Wednesday, June 13, 2007

يادى الكسوف

مازال صوت التصفيق يدوى فى اذاننا بعد ان خرجنا من الحفله

نظرت لزوجتى و قلت : مبسوطه ياحبيبتى

قالت و عيناها تلمع من السعاده : اه طبعا ...الحفله كانت تحفه

................
ثم

ثم نظرنا الى بعضنا ...و ... و انفجرنا فى ضحك هيستيرى

ضحك لم يتوقف منذ خمسة ايام ... و لن يتوقف لعدة ايام اخرى


و لكى تعرفوا السبب ....... سنعود الى ما حدث قبل ذلك باسبوعين

*********
***************
ديســـمبر 2005

انا : على فكره ... عمر خيرت هايعمل حفله قريب ...يوم 25 عشان الكريسماس

مراتى : بجد ... طب كويس

و لسان حالها يقول ... و انا مالى مايعمل

انا : دى اكيد هاتبقى تحفه .... و الله حفلاته وحشتنى ...بقالى كتير مارحتلوش حفلات

مراتى : اه ...طبعا ...هاتبقى تحفه

انا : طب ماتيجى نروح

مراتى : بجد ..... طب و الولد

ملحوظه : كان ساعتها المحروس التانى لسه ماشرفش

انا : نبقى نسيبه عند طنط ... مايجراش حاجه

مراتى : و الحفله هاتكون فين ؟

انا : على مسرح جاليريا فى جراند حياة ...اللى هو كان ميريديان يعنى

مراتى : ايوه ..... ايوه

طبعا هى لا عارفه فين ميريديان و لا فين جراند حياة .. مراتى تتفسح و انا ادفع و بس ...الاسامى مش مهم

انا : طيب انا هاتصل بيهم و اسأل

هى : اوك

*****************

Galleria , Good Evening

دى البنت اللى ردت عليا ..و بصوت اخر مياصه

انا : من فضلك عايز اسأل على حفلة عمر خيرت

المايصه : اتفضل يا فندم تحت امرك

انا : يا ترى لسه فيه تذاكر ؟

ملحوظه : لازم الف و ادور و اعمل فيها برنس ...مش معقول اقولها التذكره بكام علطول كده

المايصه : اه يا فندم فيه طبعا

انا : فى اول صف ؟؟

حركات برضه

المايصه : ايوه يافندم .. لسه فيه.... تقريبا مافيش الا اول صف ب 300 جم
و الصفوف الاماميه ب 200 جم الباقى ابو 100 جم و 50 جم خلص خلاص


الله يحرقك ...ده انا باقول فى سرى

انا : طيب عموما ...هابقى اتصل تانى ....باى

********************************

انا : ماتيجى نروح ابو 200 وخلاص

مراتى : انت بتهرج يا شاور بلاش دلع

انا : يابنتى دى فرصه

مراتى : الحفلات جايه كتير

انا : طيب ...نستنى بقى اى حفله ليه فى الساقيه من ابو رخيص

**************************


بعد 3 ايام

انا : شفتى الاعلان اللى فى الاهرام ده

مراتى : اعلان ايه

انا : بيقولك ياستى ... ان احنا لو اشترينا من جاليريا سنتر حاجات ب 300 جم ...هايدونا تذاكر حفلة عمر خيرت ببلاش


مراتى : طب و احنا مالنا


انا : ايه اللى احنا مالنا ... نروح نشترى حاجات من هناك و ناخد التذاكر .. ..موجانان


هى : انت يابنى ايديك بتاكلك ...عايز تفرتك و خلاص


انا : ماهو اكيد هانلاقى حاجه محتاجينها ..و اهو نبقى ضربنا عصفورين بحجر


هى : ماشى لما نشوف


**************


رحنا جاليريا سنتر .......و لقينا الموضوع اخر مهرجان


و اعلانات الحفله فى كل حته ..و زينات عشان راس السنه ...و بابا نويل ادى للولد بالونه


و حاجه اخر ابتهاج


انا : بصى .. الكاونتر بتاع الحفله هناك اهه لما اروح اسأل


هى : اوك

**

انا : ياترى الاوفر بتاع تذاكر عمر خيرت لسه شغال ؟

الراجل : ايوه يافندم ... لغاية ليلة الحفله

انا : همممم ..... و ياترى التذاكر الهديه بقى فى انهى صف ؟

الراجل : فى الصفوف الاماميه طبعا يافندم

على فكره الراجل كان بيتكلم بمنتهى الذوق و الادب ..و بصراحه المكان كله كان على المستوى المتوقع

****

المهم رجعت لمراتى و ابتدينا نعمل الشوبنج الاجبارى ...و بعد اللف على المحلات اشترينا شوية حاجات ب 300 جم فعلا

