Wednesday, August 30, 2006

خامس مترو يعدى ....

....بصت فى ساعتها للمره الالف
ماشى ياحمد -قالت بصوت مخنوق - ربع ساعه بحالها
مر من امامها مجموعه من الشباب الفاضى و نظر اليها احدهم نظره فاحصه .. و على شفتيه ابتسامة سخريه
مش هاييجى و حياتك ..! تحبى اجيبلك كرسى .. (قالها و انفجر و من معه فى ضحك مقزز )
ربنا يحرقك انت و هو ( قالت فى سرها بغيظ ..و هى تتظاهر بالا مبالاه ) دى تالت مره يتقالى الكلام ده النهارده .. ماشى يا احمد
و الله لما تيجى ... انا بجد المره دى هاسلم عليه و امشى ..كفايه كده ..كرامتى
كل مره كده ....بس يمكن .. عنده ظروف و الا حاجه ؟؟.. او يمكن مستنينى فى مكان غلط ؟؟؟؟ ( فكرت و هى تقترب من الجنون ) لأ انا متأكده ..! انا قلتله محطة مترو السادات ..اتجاه حلوان ... عند اخر عربيه ...
لأ ..ده هو اللى بيستعبط ...اكيد قاصد يتأخر عشان يضايقنى
...و ادى خامس مترو يعدى ...!! العسكرى دلوقتى اكيد هاييجى يغلس عليا
***************
(احمد .. ازيك اتأخرت ليه يابيبى و حشتنى ... ( قالت و هى تحتضن يديه و عينيها تدمع من الفرحه

16 comments:

tona said...

عارفه البنت دي علي فكره

Shower-Mirror said...

طب مين هى ..لو جدعه :)

الأميره أوسه said...

مش دى البنت نجلاء فهمى
أقصد ميرفت فتحى
بنات عاوزه قطع رقبتها
هى الساعه معاك كام

أحمــــــــدبــــــــــلال said...

و الله أنا متأخرتش للدرجة دى
و بعدين فى أسكندرية هنا مافيش مترو دى ترام
و بعدين هو علشان أتأخرت شوية تفضحنى كده و تقول للناس كلها
و كمان على البلوجرات


على فكرة المدونة دى فكرتنى بقصة قصيرة لنبيل فاروق فى سلسلة كوكتيل 2000
مش فاكر أسم القصة بس كانت بتتكلم عن بنت مستنية خطيبها اللى هو زميلها فى العمل كمان و كل يوم يتأخر و كل يوم تفضل مستنياه على الرصيف تتعرض للمضايقات لغاية ماييجى
و اليوم اللى قررت أنها تتمرد و تمشى عبرت الشارع غاضبة مسرعة
فصدمتها سيارة قادمة
و لكنها
لم تكن تحمل مشاعر الموت المعتادة بل أحست بالغضب لأنه حتى فى الموت سترحل باكراً و تظل تنتظره

Shower-Mirror said...

اوسه

لا دى نبيله ناهد او ليلى كوثر ...!! و الساعه دلوقتى تلاتاشر و ربع ..

و بعدين بنات عايزه قطع رقبتها ليه ؟؟ انتى مش كنتى زيها من عشرين سنه كده و كنتى متشحتفه على الشباب ... ؟ :)
**********

احمد بلال

والله صحيح انت فكرتنى ..تقريبا انا فاكر انى قريت حاجه زى دى فى كوكتيل ... بس هنا المعنى مختلف تماما


اللى اقصده هنا هو التحول من النقيض الى النقيض ..

أحمــــــــدبــــــــــلال said...

فهمت القصد من روايتك
و لكن طرأت القصة فى ذهنى و أنا أقرأ الدونة ربما لتشابه الظروف
و ليس النهايات

tona said...

مينفعش افتن

BackBone said...

معلش يابنتي هو ده الهباب اللي اسمه الحب, متعرفيش الواحد بيبقي مستني حبيبه ذي النار المولعه و لما يالاقي حبيبه بيتش بسرعه و بيبقي ورده مفتحه

يوووووه, امال اسمه لموووور ليه يأوختشي

gwad said...

أحب أقول لتلك الفتاة
أصون كرامتى
وممكن تقوليلى مين احمد دة عشان اروح اخنقة حديسيب بنت امورة فى المترو لوحدها

كلبوزة لكن سمباتيك said...

بما انه احمد فهي اكيد امال
عزيزتي امال لو اتاخر عليكي تاني امشي و سيبيه يرن و اقفلي موبيلك اسبوعين كده علشان يتربي
لازم تشكميه من الاول
امال مين حيغسل المواعين بعد كده!
قال بيبي قال
خنشور و بشنب و اسمه بيبي
دلعية اه بس قوليله يا عبد الحفيظ اشيك
و بما اننا في زمن ارتخاء المشاعر زي ما قال اديبنا الكبير مراية الحمام
فرخرخي مشاعرك و متتحدفيش عليه قوي كده
---
مراية
اسلوبك من حلاوته استفزني

Shower-Mirror said...

تونا

افتنى و لا يهمك اللعب هنا على المكشوف

باكبون

يا واد انتى ياجامد ياللى فاهم فى خبايا المرأه

جواد

انتى هاتعاكس والا ايه ... معندكش اخوات بلاستيك

كلبزه

كلبوزتى العزيزه بالراحه على البنت ...انتى نسيتى كنتى محدوفه ازاى على الدلعدى جوزك . انتو كده ياستات

و ميرسى على الكلام الحلو يا حلو ...:)

Amira Hassan said...

اه م احنا هبل جدا يا معلم

Racha Khoury said...

هي البنت دي ما زعلتش ان احمد اتأخر عليها ومن كلام الناس لأ هي زعلت عشان اتأخرت عن موعد علي صحبها التاني

هوا لسا في بنات بتستنا؟؟!!

Anonymous said...

اعرف صديقتك هذه جيدا.. اذكر انها انتظرت صديقها هذا لمدة اربع ساعات كاملة على الرصيف في احد شوارع مدينة نصر بعد ان إستأذن منها ليحضر شيئا كان قد نسيه في منزله. تركها امام بوابة العمارة وراح في النوم. هبلة.

emos said...

شوف البنات طيبين ازاى الدور و الباقى على اللى معندهوش دم اللى سابها ملطوعة و مقالهاش اسف

الـسـيـدة نـون said...

انا اعرف واحدة خيخة اوى استنت واحد تلات سنين ولما جه مقلهاش اسف