Sunday, August 13, 2006

حكايات

بقالى فتره في فكره مسيطره عليا و مش قادر اطلعها من دماغى ,,, و انا ماشى فى الشارع او بالعربيه بافضل ابص على العمارات و اقول : كل عماره من دول فيها كام شقه ؟؟ و كل شقه فيها كام بنى اادم ؟؟؟ و كل بنى ادم عنده حياه كامله و معارف و هموم و اسرار .... يانهار اسود .. دى حاجه عايزه شغل بعد الظهر لمجرد التفكير فى الحكايه دى .... هى طبعا فكره مجنونه بس كل ماتيجى فى دماغى اتبرجل .. و ساعات اقول لنفسى ( و ده العادى انا باكلم نفسى علطول ) ياواد انتى مالك ؟؟ ما يولعوا بجاز ,, انتى فضولى كده ليه ؟؟ بس برضه يفوت كام يوم و الجنونه ترجع تانى .. و انا بعيد عن القارئ - ان وجد - من النوع اللى بيتلكك عشان يقلق و يشغل باله !! اى حاجه معديه فى الهوا اتروش بيها و ممكن مانامش الليل كمان .. و بكده اصبحت زبون لقطه لعدم التركيز و القولون العصبى !!
بس برضه فكروا معايا و تخيلوا .. كم الحواديت و الاسرارا و الاوجاع و الافكار من حوالينا .... ساعتها باحس انى باصغر .. باصغر ... باصغر و ان الحكايه مش مستاهله كل التفكير فى الذات ده و ان الدنيا مليانه بلاوى ... مش لما الواحد يجيله شوية امساك يقلب الدنيا .. لازم اشوفلى حل فى الفكره المهببه دى .....دى حاجه زفت ....

7 comments:

SaudiDDS said...

نفس الفكرة مسيطرة علي حاليا...
في الشارع اجد صعوبة و انا احاول ان اركز في اشياء بدل الاشخاص في السيارات اللي حولي...
و محاولات نسج قصص عنهم..او تفسير اي حركة يقومون به
!!!ا

Shower-Mirror said...

طب كويس يعنى انا لسه ما اتجننتش

Aoossa said...

هاى
بص ياعمى
موضوع القولون العصبى ده شائع جدا
لو رحت لدكتور باطنى هايطلب منك تحليل
التحليل هيبين أن الخضروات عندك فى صعوبه فى هضمها و يكتبلك أدوية قاولون زى سبازمو كانيولاز
وفلاجيل
أو أنتتركس
أى عبط كده
والموضوع أنك دائم التفكير وعندك توتر
ده بيأثر على الأنزيمات الهاضمه وبيقلل عملها فبالتالى الوسط البكتيرى بيزيد فى القاولون
طيب الحل أيه متفكرش مش هاتقدر
حل المشكله اللى عندك
مش متجوز روح أتجوز أو حب
أو روح لدكتور نفسى هايكتبلك مهدىء يضيعلك تعب القاولون خالص
خاصة ان العلاج هايكون ادويه بسيطه مفيهاش أدمان والمشكله هاتتحل
وبمجرد الأستقرار مش هتحتاج لاى مساعده أكلينيكيه
مع خالص تقديرى
الأميره أوسه
تخصص أنف وأذن وقولون
دكتوراه من جامعة العتبه بلندن
وزميلة كلية الجراحيين الملكيه بالعباسيه

المزاجنجي said...

والله انت روقت لي نافوخي بس انا باشوف المشكلةبمنظار تاني من النوع الرزل يعني في فالبيت ده كام بنت واكيد كلهم عاوزين يتجوزوا يبقوا محتاجين كام شقة وكام تلاجة وكام بوتجاز وكام حلة كبيرة لزوم البط والرومي والكوارع افرح اوي للناس اللي هاتشتغل وتبيع الكلام ده وازعل اوي على الابهات اللي هايتفحتوا علشان يجيبوا الكلام ده ارجع واعمل زيك والعن ابو خاش اللي خلفوهم ومن ده كتير يا ريتك تسمع كلام اسا ايسو وربنا هايكرمك هي اصلها تخصصها نادر .... السيد ههههههههههههههه وربنا يشفينا جميعاً

دعاء غريب said...

انا كمان بفكر في الموضوع ده
بصره
:)

Rasha said...

اولا نفسي اعرف اسمك حتى مفضلش اقول شاور ميرور عشان يتهيئلي انك تستاهل اناديك باسمك وليس في مراية الحمام مع ان الفكرة لطيفة واختيار مراية الحمام تدل على انك انسان شفاف صادق مع نفسك وتحمل بعض الغموض ..اعتقد ان الموضوع دا لما الانسان يوصله يعني طلع برا افكاره ومشاكله اليومية شاف اكبر من الصورة الموجوده ادامه ودي حاجه صحية ما تخافش :)

تحياتي

الدرويش المرووش said...

مرحبا بك فى عنبر العقلاء
الموضوع ده بييجى على بالى على فترات من زمان قوى و رغم كده وقع شعر راسى

الواحد فى نفخته الكدابه بيحس إنه محور الكون و سر الحياه و لكن أفكار زى دى تخلى الواحد يصحى للون و يعرف حجم نفسه كويس

كل واحد من اللى بنشوفهم للحظه من قزاز العربيه عنده أمال و أحلام و طموحات و خطط و أمراض و مخ مليان مهلبيه و كمان عنده شبكة علاقات معقدة بناس تانيين زيه و هلما جرا

ياااااه
منك لله ده أنا ما صدقت أظبط السوالف
أهو وقع تانى