يعنى ..... جينز ليا و شوية حاجات لابنى و كده

المهم خلصنا و توجهنا الى الكاونتر تانى علشان ناخذ الجايزه

**************

واحنا متجهين ناحية الكاونتر اكتشفت ان الراجل اللى انا سألته مشى و جه مكانه شاب حليوه كده ... و النظافه هاتنط منه حاجه كده زى احمد عز و العياذ بالله

انا : مين الواد الامور ده ..؟ امال فين الحاج اللى كان هنا

مراتى ( وهى فاتحه بقها : اه ...هو فعلا امور

انا : احترمى نفسك شويه

هى بغيظ : الله .... مش انت اللى بتقول ؟

انا : طب استنى هنا مع الولد و انا هاروحله

******

المهم رحت عند الشاب الحليوه و انا متآلط على الاخر و عاوج لسانى

انا : هاى جود ايفيننج

شبيه احمد عز : اهلا يافندم تحت امرك

.......انا : بخصوص تذاكر الحفله ...انا عملت المشتريات و

الشاب : ايوه ...تحت امرك ممكن اشوف الايصالات

برضه الواد كان فى منتهى الادب و التربيه وهو بيتكلم ...هى الناس دى مش ساكنه فى مصر ولا ايه !!!؟

انا بآلاطه و قرف : اتفضل

الولد اخد الايصالات منى .....وبص فيها وهو لسه مبتسم ... شويه و ابتدا وشه يحمر .. ويقلب فى الايصالات و كان باين عليه انه محرج او مكسوف من حاجه

انا و انا لسه متقمص شخصية عبود باشا : ايه ...فى حاجه ولا ايه ؟؟؟

الواد الحليوه : لا ...أأ ...بس ...حضرتك دى مشتريا ت ب 300 جم

!! انا : ايوه

الواد : بس الاوفر على المشتريات ب 3000 جنيه مش 300

طــــــــاخ

ده صوت الخبطه اللى جت على نافوخى

انا وانا اتجه الى نصف هدومى : ازاى كده ..الاعلان بيقول 300

الولد وهو محرج بجد : اسف يافندم .... الاعلان اهه و كمان البورشور بتاع الاوفر شوف حضرتك

نظرت و انا هايغمى عليا من الموقف ..و بالفعل كل حاجه فى الاعلان بتقول 3000 !!!!! امال انا جبت رقم تلتميه ده منين ؟؟

انا : أ..أأأ انا متأسف جدا ...انا مش عارف شفتها 300 ازاى ده انا قريت الاعلان اكتر من مره

طبعا كنت باكلمه و انا عباره عن قطعة غسيل لسه خارجه من الغساله الايديال بتاعة زمان - فاكرينها - و بصيت جمبى و اكتشفت ان مراتى و الولد كان واقفين من بدرى و الموضوع بقى بجلاجل

الولد و هو ينظر لنا بأحراج حقيقى : اسف مره تانيه يافندم ...اكيد حضرتك ماخدتش بالك

*************

انسحبنا من امام الشاب انا ومراتى و احنا زى السكرانين من كتر الاحراج و الكسوف ، و اللى زود الموضوع احراج ان الولد كان فى منتهى الذوق و الادب و كان محرج اكتر مننا

المهم ...قعدنا نلف انا و مراتى عشر دقايق فى المول و بعدين قررنا ان احنا نروح

انا : انا مش هاخرج من الباب اللى هناك ...انا مش ممكن ابص فى وش الولد بتاع الكاونتر تانى

مراتى : بس احنا راكنين هناك

انا : مش مشكله ... نخرج من اى باب و نمش شويه ...انما انا مش ممكن اخليه يشوفنى تانى

اقتنعت بكلامى ...و قعدنا نلف المول كله ان احنا نلاقى اى باب تانى ... ابدا

انا : يعنى ام المول ده كله مافيهوش الا الباب اللى هناك ...ده فقر ايه ده

هى و قد بدأت فى الضحك : خلاص بقى يلا نروح وخلاص انا تعبت

انا : امرى لله .. نخرج من الباب و نعمل نفسنا مش شايفينه ...هى يعنى البصه هاتلزق ...ماتبطلى ضحك يا ظريفه

هى وهى مسخسخه على الاخر : اصلك ماشفتش منظرك لما عرفت

انا : ها ها ها ...يا دمك

المهم توجهنا ناحية الباب الرئيسى عشان نمشى ..ووجدنا الشاب الحليوه واقف لسه على الكاونتر

