعتك مش عارف فيه حاجه شدتنى خلتنى اقعد اقراها كلها مع انى والله عايز انام بس بجد فيه حاجه كده مش عارف هى ايه بس اللى اقدر اقوله انى بجد شايف نفسي فيك حاسس ان اللى بيتكلم انا
جزاك الله كل خير

علا من غزة said...



بجد احييك

استوقفتني عدة اجابات من اهمها ردك على اول سؤال

بشترك معاك في اعجابك بكتاب انبياء الله ,, وكان في كمان كتاب لأحمد بهجت اسمه قصصالحيوان في القرآن ,, مش عارفة اذا قرأته ,, لكن بجد عبقري

ولا اجابتك على فتاة الاحلام ,, يا سلام يا سلام اد ايه حلو الغرام

روح يا شيخ ربنا يديلك دايما كمان وكمان

ههههههه

تحياتي