انا : يخرب بيتك ...انت لسه مرزوع

عملنا نفسنا سياح و مشينا نتفرج على المحلات فى اتجاه الباب

و فجأه ...الواد شافنا و توجه بسرعه ناحيتنا و على وجهه نفس الابتسامه العسوله وكأنه كان مستنينا

مراتى : ايه ده هو عايز ايه تانى ؟ جاى علينا ليه ؟

انا -بقلق - : مش عارف ....يانهار اسود .... لاحسن يكون فاكر ان احنا كملنا مشتريات و جايين ناخد التذاكر ....يادى الكسفه الدوبل ياربى

**

الواد : اسف على الازعاج ... ممكن لحظه

انا -فى سرى - : ارغى يا عم الامور

الواد : انا بكرر اسفى على الموقف اللى حصل يافندم

يانهار اخضر ده هو اللى بيعتزر

انا : لأ مافيش حاجه

وفجأه دخل ايديه فى جيبه ...واخرج ظرف فى منتهى الشياكه

الواد : لو سمحت يافندم ،،، بأسم مسرح جاليريا ...ارجو انك تقبل مننا الاعتزار ده ...دول تذكرتين لحفلة عمر خيرت فى الصفوف الاماميه ...علشان نصلح الموقف ده

انا : بمففممفمفم فتفتفن .........نعم

الواد : ارجو انك تقبلها منى انت و المدام

نظرت لأجد مراتى تحولت الى اللون البرتقالى من كتر الاحرا ج

انا : مممقهقعق ........... شكرا

الواد : سهره سعيده انشاء الله ...استأذن حضرتك فى رقم تليفونك عشان تكون معانا فى الحفلات الجايه

وجدتها فرصه مناسبه ..واخرجت الكارت الخاص بى و اديتهوله ...عشان يتأكد ان احنا مش شحاتين

انا وقد استعدت مقدرتى على الكلام : انا متشكر جدا ... و اسف على سوء الفهم

الولد : لأ يافندم ماحصلش حاجه

*************

خرجت انا وزوجتى و جوانا احاسيس كتير .... مكسوفين و فرحانين .. و مستغربين ...و بنضحك بجنان .... و بردانين موت لأننا كنا فى شهر ديسمبر ....... و كمان فخورين ان البلد لسه فيها حاجه اسمها ذوق

و ابنى الصغير بيضحك على ضحكنا و هو مش فاهم حاجه

:)

ثم خطر لى خاطر بعد مادخلنا العربيه

انا : اوعى يابت يكون مقلب و الظرف مافيهوش حاجه

هى : يالهوى .... طب افتح بسرعه

و فتحت الظرف لأجد تذكرتين للحفل من فئة 300 جم

********************

" عمر خيرت مغمض العينين ...و هو يعزف مقطوعته الخالده ... "ليلة الفبض على فاطمه

جمهور الصفوف الاولى من حولنا من مشاهير الفن و الصحافه ... و الالماظات و الفوريرات زى الرز

الجماهير تتمايل من النشوه مع الانغام الساحره

وانا ومراتى - واحنا لابسين اشيك حاجه فى العيله - ننظر الى بعضنا و مازلنا نضحك بجنون

***********************

انا بعد الحفله : لأ ..وانا اللى كنت بادور على باب تانى عشان نخرج منه

هعهعهعهع ....هعهعهعهعهع

هعهعهعهعهع ....... هعهعهعهعهع








86 comments:

Esmeralda said...

عمر خيرت؟؟؟؟
الله الله الله عليك يا كبير
اموووووووووووووووووووووووت و احضر له اى حفله

Bride Zone said...

انا مش بعرف عمر ده يبقى مين بس بصراحة الموقف ده!!
ده انا كنت حتمنى الارض تنشق وتبلعني لو كنت موجودة لحظتها من الكسوف!

الحمدلله اللي جت سليمة بقى :)

smraa alnil said...

هههههههههههههههههههههههه

هههههههههههههههههههه
والله العظيم انا عيني دمعت من كتر الضحك
وابويا شك فيا
هههههههههههههههههه

بجد عيط من كتر الضحك
موقف زباله اوي صحيح

بس عايزة افهم حاجة
هو مين فيكو اللي كان غلطان

يعني مين اللي فهم غلط
انا مش فاهمة بجد
كابتن شاور هو انت فاهم

كلبوزة لكن سمباتيك said...

طريقة سرد مشوقة جدا و لطيفة جدا و نهاية سعيدة للغاية
انت فنان يا ولدي
تحياتي

The Alien said...

بجد موتني من الضحك
بتحكي حلو جدا

علي فكرة...عمر خيرت يستاهل اللي حصل
تحياتي

Anonymous said...

looooooool


Goodness ! one of the best and strange situations begad !!:))

Noony said...

أنا مش عارفة الناس بتحب عمر خيرت في اية..أنا مرة رحت له حفلة..نمت فيها من كتر الملل..كله شبه بعضه وخلاص
:) :) :)
بس سيبك انت
الموقف مضحك موووووووووووووت
والولد الأمور دة طلع أمور بجد
ههههههههههههههههههههههههه

كل حفلة وانت طيب
:)
نوني

تخاريف خاصه! said...

هههههههههههههههههههههه

فظيع يا ابيه..
والموقف رهييييييييب..بجد انا ماصدقش انه ممكن يحصل فى مصر..
بس مش مهم ..
عشان انت نيتك طيبه والمدام..قلبها ابيض...
:)))))))))))
بجد عماله اضحك مش قادرة..
:D

SaSo said...

ههههههههههههههههه
بتحطو نفسكو ف مواقف بااااااااااااايخه
تعيش وتاخد غيرها

ساعه الغروب said...

هههههههههههههههههههههههههههه

مش ممكن بجد ايه اللى انت بتعمله فى نفسك دا

ههههههههههه

دى مواقف برضو ؟؟

لا بس اقولك على حاجه


انا كان عندى استعداد انى اتحرج 3 او 4 مرات فى عمر خيرت

دا عمر خيرت هو اى حد

انا لو كنت واقفه ساعتها كنت هشترى ب 30بس واروحله

واشوفه باه هيعتذر ازاى ساعتها

هو دا باه استغلال الفرص الصح

ههههههههههههههههههههه


شكرا ليك

:)

يعقــــوب .... said...

بس بصراحة حركة ذوق جدا من الواد و المسرح...هو ده فن جذب و تهيئة العميل...اكيد المسؤل عن المسرح ده مش مصري أو متعلم بره مصر
:)

Shower-Mirror said...

esmeralda :

انشاء الله تحضرى له حفله من غير موت

و اقرى البوست كله بلاش حركات قرعه

bride zone :

ماتعرفيش عمر خيرت ازاى بس ...

هو واحد من اعظم الموسيقيين العرب فى العصر الحديث

و لو شفتى فيلم مافيا بتاع احمد السقا ... هو اللى عامل الموسيقى بتاعته ..ده غير اعماله العظيمه التانيه

samra alnil :

كويس انك ضحكتى يا انوج ...بعد ما نكدتى علينا بالبوست الاخير بتاعك

ربنا يبسطك كمان و كمان

انا طبعا اللى كنت فاهم غلط المطلوب كان مشتريات بتلات الاف و انا اشتريت بتلتميه بس

ايه يعنى فرقت صفر

ههههههههههه


كلبوظه :

ربنا يخليكى ...ساعات القصص الحقيقيه بتكون احلى من الروايات


the alien :

ربنا يضحكك كمان و كمان ...ابقى تعالى كتير

الحلم العربي said...

الموقف بصراحة جااااامد جدا
هو ده اسلوب الشركات اللى بتفهم فعلا
هما كده كسبوا زبون ليهم إلى الأبد لأن حضرتك عمرك ما هتنسي الموقف و أكيد هتحكيه لناس تانية و اكيد منهم حد هيفكر يتعامل معاهم و هما كده هيكونوا كسبوا سمعة كويسة

يا ريت كل مؤسساتنا و شركاتنا تتعامل ابلذوق ده مع كل الناس مش ناس و ناس ده حتى كده هيكسبوا اكتر بكتير

تحياتى لك و للمدام و للأولاد و لعمر خيرت طبعا

Shower-Mirror said...

epitaph :

yeah ,,, it was the strangest one i had

:)

noony :

يا نهار اسود
نمتى فى الحفله

؟؟؟؟؟؟؟؟

انتى ايه حكايتك .... ؟

مابتحبيش عمر خيرت و لا ادهم صبرى ..

انتى منين ؟؟؟؟من حلايب ولا ايه

ههههههه



تخاريف :

طب كويس و الله انك بتضحكى ... هو ده المهم

هههههههههه

/saso :

لا يا ستى مش عايز اخد غيرها ...ده موقف من اللى بيحصلوا مره فى العمر ...

نورتينى و ابقى تعالى تانى


ساعة الغروب :

ماهو انا لو كنت اعرف ..ماكنتش كلفت نفسى اصلا


تحياتى


يعقوب :

لعلمك دى كانت اكتر حاجه جبتنى فى الموضوع ...ان الاداره الجيده ممكن فعلا ترجع الشعب المصرى شعب محترم زى زمان


تحياتى

Eric Matt said...


ما شاء الله

ربنا يكرمك ويخليك ليها يا رب

تحياتي لك من ماناساس البلد
ويسعدكم ببعض دايما يا رب

Shower-Mirror said...

الحلم العربى :

كلامك مظبوط فعلا ...بس ياريت حد يفهم


تحياتى و نورتنى :)


جروووووم :

ربنا يكرمك ياحبيبى

نورتنى والله ... ابقى تعالى و ماتقطعش بيا كده

سلام

Esmeralda said...

يا سيدى فهمنا ان موقف الشاب ذووووووووووووووووووووق احنا مش متعودين عليه بس ده الاسلوب فى اى مكان محترم و ده سيادتك جراند هيات
و حضرتك عميل فلازم يرضيك باى شكلن كان عشان يكسبك و يكتر من امثالهم
لعلمك انا باتعامل مع جراند هيات ده
عالم بقر بقر بقر و الله العظيم باكره اتعامل معاهم و ده لييييييييييييييييييييه؟؟؟؟؟؟
لأنى مش عميله و بينا شغل فعادى ان يطلعوا عينى و يقرفوا اللى خلفونى
معلش الاوتيل ده ليه بلاك هيستورى معايا و انا محروقه منهم و دافعه من جيبى بسببهم
ارتحت من تعليقي يا خويا ؟؟؟؟:(

Noony said...

سودت النهار لية بس!؟

تصدق نفسي أروح حلايب وشلاتين دي
اسمها عاجبني أوي
بس مشكلة
محتاجة محرم عشان أسافرلها
ههههههههههههههه

أيوة مكنتش بقرأ أدهم صبري
وأيوة مش ليا في عمر خيرت...بحس بملل شنيع..كله زي بعضه كله زي بعضه...بزهق

وبعدين أنا طبيعية جداً
انت مأخدتش بالك إني كنت بشيل زلطة خضراء في شنطتي أيام المدرسة!؟
سبحان الله
أنا كائن طوووول عمري مميز ومتميز
هههههههههههههههههههههههههههههه

:)
نوني

daktara said...

عمر خيرت موسيقار رائع

daktara said...

صورة بالف كلمة
مدونة جديدة
انظر حولك
د . خالد عزب

semsem said...

ههههههههههههه
بوست رائع بجد
مش ممكن
رائع جدا البوست وفى الاخر كمان عمر خيرت
اعبال الحفلا ت الجايه

Rivendell** said...

مش ممكن مش ممكن مش ممكن .... الكلام دا هنا في مصر

يا حلاوة يا ولااا


انت حضرت حفلة لعمر خيرت وصف اول كمان .. الله يبارك لك

لا نق ولا قر ولا حسد ولا ااييييي حاجة

بس الواد الامور دا عسل خاااالص
;)

انا مسخسخة من الضحك وصحيت ابويا وامي
حراااااااام عليك

emos said...

enta karsa begad:)))

ana kont mesta3'raba en meratak made7ketsh men awl el 7etta elly 2allak feha 3000 bs lamma de7ket ba3d 2etament 3aleha

yalla alf mabrook el 7afla w law fe 3ard tany teb2a ta7'odny ma3ako w ento beteshtero yemken 2atla3 b 7aga 3ala 7esabak walla 7aga

Bride Zone said...

انا مش بتابع افلام كتير عشان كده معرفش الاخ ده :)

Unknown said...

بص ؟أنا مش هقول أكتر من اني كنت هامووت من الضحك
والله بافكر لما أتجوز أعمل مدونة مخصوصة أحكي فيها عن مغامراتي الزوجية مع زوج المستقبل ان شاء الله:))
تحياتي ليك وللمدام

bastokka طهقانة said...

انا حضرت الحفلة دي
اكيد انت اللي كان معاك قرطاس الترمس و قاعد تقزقز
هههههههه




اوروفوار

shirry said...

والله بجد يا ابييه شاور اول مرة ادخل علي المدونة بس عجبتني اوي لدرجة اني اقعدت اقرأ البو سب وانا مسخسخة ولما دخلت عليا قعدت هي كمان تقرأه وهي مسخسخة هي كمان وكل مافتكر الموضوع اضحك اوي انا هي
هههههههههه
تعيش وتاخد غيرها

MAKSOFA said...

موش مصدقه
كل الذوق والآدب والشياكه د ي في مول في مصر


يارب مايكونش البوست الجاي
تقول لنا دي كانت كذبه أبريل بأثر رجعي
والا أنك كنت بتحلم

MAKSOFA said...

بس بصراحه دمك خفيف

فوكيره said...

والله مصر لسه بخييير

عمار يا مصر ... بناسك الزووووووووووق

MiraMar said...

ههههههههههههه
بصراحه تحفه
الموقف محرررررررررررررررررج
بس المهم كانت النهايه سعيده
اتمنى تزور مدوونتي

Dalia said...

يااااااااااااه

موقف غريب اوى

الحمد لله انها كانت 300 مش 3000

المهم قولى الحفله كانت حلوه؟؟

رينـــــــــــا said...

ههههههههههههههههههههههههههه
يالهووووووووووووووووى
حته موقف
ههههههههههههههههههههههههههههههه

لا بس فى الاخر الجو اتصلح يا عم
ورحت الحفله واتبسط
انا نفسى اروحلوا حفله انا كمان :(
بس اكيد مش كدا خاااااالص
ممكن اكره فيها عمر خيرت اساسا

صاحب البوابــة said...

قصة رائعة للغاية

اسلوبك فيها راقي

وبصراحة اكثر ما اعجبني موقف الشركة

حقيقي كله ذوق

تحياتي

صوت فيروز said...

احم احم هو ممكن يعني و لو كان ممكن انك تديني نمرة الولد ده؟؟ مش عشان حاجه و الله ولا انه شبه حبيب قلبي احمد عز بس انا حبيت اشكره بنفسي عشان ده عنصر فعال و لازم كلنا نشجعه
:)))))))))))))))

حبه جد بقي اسلوبك تحفه و بجد عجبني موت
ده غير اعجابي بيك و بمرتك لانكم بتفهموا بعض و بتحولوا تعملوا حاجه لبعض
ربنا يكرمك فيها يا رب

اللهم اعف بنات و شباب المسلمين قولوا امين

أخف دم said...

ما انا برضه مش كل مرة أحلف بالطلاق انى بآجى هنا من غير ما تقول وبعدين البلوج بتاعك لازم أبقى متابعه يا كبير ..
رهييييييييب الموقف ده والله وضحكت من قلبى .. وخصوصا على تعليقاتك وانت وزوجتك ..
وفعلا الموقف كان محرج جدا وانا لو منك كنت جبت شنيور وخرمت حتة فى المول عشان اخرج منها بس ربنا ستر وكرمك
تحياتى
وجميلة بلكون

خمسة فضفضة said...

السلام عليكم ورحمة الله وبركاته

جميله جدا
وسردك للحكايه رائع مشوق يشد لآخر كلمه في الحكايه

عارف ان علي طول لازم ادخل اقرأ جديدك بس دي اول مره اعلق عندك

ربنا يوفقك
وياريت ما تطولش الغيبه علينا دايما عاوزين نشوف ابداعاتك الجديده

تحياتي

sosoooo said...

الظاهر اني هدخل علي كل البوستهات بتاعتك ،، واسيب تعليق ،، بجد اسلوبك يجنن ... حقيقي انت رجعتلي ثقتي في الناس تاني ،، ولسة البلد بخير...
سلامي للعيلة كلها..

خيرالدين said...

الولد ده اكيد مش مصرى

Radwa said...


هههههههههههههههههههههههههههه
تعيش وتاخد انقح منها

لا بس بجد موقف فظيع وجامد موت ليكو حق ما تبطلوش ضحك عليه

لو انا حصلى الموقف دا كنت ممكن بعد ما اموت من الضحك واتمنى الارض تتشق وتبلعنى ممكن كنت اموت نفسى من العياط
ههههههههههههههههههههههههههههههه

3abdo me7tas said...

ههههههههههههههههههههههههه
هههههههههههههههههههههه
ههههههههههههههههههههههههه
بجد مش قادر أمسك نفسي من الضحك
ههههههههههههههههههههههه
ههههههههههههههههههههه
ايه يا عم كل ده حرام عليك بجد
بجد الموقف ده انا لو مكانك مقدرش أنساه ابداً طول حياتى
ربنا يخليلك إبنك والمدام آمين يا رب
مع انها اول مرة أدخل المدونة عندك بس أكيد بعد ما قريت البوست ده أنا هبات عندك فى البلوج
جزاك الله كل خير

Unknown said...

هههههههههههههههههه

بوست تحفةةة هههههههههههه

لا بجد مش معقولة ازاى كدة
سبحان الله

الحمد لله مبروك عليكوا الحافلة

وكل كسفة وانتوا طيبين ههههههههههههههههه

تحياتى

دينا فهمي said...

هههههههههه
بجد ضحكتني
القدر لعب معاكم لعبته صح (;

وشوف سبحان الله زي ما انت قلت
كنت عايز تخرج من الباب التاني ومالقتش باب وروحت وانت متضرر جدا
وفي الاخر طلع هو ده الخير
حاجة حلوة اوي بجد


بس صحيح هم اعتذرولكم ليه يعني؟؟

momken said...

بغض النظر عن الحفله الجامده والاحداث
انت دمك زى العسل كنت هموت من الضحك
طريقه سردك هايله هايله وانتى بتتمتع بروح عابع عاليع جدا
تحياتى

S H A H said...

جامد قوي قوي قوي قوي البوست ده يا شاور, انا مت على روحي من الضحك خصوصا من الكلام اللي انت كل شوية تقولو في سرك

انا كدة خلاص بقيت زبون مستديم بقى

و سلا مؤقت

صاحب البوابــة said...

أين جديدك ؟؟؟

مررت لأقرأ الجديد

فلم أجد !!!

تحياتي

طهقان said...

يا راااجل

مش تقول إنك انت

احنا شفنا اتنين بيضحكوا بعد الحفلة ...
قعدت انا وطهقانة نبص عليكم
ونقول

صحيح



في نعيم


إزيك يا راجل

smraa alnil said...

جايالك وانا ساحبة ذيول الخيبة

ووشي في الارض من الكسوف

ورجعت بس بثقة اكتر من الاول

المهم فين جديك يا عمنا

ومش تزعل من طارق

هو والله كان قصده يهزر معاك

رينـــــــــــا said...

هو مفيش بوست جديد بينزل ليه؟

S H A H said...

بقالك شهر مكتبتش حاجة انت فين يا نجم و حشتني يومياتك

Unknown said...

موقف جميل قوي فعلا
تحفة بجد



كل حفلة وانت طيب

Islamist Bloke said...

رزق

سبحان الله

ربنا يرزقنا اجمعين بالخير دائما

ربنا يهدينا ويجعل قلوبنا على الفطرة

والسلام

الكونتيسة الحافية said...

انت اكيد ابن حلال علشان ربنا يوقفلك ملاك حارس مش بس ينقذك من موقف محرج لا وكمان يحققلك اللي كان نفسك فيه

المواقف اللي زي كدة على قد ما هي بتكون كوميدية على قد ما جوهرها مؤثر جدا لان الطيبة والذوق مبقتش زي
ما أنت قلت سمة عامة بل تكاد تكون عملة نادرة
يلا المهم إنك استمتعت بموسيقى الفنان الجميل

تحياتي لك

علا من غزة said...



حبيت امسي او اصبح عليك يا عم الحج شاور

انا بقرأ لك تعليقات دايما ومش عارفة ليه ما جتش قبل كدة ,, مش تبقو تيجو

الموقف كتيييير لطيف ويدل على حسن حظك :]

تحياتي وسلاماتي

مدونة كسبان said...

سردك للموقف جميل جدا
غير عادى
عمر خيرت كمان فنان جميل جدا
ال>وق موجود
لكن بقا قليل اوى

Noony said...

Where art thou, Shower-Mirror?

أحسبك بخير إن شاء الله


نوني

Doba said...

ماشية معاك يا عم - اه بنق عندك مانع ولا ايه

بقى مشتروات وحفلة عمر خيرت كمان وفى الصفوف الأمامية - ماش ماشى

مش تاخد باقى البلوجرز معاك
بس بجد انتى فقرى جدا وموتنى من الضحك بس سيبك انت مراتك زى العسل

تحياتى --- هبة

wanna b a bride said...

ايه ده ؟
الكلام ده بيحصل في مصر بجد؟

دانا افتكرت الذوق مات من زمان في 67 والا حاجة

متأكد انك ماكنتش في دبي والا حاجة؟

جاييييز

عموما حظك بمب

ده مش قر على فكرة ده حسد
:)
البوست بقاله اسبوعين ...فين الجديد؟

تحياتي للمدام
:)

Eric Matt said...


مش ناوي تجدد يا كبير؟

وفاكرك يا ناسيني

تحياتي لك من ماناساس البلد

Doba said...

عندى تاج تعالو جاوبو عليه - يلا بسرعة قبل مأى حد يسبقكم

مستنياكم
هبة

ساعه الغروب said...

انت فييييييييييييين؟؟؟؟

يا رب تكون بخير

:)

S H A H said...

طالما متأخر كدة يبقى محضرلنا بوست تحفة بقى

مش هتقبل بوست عادي

وسللامي ليك و للعاائلة الكريمة

shermen said...

ana gaya asalem plz forgive me ican't read this story i'm very busey bye

عروس البحر said...

موقف يموت من الضحك بجد
ههههه
هههههه
انا قبل ما أقرأ نهاية البوست لقيت ان مش معقولة ان واحد شبه احمد عز و يحرجكم
تحياتي

دينا فهمي said...

انا قريت البوست ده من عشرين سنة
فين الجديد؟؟؟؟؟؟؟

صاحب البوابــة said...

؟؟؟؟؟؟؟؟

لعل المانع خيرا

صاحب البوابــة said...

؟؟؟؟؟؟؟؟

لعل المانع خيرا

bastokka طهقانة said...

انت مختفي فين؟
بلبطة و لا بتبيض الشقة؟

اوروفوار

Eric Matt said...


انت فين يا حج؟
تحياتي لك من ماناساس البلد

تخاريف خاصه! said...

انت فين يا ابيه...؟؟

الجماهير تناااديك...
:)

عروس البحر said...
This comment has been removed by the author.
عروس البحر said...

فينك؟؟؟؟

Eric Matt said...


انت فين يا كابتن

الجماهير كلها غضبانة

عموما انا في المكان يا مان في مصر

تحياتي لك من كايرو البلد

أخف دم said...

أنا بس جيت عشان بجد اطمن عليك واقول لك انت فين من فترة .. وعشان مرة يا أخى أسبقك بقى وأتشرف بوجودى قبلك يعنى ..
يارب تكون بخير

3ala asm masr said...

دمك فعلا خفيف موت
وكل حفله وانت طيب مع انى مبحبش عمر خيرت
ويارب نتعلم من الناس دى الذوق ويبقى عندنا ذوق حتى فى الشارع
اول مره فى مدونتك وان شاء الله مش اخر مره
تحياتى

Eric Matt said...


انت فين يا كابتشن؟

تحياتي لك من ماناساس البلد

أحمد سلامــة said...

ههههههههههههه
ليلة القبض على التذاكر بقى
والله انتو زي السكر
وولاد حلال كمان
:)
يالله
عقبال الحفلة الجاية
سلامي
انت فينك من زمان

كلبوزة لكن سمباتيك said...

enta fen?
mosh bayn leeh?
ramadan kareem

Eric Matt said...


فينك يا حاج؟

تحياتي لك من ماناساس البلد

admelmasry said...

هههههههههههههههههههههههههه
الا قولي يا اخ ؟
.
.
.
.
هو الراجل دا واقف علي طول ولا بيروح اجازات ؟
.
.
.
ياعني ما ينفعش الواحد يعملها بالقصد وياخد منه كل مرة حاجة ؟
.
.
اااااه شكلها مش هينفع
لازم الساسبنس بتاع السربرايز
مش كدا ولا ايه ؟
.
.
.
هههههههههههه
بجد مبروك عليك الحفلة
احيانا بيجيلي شعور
ان مصر لسه بخير
تحياتي والسلام

الـسـيـدة نـون said...

وعدتك انى اشوف مدونتك يا شاور
تحفة
بجد انا غيرانة من اسلوبك فى السرد
اسلوبك يجنن
والموقف بتاع التذاكر ده فكرنى بكل المواقف المحرجة اللى حصلتلى فى حياتى
عموما هو عمر خيرت يستاهل ان الواحد يحرج علشانه
سلام وابقى تعالى زورنى تانى

زمردة said...

هههههههههههههههههههههههههه
اضحك الله سنك
مش عارفة اعلق من كتر الضحك
ههههههههههههههههه
المهم انكم حضرتوا الحفلة
:D

مواطنة said...

هههههههههههههههه

تحففففففففففففة

موقف فعلا كوميدى

و غريب اوى الذوق ده.. ربنا يزيد و يبارك

Unknown said...

انا نفسي احضرله حفلات زي زمان انا الاستاذ عمر كان من اللي بفتخر انه درسلي و اشرف عليا ايام ما كنتبعزف ف الاوبرا و بجد انا من اشد المعجبين بيه و بيك لان بصراحه البوست في منتهي خفة الدم
فاصل ونعود
.
.
.
عدنا
اه نسيت اقولك
البلوج علي بعضها تحفة
و ربنا معانا كلنا

ياسمين
ملكة ارض الاحزان
عاقلة علي ارض الجنون
ان لم تجمعنا الايام فربما نلتقي في قصيده

mostafa rayan said...

لحد دلوقتي انا مش فاهم هو العرض ب300 و3000 وايه اللي حصل بالظبط ولو هو 3000ايه اللي خلاه يديلك التذاكر
علي العموم مبروك حفلة عمر خيرت

aya said...

ههههههههههههههههههههههه
بجد حلوه جدا واحلي حاجه فيها طريقه السرد للموضوع بجد راااائع ودم خفيف بشكل بس ازاي شوفت 3000 الي 300 متهيالي ده لانك كنت هتجنن وتدخل الحفله
بعد كده مش تكشي من بابا تاني
بجد رائع
اتمني زيارتك القريبه ان شاء الله